Ala ləm, see ban ɓa i ubam ya̰’m wa
1 Pakɔs lə Dabid gə́ ar bao-pa mba karee ɔs sə dee lé. D’ɔs gə ndu gwɔsee gə́ ria lə Duje-kai-mán-lə-daje.
2 Ala ləm! Ala ləm!
See ban ɓa i ubam ya̰’m wa.
See ban ɓa i unda rɔi rɔm’g ŋgərəŋ lal ree la səm ləm,
Lal koo ta ləm ləm tɔ wa .
3 Ala ləm! Ma m’no̰ wəl dan kàrá nɛ i tel ilam keneŋ el ləm,
Loondul’g kara m’oo loo kwa rɔm el ləm tɔ.
4 Lé bèe kara i to Njerɔkunda ya,
I si dan pa pidije’g lə Israɛlje.
5 Bɔ síje-je d’ɔm meḛ dee dɔi’g jəb-jəb,
D’ɔm meḛ dee dɔi’g ndá i ar dee d’ɔr dɔ dee kúla’g.
6 Deḛ no̰ gə́ rɔi’g ndá d’aji ne ləm,
Deḛ d’ɔm meḛ dee dɔi’g ndá kəm sɔḭ ɓar ri dee el ləm tɔ.
7 Ma lé m’to gə́ kuru ɓó m’to gə́ dəw el,
M’to nérɔkul lə dəwje ləm, koso-dəwje kara d’ḛjim bəḭ-bəḭ ləm tɔ.
8 Deḛ lai gə́ d’oom lé ndá d’ula sul dɔm’g,
Deḛ teḛ ta dee ləgəgə-ləgəgə ləm,
Deḛ tuga dɔ dee jəgm-jəgm dɔm’g ləm tɔ pana :
9 M’ɔm məəm dɔ Njesigənea̰’g,
Ndá maji kar Njesigənea̰ ajim,
Yeḛ a kilam tar mbata yeḛ ndigim yaa̰ .
10 Oiyo, i nja am m’unda loo mee kɔm’g m’teḛ,
I nja ilam ta mbà kɔm’g am m’isi keneŋ gə meekulɔm.
11 Un kudee mee ndəa gə́ m’to ne mee kɔm’g lé i aa dɔm ləm,
Un kudee mee ndəa gə́ d’ojim ne lé kara i to Ala ləm ya ləm tɔ.
12 Loo gə́ néurti ree pər gə́ rɔm’g,
Loo gə́ dəw kára kara ree mba la səm el lé ndá
Maji kari unda rɔi ŋgərəŋ səm el.
13 Njékoma̰ səmje gugu dɔm sub to gə́ bɔ maŋgje bèe ləm,
Deḛ d’aḭ dɔm sub asəna gə bɔ maŋgje gə́ Basan ləm tɔ.
14 Deḛ teḛ ta dee ləgəgə-ləgəgə dɔm’g
To gə́ toboḭ gə́ wa da inja miḭ dɔ’g hər-hər bèe.
15 Ma m’yəb yəb-yəb ləm,
Siŋgarɔmje lai tɔr to tar yɔg-yɔg ləma,
Ɓə̰gərəm léḛ məəm’g to gə́ ya̰-tə̰ji gə́ léḛ sələlə-sələlə bèe ləm tɔ.
16 Siŋgam tudu kurum-kurum to gə́ a̰ji bèe ləm,
Ndo̰m tia̰ kilm’g ndərəg-ndərəg ləm tɔ,
I telm gə́ nduji naŋg gə́ ka̰ yoo bèe.
17 Mbata bisije gugu dɔm sub ləm,
Kudu gayim-dəwje kara d’aḭ dɔm sub ləm tɔ,
Deḛ tɔs jimje gə gɔlmje mbudu kub-kub.
18 M’askəm tura siŋgarɔmje lai ya ləm,
Deḛ d’orè kəm dee dɔm’g ndəŋ d’oom ne gəl-gəl ləm tɔ .
19 Deḛ kai na̰ kubuje ləm,
Kubu ləm gə́ ŋgal yududu lé
Deḛ d’ɔs na̰ mbarè dɔ’g.
20 Ŋga i Njesigənea̰, maji kari unda rɔi ŋgərəŋ rɔm’g el.
I gə́ to siŋgam lé maji kari ɔs rɔi ɓad gə́ ree la səm.
21 Maji kari aḭ bada dɔm’g ar kiambas tibi mbɔrm el ləm,
Ɔrm ji siŋgamoŋ’d lə bisije neelé ləm tɔ.
22 Maji kari taam ta toboḭ’g ləm,
Maji kari wam gaji dadɔg’d wɔgədɔ ɔrm ləm tɔ.
23 M’a teḛ gə rii mbuna ŋgakɔmje’g ləm,
M’a pidii loo-kwa-dɔ-na̰’g lə koso-dəwje ləm tɔ .
24 Seḭ gə́ ɓəlje Njesigənea̰ lé
Maji kar sí pideeje!
Seḭ lai gə́ toje ŋgaka Jakob lé
Ulaje rɔnduba dəa’g!
Seḭ lai gə́ toje ŋgaka Israɛl lé
Ndəbje pəd-pəd nea̰’g tɔ.
25 Mbata nékəmndooje lə njenékəmndoo lé
Yeḛ oo gə́ kəm dɔbee əsé oo gə́ né gə́ to kḛji el,
Yeḛ iya səa kəmee el
Nɛ mbia to tag mba koo ne ndu no̰ ləa ya.
26 I a to gin pa pidije ləm loo-mbo̰-dɔ-na̰’g lə koso-dəwje,
M’a tɔl ne ta ndukun ləm bém kəm dee-deḛ gə́ ɓəli’g.
27 Njénékəmndooje d’a sɔ né karee as dee nag-nag ləm,
Deḛ gə́ ndolè goo Njesigənea̰ lé d’a pidee ne ləm tɔ.
Maji kar ŋgaw meḛ sí to kəmba saar-saar gə no̰!
28 Dəwje lai gə́ dɔ naŋg nee d’a kḛji dɔ Njesigənea̰’g ləm,
D’a tel kəm dee par gə́ rəa’g ləm tɔ,
Gel-bɔje lə ginkoji dəwje gə raŋg lai
D’a kunda barmba dəb kəm dee naŋg nɔḭ’g tɔ.
29 Mbata ko̰ɓee lé to ka̰ Njesigənea̰,
Yeḛ nja o̰ ɓee dɔ ginkoji dəwje gə raŋg’g.
30 Njésiŋgamoŋje lai gə́ dɔ naŋg nee
D’a sɔ né ləm, d’a kunda barmba dəb kəm dee naŋg nea̰’g ləm tɔ,
Dəwje lai gə́ d’a gə tel nduji naŋg lé
D’a rəm gə no̰ kəji dee yèm gə́ nea̰’g,
Deḛ gə́ d’askəm kisi kəmba saar-saar el lé.
31 Ŋgaka deeje d’a ra né karee,
D’a pata gə́ wɔji dɔ Mbaidɔmbaije kar njéboakojije lə na̰ gə́ goo dee’g.
32 Loo gə́ d’a ree ndá d’a kila mber meekarabasur ləa ləm,
D’a kila mber néreaje kar koso-dəwje gə́ d’a gə koji dee ɓəi ləm tɔ.
© Ngambai Bible © Alliance Biblique du Tchad 1989, 2015.
