Ala to njekaḭ bada dɔ njénékəmndooje’g
1 Maji kar sí pidije Njesigənea̰.
Ŋgaw məəm lé maji kari pidi Njesigənea̰ lé tɔ.
2 M’a pidi Njesigənea̰
Loo-sim gə́ m’isi kəmba lé ləm,
M’a kila riɓar dɔ Ala’g lé ləm
Loo gə́ ma m’isi ne kəmba lé ləm tɔ.
3 Maji kar sí ɔmje meḛ sí dɔ dəwje gə́ boo’g el ləm,
Gə dɔ dəwje gə́ d’askəm kaji sí’g el lé ləm tɔ.
4 Kəmə lə dee teḛ ho̰d ar dee tel d’andə ne naŋg gogo,
Mee ndəa’g neelé ya, néje lə dee gə́ d’wɔji mba ra lé
Ɔs bo̰ bɔsɔrɔ keneŋ tɔ.
5 Rɔlel nai gə yeḛ gə́ Ala lə Jakob to gə́ njela səa ya ləm,
Yeḛ gə́ unda mée yel dɔ Njesigənea̰ Ala’g ləa lé ləm tɔ.
6 Yeḛ nja unda dara gə naŋg nee ləm,
Gə baa-boo-kad gə néje lai gə́ to keneŋ lé ləm tɔ,
Yeḛ aar njaŋg dɔ kankəmta’g saar gə no̰.
7 Deḛ gə́ d’orè dɔ dee naŋg lé
Yeḛ ɔr kəm ta lə dee gə goo rəbee ləm,
Deḛ gə́ ɓó tɔl dee lé
Yeḛ ar dee nésɔ dee ya ləm tɔ,
Njesigənea̰ lé taa dɔ deḛ gə́ d’wa dee gə́ ɓər lé.
8 Njesigənea̰ lé ar kəm njékəmtɔje teḛ ləm,
Deḛ gə́ d’wa koŋgoŋ lé Njesigənea̰ nja ndɔji dee
Ar dee d’aar dana njoroŋ ləma,
Njéra né gə́ gə dɔ najee-je lé kara
Njesigənea̰ lé unda dee dan kəmee’g ya ləm tɔ.
9 Njesigənea̰ lé aḭ bada dɔ dəw-dɔ-ɓeeje’g ləm,
Yeḛ gəd ŋgonal gə njekəisiŋga lé ya ləm tɔ,
Nɛ yeḛ tuji rəw-kaw lə njémeeyèrje pugudu-pugudu.
10 Njesigənea̰ lé o̰ ɓee saar-saar gə no̰.
Ǝi Sio̰, Ala ləi lé si gə ləbee-ləbee saar gə no̰.
Maji kar sí pidije Njesigənea̰ ya.
© Ngambai Bible © Alliance Biblique du Tchad 1989, 2015.
