Rɔko̰ lə Ejekias gə kɔr gə́ rɔko̰ ɔr dəa’g
Esa 38.1-8, 2SgI 32.241 Mee ndəa’g neelé Ejekias oso gə rɔko̰ gə́ as yoo. Njetegginta Esai, ŋgolə Amots aw rəa’g aw ulá pana: Njesigənea̰ pa togə́bè pana: Maji kari un ndui ar njémeekəije ləi mbata i a gə kwəi ya ɓó a gə si kəmba el.
2 Ejekias tel kəmee bir-bir gə́ gir tira’g ra tamaji gə́ nee ta Njesigənea̰’g pana: 3 Ǝi Njesigənea̰! ar məəi olé dɔm’g to gə́ ma m’njaa nɔḭ’g gə ŋgonkoji ləm, gə meekarabasur ləma, m’ra néje gə́ maji kəmi’g ya ləm tɔ!
Ndá Ejekias no̰ ɓugudu-ɓugudu gə mán-no̰ kəmee’g ya.
4 Esai unda loo mee kəi’g teḛ nɛ teḛ gadloo gə́ dana bab el ɓəi ndá Njesigənea̰ ulá taje nee togə́bè pana: 5 Maji kari tel aw ula Ejekias, mbai dɔ koso-dəwje ləm pana: Njesigənea̰, Ala lə bɔbije gə́ Dabid pa togə́bè pana: Ma m’oo tamaji ləi ya ləm, m’oo mán-no̰ gə́ to kəmi’g ya ləm tɔ, aa oo, m’a kari aji ya, ndɔ gə́ njekɔm’g munda ndá i a kaw mee kəi’g lə Njesigənea̰. 6 M’a kɔm ləbje ləi dɔ maree’g as dɔg-giree-mi. M’a kɔri-i ləm, gə ɓee-boo nee ləm tɔ ji mbai gə́ Asiri’g, m’a kaḭ bada dɔ ɓee’g nee mbata rim-ma ləm, gə mbata lə gelgodo lə kura ləm Dabid ləm tɔ.
7 Esai pana: Unje kandə kodé ɔsje ilaje ta doo’g ndá deḛ ra bèe ya tɔ. Togə́bè ɓa Ejekias aji ne.
8 Ejekias dəji Esai pana: See ɗi ɓa a tɔjim karm m’gər ne to gə́ Njesigənea̰ a kajim kar ndɔ gə́ njekɔm’g munda ndá m’a kaw ne kəi lə Njesigənea̰ lé wa.
9 Bèe ɓa Esai pana: Aa oo, né gə́ a kḭ rɔ Njesigənea̰’g mba tɔjii kari gər to gə́ Njesigənea̰ a kar taje gə́ yeḛ pa lé aw lée’g béréré lé ɓa nee: See ndil kag gə́ ka̰ kwɔji né kàr lé a kaw kédé as loo dɔg, əsé a rəm gogo as loo dɔg wa.
10 Ejekias tel ilá keneŋ pana: Kar ndil kag lé aw kédé as loo dɔg to né gə́ lam ba, nɛ maji karee rəm gə́ gogo ɓa as loo dɔg.
11 Togə́bè ɓa Esai, njetegginta dəji Njesigənea̰ mba karee rəm gə ndil kag lé as loo dɔg dɔ nékwɔji kàr gə́ to gə́ ka̰ Akas bèe.
Ejekias wa njékaḭkulaje gə́ Babilɔn gə́ rəa’g
Esa 3912 Mee ndəa’g neelé Berodak-Baladan, ŋgolə Baladan, mbai gə́ Babilɔn ula gə maktub gə nénoji ar Ejekias, mbata yeḛ oo ta rɔko̰ lə Ejekias lé. 13 Ejekias wa njékaḭkulaje lé gə́ rəa’g gə meendakaḭ ndá yeḛ tɔji dee ne loo néje lai gə́ gad dee to yaa̰ gə́ to larnda gə larlɔr ləm, gə ubu gə́ gadee yaa̰ ləm, gə loo-ŋgəm-nérɔje ləa ləma, gə néje lai gə́ to mee kəi-nébaoje’g ləa ləm tɔ, né gə́ yeḛ lal tɔji dee mee kəi’g ləa əsé mee ɓeeko̰’g ləa lé godo.
14 Gée’g gogo Esai, njetegginta ree rɔ mbai Ejekias’g dəjee pana: See ta ɗi ɓa dəwje nee ree d’ulai wa. See deḛ d’ḭ ra ɓa ree rɔi’g wa.
Ejekias tel ilá keneŋ pana: Deḛ d’ḭ ɓee gə́ əw gə́ Babilɔn.
15 Esai dəjee tɔɓəi pana: See ɗije ɓa d’oo mee kəi’g ləi wa.
Ejekias tel ilá keneŋ pana: Néje lai gə́ to mee kəi’g ləm lé deḛ d’oo ya: né kára kara gə́ mee kəi-nébaoje’g ləm gə́ lal kam m’tɔji dee lé godo.
16 Togə́bè ɓa Esai ula Ejekias pana: Maji kari oo ta lə Njesigənea̰! 17 Aa oo, néje lai gə́ to mee kəi’g ləi gə́ to néje gə́ bɔbije-je mbo̰ dee saar teḛ ɓogənè lé mee ndəaje gə́ d’a gə ree lé d’a kodo néje neelé lai kaw ne Babilɔn, né kára kara a nai el, Njesigənea̰ ɓa pa bèe . 18 D’a kwa ŋganije gə́ na̰je gə́ d’ḭ məəi’d gə́ i oji dee lé mba kaw tel dee gə́ njekujije kar dee to njékaa dɔ néje mee kəi’g lə mbai gə́ Babilɔn ya .
19 Ejekias tel ila Esai keneŋ pana: Ta lə Njesigənea̰ gə́ i pa lé maji ya.
Tɔɓəi yeḛ dəji ta gə́ raŋg ɓəi pana: See meekulɔm gə kisi-maji d’a to ndɔ si kəmba’g ləm el wa.
20 Ges sorta néraje lə Ejekias gə nésiŋgamoŋje lai gə́ yeḛ ra gə duu-mán gə bwa kəm-rəw-mán gə́ ar mán aw ne mee ɓee-boo’g, yee neelé ndaŋg taree mee Maktub-sorta néraje’g lə mbaije gə́ Juda el wa. 21 Ejekias wəi ndá ŋgonee gə́ Manasə ɓa o̰ ɓee toree’g tɔ.
© Ngambai Bible © Alliance Biblique du Tchad 1989, 2015.
