Ta gə́ Jɔb ila boakuraje ləa’g lé pana: See dəw gə́ ta wa dəa lé a no̰ ɓar Ala wa
1 Jɔb un ta tɔɓəi pa gə gosota pana:
2 Ala gə́ mbad kɔr kəm ta ləm lé to Njesikəmba.
Bao-siŋgamoŋ gə́ ar meekad mbag-mbag taa məəm pəl-pəl lé to Njesikəmba tɔ.
3 Loo gə́ m’isi m’taa kəmə ləm,
Kəmə lə Ala a nai əm’g ləm tɔ ndá
4 Tam a pata gə́ lal najee kára kara el ləm,
Ndo̰m a pa taŋgɔm kára kara el ləm tɔ.
5 Wah! Loo karm-ma nja m’pana: Seḭ paje lée’g bèe lé godo.
Saar as yoom kara m’a kya̰ goo néra gə́ gə goo rəbee ləm el.
6 Ta néram gə́ to gə dɔ najee lé
M’aar keneŋ njaŋg ɓó m’a rəm keneŋ el.
Meem ila ta dɔ ndɔje’g ləm kára kara el.
7 Maji kar njeba̰ ləm tuji asəna gə njemeeyèr ləm,
Gə njeta ləm kara tuji asəna gə njera némajel bèe ləm tɔ.
8 Njehulai lé loo gə́ Ala gaŋg kúla kəmə ləa ləm,
Gə ɔr kankəmrea ləm tɔ lé
See nékunda-mee-yel dɔ’g ləa gə́ nai to ɗi wa.
9 See Ala a koo ndu no̰ ləa
Loo gə́ nékəmndoo teḛ dəa’g wa.
10 See yeḛ a kar Bao-siŋgamoŋ to nérɔlel ləa wa.
See yeḛ a ra tamaji ta Ala’g lé ta-ta wa.
11 M’a ndoo sí kila-rəwje lə Ala,
M’a kiya sə sí dɔ néje gə́ Bao-siŋgamoŋ wɔji-kwɔji ra lé el.
12 Nɛ seḭ gərje rəbeeje mba̰ ləm, seḭ ndigije səa ləm tɔ.
See gelee ban ɓa seḭ ya̰je rɔ sí dan takə̰jije’g gə mḭdé ba ɓəi wa.
Teḛkɔr gə́ waga ba lé
13 Aa ooje, né ka̰ njemeeyèr gə́ Ala unda kul wɔji ne dəa ləm,
Nédɔji gə́ Bao-siŋgamoŋ unda kul wɔji ne dɔ njera né kərm-kərm ləm tɔ lé ɓa nee.
14 Ɓó lé ŋganeeje bula ndá d’a kwəi yoo-kiambas ləm,
Muru a na ŋgakeaje tas ləm tɔ.
15 Deḛ gə́ d’a nai gogo lé yoo-koso ɓa a ndum dee ləm,
Denéje lə dee gə́ nai gə́ njékəisiŋgaje lé d’a no̰ dee el ləm tɔ.
16 Ɓó lé yeḛ daa lar dɔ na̰’d to gə́ babur bèe ləm,
Ɓó lé yeḛ ɔm kubuje dɔ na̰’d to gə́ a̰ji gə́ d’ɔm dɔ na̰’d bèe ləm tɔ
17 Ndá to yeḛ nja daa dee dɔ na̰’d ya
Nɛ njéra nédanaje ɓa d’a kula rɔ dee’g ləm,
Dəw gə́ to njera né gə goo rəbee ɓa lar neelé a tel to kea̰ ləm tɔ.
18 Kəi ləa to asəna gə kəi ra ndiri bèe ləm,
To asəna gə kəi-ləw lə njeŋgəm loo-ndɔ bèe ləm tɔ.
19 Yeḛ to naŋg dan boo-nékiŋgaje’g ndá
Yeḛ wəi lal néje lai,
Yeḛ teḛ kəmee bəsəsə ndá néje lai sané pá.
20 Ɓəl-boo teḛ dəa’g wai to gə́ mán-kaw bèe,
Lel-mal unee dan loondul’g igi səa kág.
21 Lel gə́ ḭ bər lé unee aw səa əw,
Yee ɔree wɔgədɔ ilá əw tɔ.
22 Ala un kəmee rəw dəa’g uree ne gə ɓandaŋg
Ndá njemeeyèr ndiŋga rəa mba kaḭ taa rəa ta kandə ɓandaŋgje’g.
23 Deḛ kunda ji dee gée’g loo-koso’g ləa ləm,
Deḛ d’ur kɔl gée’g loo-kɔd-kaw’g ləa ləm tɔ.
© Ngambai Bible © Alliance Biblique du Tchad 1989, 2015.
