Njegaŋ-rəwta dɔ naŋg nee
1 Pakɔs lé.
Ɔsje pa gə́ sigi arje Njesigənea̰
Mbata yeḛ ra néje gə́ dumkoo ləm,
Jikɔlee gə kag jia gə́ àr ŋgad-ŋgad ɓa lá səa.
2 Yeḛ ar dee gər kaji ləa ya ləm,
Yeḛ riba dɔ meekarabasur ləa
Ar kəm ginkoji dəwje gə raŋg inja dəa’g ləm tɔ.
3 Yeḛ ar mée olé dɔ meemaji’g ləa gə dɔ meenda londoŋ’g ləa
Gə́ wɔji dɔ gel-bɔje lə Israɛlje ləm,
Kaji gə́ Ala lə sí aji sí ne lé
D’oo gə loo lai-lai d’ɔr rudu naŋg nee njal ləm tɔ.
4 Seḭ dəwje lai gə́ síje dɔ naŋg neelé
Ɔrje ndu sí gə́ tar wəl gə rɔlel par gə́ rɔ Njesigənea̰’g ya ləm,
Ɔsje pa ndubaje ne rɔ sí gə boo-rɔkal ya ləm tɔ.
5 Ɔsje pa arje Njesigənea̰ gə kṵdu-kagje lə sí,
Ɔsje ne pa kula rɔnduba dəa’g gə kṵdu-kagje lə sí lé ya.
6 Maji kar sí raje ne né ta yi-yi gə ndu to̰to̰ gə ndu ta̰rən lé
Gə rɔlel no̰ mbai’g lə sí gə́ Njesigənea̰ lé tɔ.
7 Maji kar kaa baa-boo-kad gə néje lai gə́ to keneŋ lé
Ɓar ɔr loo lɔi-lɔi ləm,
Maji kar deḛ lai gə́ d’isi dɔ naŋg neelé
Nduba rɔ dee gə boo-rɔkal ləm tɔ.
8 Maji kar mán baaje tal turu tuma̰-tuma̰ ləm,
Maji kar dɔ mbalje lai-lai kara ra né wəl-wəl gə rɔlel ləm tɔ
9 No̰ Njesigənea̰’g ya,
Mbata yeḛ ree gə mba gaŋg rəwta dɔ naŋg nee ya.
Rəwta-gaŋg gə́ yeḛ a gaŋg dɔ dəwje gə́ dɔ naŋg neelé
Yeḛ a gaŋg gə goo meekarabasur ya ləm,
Ka̰ koso-dəwje lé kara
Yeḛ a gaŋg gə dɔ najee ya ləm tɔ.
© Ngambai Bible © Alliance Biblique du Tchad 1989, 2015.
