Ndɔ lə mbai gə́ njera né gə́ gə dɔ najee lé
1 Tɔɓəi barkəmrɔ Isai a kidi dɔ jigee’g ləm,
Barkəmee a tuba dɔ ŋgiraje’g ləm tɔ .
2 Ndil Njesigənea̰ a nai səa:
Ndil gə́ ka̰ kəmkàr gə ka̰ gosonégər ləm,
Ndil gə́ ka̰ kwɔji ta kəmkàr gə ka̰ siŋgamoŋ ləma,
Gə ndil gə́ ka̰ gər Njesigənea̰ ɓəlee ne ləm tɔ.
3 Rɔlel ɓəl Njesigənea̰ a taa mée pəl-pəl,
Yeḛ a gaŋg rəwta gə goo maji lə dəw gə́ raga ba el ləm,
Yeḛ a kɔr kəmta gə goo ta gə́ oso mbia’g ba el ləm tɔ.
4 Nɛ yeḛ a gaŋg rəwta lə njéndooje lé gə goo rəw gə́ danasur ləm,
Yeḛ a kɔr kəmta lə njénékəmndooje gə́ naŋg nee gə goo rəbee ləm,
Tapea gə́ to asəna gə kag-tɔs lé
Yeḛ a kunda ne naŋg nee ləma,
Lel təa gə́ a tó pu lé a kar njemeeyèr wəi ne ləm tɔ .
5 Néra gə́ gə dɔ najee gə ŋgonkoji lé
A to gə́ ndar gə́ yeḛ wa ne ɓəree .
6 Jagmjər dee gə ŋgon badə d’a kaar na̰’d ləm,
Kàg dee gə ŋgon bya̰ d’a to na̰’d ləma,
Bɔ maŋg dee gə ŋgon toboḭ gə nékulje gə́ d’ul dee lé d’a kaar na̰’d ləm tɔ,
Ndá ŋgon gə́ lam ba ya a kɔn dee tɔ .
7 Ko̰ maŋg dee gə ko̰ da-urs d’a kaar loo-sɔ-né’g na̰’d ləm,
Ŋgan deeje kara d’a to na̰’d loo kára ba ləm tɔ
Ndá toboḭ a ko̰ mu to gə́ bɔ maŋg bèe.
8 Ŋgon gə́ ta mbà’g a ndam ta bwa li-meewai’g ləm,
Ŋgon gə́ mbad mbà a kula jia mee bwa li-ŋgɔrŋgo̰d’g ləm tɔ.
9 Dɔ mbal’g ləm gə́ to gə kəmee bura lé
Dəwje d’a ra né gə́ majel əsé d’a tuji né keneŋ el
Mbata gər Njesigənea̰ a taa dɔ naŋg nee pəl-pəl
Asəna gə mán gə́ ɔn dɔ ŋguru baa-boo-kad gə́ bər lé bèe .
10 Mee ndəa’g neelé barkəmrɔ Isai
A kaar keneŋ asəna gə nétɔji mbata lə koso-dəwje,
Ginkoji dəwje gə raŋg d’a tel kəm dee gə́ rəa’g
Ndá rɔnduba ɓa a taa loo-siée pəl-pəl ya .
Kḭ ɓee-ɓər’g tel
11 Mee ndəa’g neelé ya Mbaidɔmbaije a kun jia tar gɔl kára ya ɓəi
Mba taa ne dɔ ges koso-dəwje gə́ nai lé gogo,
Deḛ gə́ sanéna̰ mee ɓee gə́ Asiri, gə Ejiptə,
Gə Patros, gə Etiopi,
Gə Elam, gə Sineyar, gə Amat,
Gə dɔgoré-looje gə́ dan baa-boo-kad’g tɔ.
12 Yeḛ a kun nétɔji gə́ tar kar ginkoji dəwje gə raŋg neelé d’oo
To gə́ yeḛ a gə mbo̰ Israɛlje gə́ d’wa dee gə́ ɓər lé ləm,
Yeḛ a mbo̰ Judaje gə́ sanéna̰ ləm tɔ
Kar dee d’ḭ dɔ kum naŋg gə́ sɔ lé tel ree.
13 Kəmkəḭ lə Eprayimje a godo ləm,
Njéba̰je lə dee gə́ d’isi Juda lé
D’a tuji pugudu-pugudu ləm tɔ,
Eprayimje d’a ra kəmkəḭ dɔ Judaje’g el ŋga ləm,
Judaje kara d’a to njéba̰je lə Eprayimje el ŋga ləm tɔ.
14 D’a tel buŋga na̰ dɔ Pilistije gə́ d’isi dɔdərlooje’g ləm,
D’a kunda deḛ gə́ d’isi bər banrɔ taa néje lə dee ləm,
Edɔmje gə Moabje d’a to nékwa peb gə ji deeje ləma,
Amo̰je kara d’a kula dɔ dee no̰ dee’g ləm tɔ.
15 Njesigənea̰ a kar duu-mán lə baa-boo-kad gə́ Ejiptə yi tə ləm,
Yeḛ a kula jia ndiŋ dɔ baa’g tó lel dɔ’g gə siŋgamoŋ ləm tɔ,
Ndá yeḛ a kai kəm rəbeeje loo siri
Kar dəwje dəs keneŋ gə né gɔl dee’g .
16 Bèe ɓa rəw a to keneŋ mbata ges koso-dəwje ləa gə́ nai
Gə́ teḛ ji Asirije’g
To gə́ rəw to keneŋ kédé gə́ ləw mbata lə Israɛlje
Mee ndəa gə́ deḛ d’unda ne loo mee ɓee gə́ Ejiptə teḛ lé tɔ.
© Ngambai Bible © Alliance Biblique du Tchad 1989, 2015.
