Kura lə Njesigənea̰ lé
1 Aa ooje kura ləm gə́ m’a gə gədee,
Yeḛ gə́ m’ɔree m’undá gə kəmee
Gə́ rɔm lelm dəa’g.
M’ɔm ndiləm dəa’g ya,
Yeḛ a kila mber néra gə́ gə dɔ najee
Kar ginkoji dəwje gə raŋg .
2 Yeḛ a ra né ɓəgəgə-ɓəgəgə el ləm,
Ndia a ɓar wəl-wəl el ləma,
Yeḛ a ra né kar dee d’oo ndia mba̰-rəwje’g el ləm tɔ.
3 Ŋgawlal gə́ mbəl lé yeḛ a korè tɔ el ləm,
Kúla pər gə́ o̰ jḛ̀ lé kara
Yeḛ a kunda tɔl el ləm tɔ,
Yeḛ a kila mber ta gə́ to gə dɔ najee gə goo kankəmta.
4 Mée a kila kas el ləm,
Yeḛ a kya̰ gée yɔgɔ el ləm tɔ
Saar karee tum gin né gə́ gə dɔ najee dɔ naŋg nee ləm,
Saar kar koso-dəwje gə́ d’isi dɔgoré-looje’g
D’unda meḛ dee yel dɔ godndia’g ləm tɔ.
Lookàr lə ginkoji dəwje gə raŋg
5 Ala gə́ to Njesigənea̰
Yeḛ gə́ njekunda dara karee tad rəg-rəg ləm,
Yeḛ gə́ unda naŋg nee gə néje lai gə́ to keneŋ ləm,
Yeḛ gə́ ar koso-dəwje gə́ d’isi keneŋ d’əmə ləma,
Ar deḛ gə́ d’isi keneŋ d’aw kəmba ləm tɔ lé
Pa togə́bè pana:
6 Ma Njesigənea̰ m’ɓari
Mba kari ra néra gə́ gə dɔ najee.
M’a kwa jii ləm,
M’a ŋgəmi ləma,
M’a kundai gə́ némanrɔ
Gə́ m’a man ne rɔm kar koso-dəwje ləm tɔ
Gə mba kari to lookàr lə ginkoji dəwje gə raŋg .
7 Gə mba kar kəm njékəmtɔje teḛ ləm,
Gə mba kar deḛ gə́ d’wa dee ɓər lé
D’unda loo teḛ ləma,
Kar deḛ gə́ d’udu dee duu-loo gə́ loondul’g lé
D’unda loo teḛ ləm tɔ.
8 Ma m’to Njesigənea̰, yee ɓa to rim,
Ndá m’a kya̰ rɔnduba ləm kar dəw gə́ raŋg el ləm,
Riɓar ləm kara m’a kya̰ kar magəje el ləm tɔ.
9 Aa ooje, néje gə́ dɔtar
D’aw lée’g béréré mba̰
Ndá néje gə́ sigi ɓa m’ula sí taree,
Kédé ɓa kar dee teḛ ɓəi lé
Ma m’ɔr gée m’ar sí ya.
Pa kun baŋga gə́ sigi
10 Ɔsje pa gə́ sigi arje Njesigənea̰,
Ɔsje pa pideeje ne
Areeje ɔr gwɔi naŋg nee njal,
Seḭ gə́ awje dɔ baa-boo-kad’g
Gə seḭ gə́ síje ta’g ləm,
Seḭ dɔgoré-looje gə dəwje lai gə́ d’isi keneŋ ləm tɔ.
11 Maji kar deḛ gə́ d’isi dɔdilaloo’g gə ɓee-booje ləa lé
D’ɔr ndu gə́ tar ləm,
Maji kar njé gə́ Kedar gə́ d’isi ɓee-kogoje’g lé
D’ɔr ndu dee gə́ tar ləm tɔ!
Maji kar dəwje gə́ d’isi dɔ mbalje’g lé
D’al rɔ dee gə boo-rɔkal!
Maji kar ndu kii rɔlel ɓar dɔ sém mbalje gə́ tar to!
12 Maji kar dee d’ula rɔnduba dɔ Njesigənea̰’g ləm,
Maji kar dee d’ila mber pidee dɔgoré-looje’g ləm tɔ.
13 Njesigənea̰ unda loo teḛ
To gə́ bao-rɔ bèe ləm,
Yeḛ ar ŋguree rəa ŋgwɔd-ŋgwɔd
To gə́ njerɔ bèe ya ləm tɔ.
Yeḛ ɔr ndia gə́ tar ləm,
Yeḛ ndaŋg rəa ləma,
Yeḛ riba dɔ siŋgamoŋ ləa koma̰ ne njéba̰je ləa ləm tɔ.
Né gə́ Njesigənea̰ wɔji-kwɔji ra lé
14 Ləw ba m’pata el,
M’isi dɔmṵdu, m’ɔg rɔm ra né,
M’a ra né pénéné
To gə́ dené gə́ si tur ndóo bèe ləm,
M’a taa kəmə ta-ta ləma,
M’a kəmə biriri-biriri ləm tɔ.
15 M’a tuji dɔ mbalje gə dɔdərlooje pugudu-pugudu ləm,
M’a kar néje lai gə́ to təb keneŋ
Tudu kurum-kurum ləm tɔ,
M’a kar baa-booje tel to gə́ dɔ naŋg gə́ kədərə kaw-kaw ləm,
M’a kar duu-manje d’yi tə-tə ləm tɔ.
16 M’a kar njékəmtɔje njaa rəw’d
Gə́ deḛ gər kédé el ləm,
M’a kɔr no̰ dee dan kila-rəwje
Gə́ deḛ gər kédé el ləm tɔ,
M’a kar loondul tel to gə́ lookàr no̰ dee’g ləm,
M’a kar looje gə́ to guduru-guduru
Tel d’asəna rai-rai ləm tɔ.
Yee ɓa gə́ né gə́ m’a gə ra
Ɓó m’a kuba gée kya̰ el.
17 Deḛ gə́ d’ɔm meḛ dee dɔ magəje gə́ tɔl gə ji dee lé
Deḛ gə́ d’ula magəje gə́ léḛ dee pana:
Seḭ toje Ala lə neḛje lé
Ndá d’a rəm gə goo dee ləm,
Rɔkul a dəb dɔ dee’g ləm tɔ!
Koso-dəwje gə́ to njékəmtɔje gə njémbikuduje lé
18 Seḭ njémbikuduje, ooje ta!
Seḭ njékəmtɔje, aaje loo ooje!
19 See na̰ ɓa gə́ njekəmtɔ wa,
See to gə́ kura ləm el wa.
Esé na̰ ɓa to njembikudu
Asəna gə njekaḭkula ləm gə́ m’ulá lé wa.
See na̰ ɓa to njekəmtɔ to gə́ baokura lə Ala
Esé to njekəmtɔ asəna gə kura lə Njesigənea̰ lé wa.
20 Seḭ ooje néje bula
Nɛ seḭ ɔmje meḛ sí dɔ’g el,
Mbi sí to tag nɛ
Seḭ ooje ne ta el.
21 Njesigənea̰ ndigi kila mber godndia gə́ boo
Mba kar Israɛlje d’isi ne dan maji’g.
22 Nɛ deḛ to dəwje
Gə́ d’unda dee banrɔ taa néje lə dee!
Deḛ tɔ deḛ lai gə kúla larje
D’ɔm dee mee bolè mbalje’g ləm,
D’ula dee mee duu-looje’g ləm tɔ.
Deḛ d’unda dee banrɔ
Ar dəw kára kara gə́ njetaa dɔ dee godo!
23 See na̰ ɓa mbuna sí’g a kur mbia njor
Dɔ ta néje’g neelé wa.
See na̰ ɓa a ndigi si gèŋ
Ndɔ gə́ raŋg’d gə mba koo ta wa.
24 See na̰ ɓa uba njé’g lə Jakob ya̰ dee
Ar dee d’unda dee banrɔ ləm,
Uba Israɛlje ya̰ dee
Ji njéɓogoje’g wa.
See to Njesigənea̰
Yeḛ gə́ jeḛ n’raje kaiya j’ɔseeje ne rəw lé el wa.
Deḛ ndigi njaa goo torndiaje’g el ləm,
Deḛ ndigi koo godndia el ləm tɔ.
25 Gelee gə́ nee ɓa yeḛ ɓugu ne boo-oŋg ləa dɔ Israɛlje’g ləm,
Ar rɔ gə́ to ɓəl kədəm-kədəm lé
Ɔm ne dɔ dee’g ləm tɔ.
Rɔ neelé aḭ dɔ dee sub-sub gə looje lai
Nɛ dee d’oo ginee el ləm,
Yee roo dee dula-dula
Nɛ d’oo gə́ né el tɔ.
© Ngambai Bible © Alliance Biblique du Tchad 1989, 2015.
