Ndukun gə́ wɔji dɔ maji lə Jibje lé
1 Mee ndəa’g neelé ya, mbai Asuerus taa kəi lə Aman gə́ to njeba̰ lə Jibje lé ar dené ləa Este lé. Ndá Mardose ree aar no̰ mbai’g mbata Este pa to gə́ Mardose to gə́ ginkoji ləa ya. 2 Mbai lé ɔr ŋgama ləa gə́ yeḛ taa ji Aman’g ndá ar Mardose tɔ, Este kara unda Mardose gə́ mbai dɔ kəi lə Aman tɔ.
3 Tɔɓəi Este pata gə́ raŋg no̰ mbai’g ya ɓəi. Yeḛ oso naŋg neaŋ gel gɔlee’g no̰ ra ndòo rəa’g mba karee ɔg némeeyèrje lə Aman, dəw gə́ Agag ləm, gə kwɔji gə́ yeḛ wɔji mba koma̰ gə Jibje lé ləm tɔ. 4 Mbai ula kag-mbai ləa gə́ ra gə larlɔr ar Este ndá Este ḭ aar tar nea̰’g tɔ. 5 Yeḛ pa tɔɓəi pana: Ɓó lé mbai oo gə́ né gə́ maji kəm ra ləm, ɓó lé m’taa kəm mbai rəgm ləm, ɓó lé to né gə́ a maji ləma, ɓó lé m’to maji kəm mbai’g ləm tɔ ndá maji kar dee ndaŋg maktub tuji ne ta gə́ Aman, ŋgolə Hamedata wɔji mée’g ar dee ndaŋg mba tuji ne Jibje lai gə́ d’isi dəb ɓeeko̰je’g lə mbai lé ɓa. 6 Mbata m’a si koo nékəmndoo gə́ a teḛ dɔ dəwje’g ləm bèe to gə́ ban wa. Esé m’a koo ginkoji ləm gə́ a gə tuji lé bèe ya to gə́ ban wa.
7 Mbai Asuerus ula dené ləa Este gə Mardose gə́ to Jip lé ta pana: Aa oo, m’ar Este kəi lə Aman ləm, m’ar dee ɗaree dɔ kag’d ləm tɔ mbata yeḛ aw gə Jibje gə ta. 8 Maji kar sí-seḭ ya ndaŋgje ta gə ri mbai gə mbata maji lə Jibje to gə́ meḛ sí ndigi ndá maji kar sí ɔsje nétorji mbai dɔ’g tɔ. Mbata taje lai gə́ ndaŋg gə ri mbai ləm, gə d’ɔs nétorji mbai keneŋ ləm tɔ lé to njaŋg ɓó m’askəm tujee el ŋga.
9 Mee ndəa’g neelé deḛ ɓar njéndaŋ-maktubje lə mbaije mee ndɔ gə́ njekɔm’g rɔ-joo-giree-munda’g lə naḭ gə́ njekɔm’g munda gə́ to naḭ Siban ndá deḛ ndaŋg maktub lé gə goo ndukun lə Mardose d’ar Jibje ləm, d’ar njékaa dɔ dəb ɓeeko̰je ləm, d’ar njéguburuɓeeje ləma, d’ar deḛ gə́ to mbai dɔ dəb ɓeeko̰je gə́ tɔl-dəa-rɔ-joo-giree-siri (127) gə́ un kudee Inde saar teḛ Etiopi ləm tɔ. Ar dəb ɓeeko̰ gə́ rara kara iŋga maktub gə goo rəw ndaŋg maktub ləa ləm, ar koso-dəwje gə́ rara kara gə goo takɔji dee ləma, ar Jibje kara gə goo rəw ndaŋg maktub lə dee gə goo takɔji dee ləm tɔ. 10 Deḛ ndaŋg maktub lé gə ri mbai Asuerus ndá d’ɔs nétorji mbai keneŋ. Maktubje lé d’ar njékaḭkulaje d’aw ne gə kundaje ləm, gə kundaje-mulayḛ̀jeje ləm gə́ kundaje ɓa d’oji dee ləm tɔ. 11 Mee maktubje’g neelé deḛ ndaŋg ta keneŋ pana: Mbai ya̰ rəw ar Jibje mee ɓee-booje gə́ rara kara mba kar dee mbo̰ dɔ na̰ gə mba kaa ne dɔ rɔ dee, gə mba kar dəwje gə́ rara əsé deḛ gə́ d’ḭ dəb ɓeeko̰ gə́ rara gə́ d’a ree mba rɔ sə dee lé deḛ d’a tuji dee ləm, d’a tɔl dee ləma, d’a kar dee d’udu guduru gə ŋgan deeje gə denéje lə dee na̰’d ləma, d’a kunda némajije lə dee banrɔ ləm tɔ. 12 Né neelé wɔji dɔ ndɔ kára ba ya mee dəb ɓeeko̰je lai gə́ to ka̰ mbai Asuerus, to ndɔ gə́ njekɔm’g dɔg-giree-munda mee naḭ gə́ njekɔm’g dɔg-giree-joo gə́ to naḭ Adar lé. 13 Maktubje neelé deḛ ndaŋg ndukun keneŋ mba kar dee d’ila mberee mee dəb ɓeeko̰je’g kára kára lai mba kula ne dəwje lai kar dee d’oo to gə́ Jibje d’wa dɔ gɔl rɔ dee d’isi pèrèrè gə mba dal ba̰ gə njéba̰je lə dee mee ndəa gə́ d’wɔji lé. 14 Léegəneeya njékaḭkulaje lé d’uba kundaje gə kundaje-mulayḛ̀jeje d’aw kalaŋ gə goo ndukun lə mbai lé tɔ. Ndukun neelé d’ila mberee mee ɓeeko̰’g Susə ya.
15 Mardose unda loo kəi lə mbai teḛ gə kubu-mbai gə́ ndul ɗigi gə ndá kələw-kələw ləm, gə dɔgugu gə́ boi gə́ ra gə larlɔr dəa’g ləma, gə kubu gə́ boi yul gə́ d’ṵji gə kúla palégal gə́ ndul piro-piro ləm tɔ. Dəwje gə́ ɓee-boo gə́ Susə lé d’ɔr ndu dee gə́ tar wəl gə rɔlel d’al ne rɔ dee tɔ. 16 Mbuna Jibje’g kara si maji gə rɔlel gə boo-rɔkal ɓa to keneŋ tɔ. 17 Mee dəb ɓeeko̰je kára kára lai ləm, gə mee ɓee-booje kára kára lai ləm tɔ lé loo gə́ d’ila mber ndukun lə mbai keneŋ ndá loo gə́ mbuna Jibje’g lé rɔlel gə boo-rɔkal gə ra muru-gad gə ra naḭje ɓa to keneŋ ya. Tɔɓəi dəwje bula mbuna koso-dəwje gə́ mee ɓee’g tel rɔ dee gə́ Jibje mbata ɓəl gə́ deḛ ɓəl Jibje lé ɓa unda dee badə gaŋg dee tɔ.
© Ngambai Bible © Alliance Biblique du Tchad 1989, 2015.
