Ndərta gə́ wɔji dɔ ɓee gə́ Damas gə dɔ ɓee gə́ Israɛl
1 Ndərta gə́ pa wɔji dɔ ɓee gə́ Damas.
Aa oo, Damas a to ɓee-boo el ŋga,
Yee a tel to loo gə́ tuji bèe .
2 D’a kuba ɓee-booje gə́ Aroer kya̰ dee
Kar dee tel to loo-kaar koso-nékulje,
D’a to keneŋ ndá
Dəw kára kara gə́ njera dee kar dee ɓəl lé a godo.
3 Kəi-kaar-kɔgərɔ lə ɓee gə́ Eprayim a godo ləm,
Ɓeeko̰ gə́ Damas gə ges Aramje d’a godo ləm tɔ.
A to asəna kára ba gə rɔnduba lə Israɛlje bèe.
Njesigənea̰ gə́ njeboo-néje ɓa pa bèe.
4 Mee ndəa’g neelé rɔnduba lə Jakob a tel keḭ el ləm,
Dakasrea gə́ ər ndɔl-ndɔl lé a tel kəŋ kəŋ-kəŋ ləm tɔ.
5 A to kasəna gə loo gə́ njekinjako inja ne koje
Ar jia inja dɔ koje ləm,
Asəna gə loo gə́ deḛ d’ɔs kó dɔ na̰’d mee wəl-loo gə́ Repayim ləm tɔ.
6 Ges kandə kag a nai ya
To gə́ loo gə́ dəw yə ne kag-koiyo bèe
Ar kandə koiyoje nai joo əsé munda sémee’g tar ləm,
Nai sɔ əsé mi dɔ barkəmeeje gə́ d’andə’g lé ləm tɔ.
Njesigənea̰ gə́ njeboo-néje ɓa pa bèe.
7 Mee ndəa’g neelé dəw a tel kəmee par gə́ rɔ njekṵdá’g, a turu kəmee gə́ dɔ Njerɔkunda’g lə Israɛlje, 8 yeḛ a tel kəmee gə́ dɔ loo-nékinjanéməsje gə́ to né gə́ jia ɓa ra dee lé el ŋga ləm, yeḛ a kaa néje gə́ ŋgan jia ɓa ra dee gə́ to magə-Astarté gə néndajije gə́ wɔji dɔ kàr lé el ŋga ləm tɔ.
9 Mee ndəa’g neelé ɓee-booje ləa gə́ siŋga dee to kédé lé d’a tel to asəna gə né gə́ tuji mee kag-kɔr’g əsé dɔ sém mbal gə́ d’uba d’ya̰ no̰ Israɛlje’g bèe ndá a tel to gə́ dɔ nduba.
10 Mbata seḭ Israɛlje, seḭ arje meḛ sí wəi
Dɔ Ala gə́ njekaji sí’g ləm,
Seḭ arje meḛ sí olé
Dɔ kɔr mbal gə́ to njo̰loo-kula-dɔ sí’g el ləm tɔ.
Togə́bè seḭ dubuje né
Gə́ to rɔlel lə sí ləm,
Seḭ ma̰aje kag-nduúje
Gə́ d’ḭ ne dɔ ɓee’g ləm tɔ.
11 Loo gə́ seḭ ma̰a deeje lé ndá
Seḭ ulaje ŋgalaŋ siŋ-siŋ keneŋ ləm,
Teḛ gə ndɔ ndá
Né gə́ seḭ manje lé pudu bən ləm tɔ.
Nɛ ka̰dee godo mee ndəa gə́ kəm kiŋga rɔlel keneŋ lé ya
Ndá to némeeko̰ gə́ kuma̰ gə́ wɔji dəa godo.
Ndu koso-dəwje gə́ ɓar
12 Ǝi! kaa ndu koso-dəwje gə́ ɓar!
Kaa ndu dee ɓar asəna
Gə kaa baa-boo-kad gə́ ɓar bèe.
Kaw dɔ na̰ pum-pum lə ginkoji dəwje gə raŋg lé
Ɓar asəna gə manje gə́ d’ula gə siŋga dee bèe tɔ.
13 Ndu ginkoji dəwje gə raŋg ɓar
Asəna gə kaa manje gə́ ula u-u-u bèe.
Njesigənea̰ ndaŋg dee sané dee
Ndá d’aḭ d’aw əw
Asəna gə ləm mu gə́ to dɔ mbalje’g
Gə́ lel odo aw ne ləm,
Asəna gə pudu kunje
Gə́ lel-mal ɓir dee bèe ləm tɔ.
14 Loo gə́ kàrkemetag ndá aa ooje, ɓəl-boo wa dee,
Kédé ɓa gə mba kar loo àr ɓəi lé
Deḛ godo ŋga!
Yee ɓa to gə́ nékoga-dɔ-ji dee-deḛ
Gə́ to njétuji néje lə sí ləm,
Gə né ka̰ dee-deḛ
Gə́ to njéɓogo síje lé ləm tɔ.
© Ngambai Bible © Alliance Biblique du Tchad 1989, 2015.
