Ndukwɔi lə njemeekilakas
1 Pa lə Koréje gə́ d’ar bao-pa mba karee ɔs sə dee lé
2 Ǝi Ala, jeḛ j’oo ta gə mbi sí ləm,
Bɔ síje-je d’ɔr gée d’ar sí j’oo
Kula raije gə́ i ra tɔl bém mee ndɔje’g lə dee
Gə mee ndəaje gə́ ləw lé ləm tɔ.
3 Ji siŋgamoŋ ləi gə́ ɓar mèr-mèr lé
I tuba ne ginkoji dəwje gə raŋg
Ya̰ loo unda dəwje ləi keneŋ ləm,
I tɔl ginkoji dəwje gə raŋg
Ya̰ loo ar dəwje ləi taa loo keneŋ pəl-pəl ləm tɔ.
4 Mbata kiambas lə dee ɓa deḛ taa ne ɓee el ləm,
Kag ji dee ɓa aji dee el ləm tɔ,
Nɛ to jikɔli gə kag ji gə́ ɓar mèr-mèr ləm,
To kəmi gə́ ndogó wər-wər ləm tɔ ɓa d’aji ne
Mbata i unda dee dan kəmi’g.
5 Ǝi Ala, i lé to mbai ləm,
Maji kari un ndui mba kar njé’g lə Jakob d’ɔr ne dɔ dee kúla’g.
6 Mbɔl dɔi-i nja ɓa
Jeḛ j’ɔs ne njéba̰je lə sí rəw ləm,
Mbɔl dɔ rii nja ɓa
Jeḛ n’tal ne njékoma̰ sə síje lé naŋg ras-ras ləm tɔ.
7 Mbata m’ɔm məəm dɔ ɓandaŋg ləm el ləm,
Kiambas ləm kara a kajim el ləm tɔ.
8 Nɛ i nja ɓa ɔr sí ji njéba̰je’g lə sí ləm,
Deḛ gə́ d’ə̰ji sí bəḭ-bəḭ lé kara i ila rɔkul dɔ dee’g ləm tɔ.
9 Jeḛ lé ndɔje kára-kára lai jeḛ ndubaje rɔ sí kà gə ri Ala ləm,
J’a kɔsje gaji rii saar-saar gə no̰ ya ləm tɔ.
10 Lé bèe kara i ɔs sí ŋgərəŋ ɔm ne rɔkul dɔ sí’g ləm,
Loo-rɔje lə sí kara i ila gɔli sə sí keneŋ el ŋga ləm tɔ.
11 I ar sí n’rəm gə goo sí no̰ njéba̰je’g lə sí ləm,
Deḛ gə́ d’ə̰ji sí bəḭ-bəḭ lé ya kara d’unda sí banrɔ ləm tɔ.
12 I ya̰ sí to gə́ badje gə́ d’a gə tɔl dee sɔ dee bèe ləm,
I sané sí ne kad-kad mbuna ginkoji dəwje gə raŋg’g ləm tɔ.
13 I ndogo dəwje ləi gə lar gə́ əḭ el ləm,
I oo dee gə́ néje gə́ d’əḭ kəmi’g el ləm tɔ.
14 I ar sí n’tel to nérɔkul gə́ boo kəm njéboataɓeeje’g lə sí ləm,
Deḛ gə́ d’aḭ dɔ sí sub kara
I ar sí n’tel to nékunda-kogo gə nédəjindu lə dee ya ləm tɔ.
15 I ar sí n’tel to nékɔrsu lə ginkoji dəwje gə raŋg ləm,
Gə nétuga dɔ jəgm-jəgm mbuna koso-dəwje’g ləm tɔ.
16 Nérɔkul ləm lé to nɔm’g
Ar kəm sɔḭ dəb ne dɔm’g ta-ta
17 Loo gə́ m’oo ndu yeḛ gə́ njetajim kula ne sul dɔm’g ləm,
Loo gə́ m’oo kəm njeba̰ gə kəm njedalba̰ lé ləm tɔ.
18 Néje lai neelé teḛ dɔ sí’g lal kar meḛ sí wəi dɔi’g ləm,
Lal kar sí j’al ta ta manrɔ’g ləi ləm tɔ.
19 Meḛ sí ɔs səi ŋgwɔḭ el ləm,
Gɔl sí kara uba rəw ləi ya̰ gə goo ŋgalee el ləm tɔ
20 Gə mba kari tal sí ne naŋg ras-ras mee bwa-to tàlje’g ləm,
Gə mba kari ar ndil yoo dəb ne dɔ sí’g bigim ləm tɔ.
21 Ɓó lé j’ar meḛ sí wəi dɔ ri Ala’g lə sí
J’ula ne ji sí ndiŋ par gə́ rɔ magə gə́ d’ḭ ne raŋg ndá
22 See Ala gə́ njegər néje gə́ to loo-kiya’g meḛ dəwje’g lé
See yeḛ a kaskəm gər el wa.
23 Nɛ to mbata ləi-i nja ɓa
Deḛ goré ne gwɔs sí gə ndɔje kára-kára lai ləm,
D’oo sí ne gə́ badje gə́ d’aw sə dee gə́ loo-tɔl dee’g ləm tɔ .
24 Mbaidɔmbaije, maji kari ḭta.
See ban ɓa i toɓi wa.
Maji kari teḛ kəmi ɓó ɔs sí rəw saar gə no̰ el.
25 See ban ɓa i iya sə sí kəmi wa.
See ban ɓa i ar məəi wəi dɔ meeko̰’g lə sí gə kula kəmloondoo’g lə sí wa.
26 Mbata ŋgaw meḛ sí təd mán dan babur’g ləm,
Darɔ sí kara ula naŋg lururu ləm tɔ.
27 Maji kari ḭta gə mba la sə sí!
Maji kari ɔr dɔ sí kúla’g gə goo meemaji ləi.
© Ngambai Bible © Alliance Biblique du Tchad 1989, 2015.
