Tamaji gə́ ra dan néurti’g
1 Pakɔs kḭ kaw tuga ne loo ɗao-ɗao gə́ tar.
Ǝi Njesigənea̰, dan néurti gə́ al dɔm sula’g lé ɓa
M’no̰ m’ɓar ne rii ya.
2 Mbaidɔmbaije, maji kari oo ndum ya kari,
Maji kari ur mbii gèŋ gə mba koo ne ndòo ra gə́ m’ra rɔi’g lé.
3 Njesigənea̰, ɓó lé i ar məəi olé dɔ néra kori-korije’g lə dəwje ndá
Mbaidɔmbaije, see na̰ ɓa a si kəmba ɓəi wa.
4 Nɛ i nja loo kiŋga meekoso lemsé to mbɔri’g
Gə mba kar dəwje ɓəli ne.
5 M’unda məəm yel gə́ dɔ Njesigənea̰’g ləm,
M’unda məəm yel dəa’g gə ŋgaw məəm bura ləm tɔ,
Ndá m’ŋgina ne ndukun ləa lé.
6 Ŋgaw məəm ndiŋga Mbaidɔmbaije
Unda njéŋgəmlooje gə́ ndiŋga lookàr lé bèe,
Unda njéŋgəmlooje gə́ ndiŋga lookàr ya.
7 Seḭ Israɛlje, maji kar sí undaje meḛ sí yel gə́ dɔ Njesigənea̰’g ya.
Mbata meekoso lemsé to gə́ rɔ Njesigənea̰’g ləm,
Nékoga dɔ dəwje taa rəa pəl-pəl ləm tɔ.
8 Yeḛ nja ɓa a kuga dɔ Israɛlje lé
Kɔr néra gə́ kori-korije lə deḛ lai dɔ dee’g ya.
© Ngambai Bible © Alliance Biblique du Tchad 1989, 2015.
