Moyis deḛ gə Aaro̰ d’aar no̰ Parao̰’g
1 Gée gə́ gogo Moyis deḛ gə Aaro̰ d’aw rɔ Parao̰’g d’aw d’ulá pana: Njesigənea̰ Ala lə Israɛlje lé pa bèe pana: Ya̰ dəwje lə neḛ ar dee d’aw dɔdilaloo’g mba ra naḭ gə́ wɔji dɔ neḛ. 2 Parao̰ ila dee keneŋ pana: See Njesigənea̰ to gə́ na̰ ɓa m’a kila ŋgonkoji dɔ tapea’g mba kya̰ ne Israɛlje kar dee d’aw wa. Njesigənea̰ lé ma m’gəree el ləm, m’a kya̰ Israɛlje kar dee d’aw bèe el ləm tɔ.
3 Deḛ pana: Ala lə Ǝbrəje lé teḛ dɔ sí’g ya. Maji kari un ndui ar sí j’aw dɔdilaloo’g as ndɔ sí munda gə́ mba kinja nékinjanéməsje kar Njesigənea̰ nà banelə yeḛ a tuji sí gə yoo-koso əsé gə kiambas ya. 4 Nɛ mbai gə́ Ejiptə lé ula dee pana: Moyis, seḭ gə Aaro̰ lé, see ban ɓa arje dəwje d’un kəm dee rəw dɔ kula’g lə dee wa. Tel awje loo-kula’g lə sí. 5 Parao̰ pana: Aa ooje, ɓasinè koso-dəwje neelé bula yaa̰ mee ɓee’g nee ya, nɛ see ban ɓa seḭ ɔg deeje dɔ kulaje’g lə dee wa.
Parao̰ ɔm kula dɔ maree’g gə́ kédé-kédé ar Israɛlje
6 Mee ndəa’g neelé ya Parao̰ un ndia ar njétə̰kulaje lə dəwje ləm, gə njékaa dɔ deeje ləm tɔ pana: 7 Seḭ a karje dəwje neelé mu d’ɔr ne bɔrɔ to gə́ ar deeje ne kédé lé el ŋga, maji kar dee-deḛ ya d’aw gə rɔ dee d’aw d’wa mu. 8 Nɛ lé togə́bè kara seḭ a kwɔjije sə dee bula lə bɔrɔ gə́ d’a kɔr to gə́ kédé ya ɓó seḭ a rəmje gə gée yɔgɔ kar deeje el, mbata deḛ to njérɔkasje ya, gelee gə́ nee ɓa deḛ no̰ ne pana: Ar sí j’awje j’aw j’injaje nékinjanéməsje j’arje Ala lə sí. 9 Maji kɔm kula gə́ wɔi dɔ maree’g dɔ dəwje’g neelé mba kar dee ra, bèe ɓa d’a kur mbi dee mba koo ne taŋgɔmje el ŋga.
Parao̰ ar dee d’ɔm kula gə́ wɔi dɔ Israɛlje’g
10 Njétə̰kulaje lə dəwje ləm, gə njékaa dɔ deeje ləm tɔ lé ree d’ula dəwje pana: Parao̰ pa bèe pana: N’a kar sí mu el ŋga. 11 Seḭ nja awje loo gə́ rara gə́ seḭ a kiŋgaje mu keneŋ ŋga, nɛ kula lə sí ya kara d’a rəm gə gée yɔgɔ kar sí el.
12 Dəwje neelé sanéna̰ gə loo-loo mee ɓee gə́ Ejiptə mba kwa ləm muje ŋga ɓa tor mu’g. 13 Njétə̰kulaje lé d’aw sə dee rèm-rèm pana: Raje kula gə́ gaŋg dɔ sí’g lé areeje godo, a godo bèe ya gə ndɔje kára-kára lai, to gə́ kédé mu to nee lé ya tɔ. 14 Njékaa dɔ Israɛlje gə́ njétə̰kulaje lə Parao̰ d’ɔr dee d’unda dee dɔ dee’g lé kara kunda dee mbugu-mbugu to pana: See ban ɓa tagə́nè ləm, gə ɓogənè ləm tɔ lé seḭ ɔrje bɔrɔ bula to gə́ gaŋg dɔ sí’g kédé njaŋg lé el wa.
15 Njékaa dɔ Israɛlje d’aw rɔ Parao̰’g no̰ dəa’g pana: See ban ɓa i ra gə kuraje ləi né gə́ togə́bè wa. 16 Deḛ d’ar kuraje ləi mu el nɛ kula ɓa d’ula sí pana: J’ɔr bɔrɔ. Tɔɓəi deḛ kunda kuraje ləi asəna gə dəwje ləi gə́ ta wa dɔ dee bèe.
17 Parao̰ ila dee keneŋ pana: Seḭ toje njérɔkasje gə́ to njédabje ya! Gelee gə́ nee ɓa seḭ pajena: Ar sí j’awje j’aw j’injaje nékinjanéməsje j’arje Njesigənea̰. 18 Ɓasinè, ɔdje aw raje kula lé, d’a kar sí mu pai el ŋga, nɛ seḭ a kɔrje bɔrɔ bula to gə́ kédé lé bèe ya.
19 Njékaa dɔ Israɛlje d’oo to gə́ d’ula kəm dee ndòo gə́ kula ya mbata d’ula dee pana: Seḭ a rəmje gə goo bɔrɔ kɔr sí lé gogo yɔgɔ el, ndɔje kára-kára lai lé kula gə́ gaŋg wɔji dəa lé a to njaŋg ya. 20 Loo gə́ d’ḭ kəi lə Parao̰ d’unda loo teḛ ndá deḛ d’iŋga Moyis gə Aaro̰ gə́ d’aar ŋgina dee tɔ. 21 Deḛ d’ula dee pana: Maji kar Njesigənea̰ orè kəmee dɔ sí’g ləm, maji karee ɔr kəm taree ləm tɔ! Seḭ ya ɓa tel síje gə́ né gə́ to kḛji kəm Parao̰’g ləm, gə kəm kuraje’g ləa ləm tɔ, to seḭ ya ɓa ulaje kiambas ji dee’g mba kar dee tuji sí ne ya.
22 Moyis tel aw rɔ Njesigənea̰’g dəjee pana: Mbaidɔmbaije, see ban ɓa i ra gə dəwje neelé né gə́ majel togə́bè wa. See ban ɓa i ulam rɔ dee’g wa. 23 Un kudee mee ndəa gə́ ma m’aw rɔ Parao̰’g mba pata gə rii lé ndá yeḛ ra gə dəwje neelé majel ya nɛ i ɔm dəwje ləi tar el ɓəi tɔ.
© Ngambai Bible © Alliance Biblique du Tchad 1989, 2015.
