Abijam, mbai gə́ Juda
2SgI 13.1-32SgI 22-231 Ləb ko̰ɓee lə Jeroboam, ŋgolə Nebat gə́ njekɔm’g dɔg-giree-jinaijoo ɓa Abijam tel to ne mbai gə́ Juda ya. 2 Yeḛ si Jerusalem o̰ ne ɓee as ləbee munda. Ri kea̰je lə Maaka, ŋgolə Abisalɔm. 3 Yeḛ ya̰ rəa yag dan kaiyaje lai gə́ bɔbeeje ra kédé nea̰’g lé ndá yeḛ ar mée gə́ tḛ́ bèe ya kara to dɔ Njesigənea̰, Ala’g lé ləa to gə́ keaje Dabid bèe el. 4 Nɛ mbɔl dɔ Dabid lé ɓa Njesigənea̰ Ala ləa aree ne néndogó kára mee ɓee gə́ Jerusalem, yee ɓa yeḛ unda ne ŋgonee toree’g ləm, ar Jerusalem to ne njaŋg ləm tɔ . 5 Mbata Dabid ra né gə́ danasur kəm Njesigənea̰’g loo gə́ yeḛ si ne gə kəmə ɓəi lé, godnduje lai lé yeḛ un kára kara telee raŋg el nɛ ta gə́ wɔji dɔ Uri, dəw gə́ Het lé ɓa .
6 Rɔ to mbuna Roboam gə Jeroboam’g ta-ta, loo gə́ Roboam si ne kəmba ɓəi lé.
7 Ges sor-néraje lə Abijam ləm, gə néje lai gə́ yeḛ ra ləm tɔ lé see ndaŋg taree mee Maktub-sorta néraje’g lə mbaije gə́ Juda el wa. Rɔ to mbuna Abijam gə Jeroboam’g ya. 8 Abijam wəi ndá deḛ dubee mee ɓee-boo’g lə Dabid. Ndá ŋgonee Asa ɓa o̰ ɓee toree’g tɔ.
Asa, mbai gə́ Juda
2SgI 14.1-2, 2SgI 15.16-19, 2SgI 16.1-62SgI 11-149 Ləb ko̰ɓee lə Jeroboam, mbai gə́ Israɛl gə́ njekɔm’g rɔ-joo lé ɓa Asa tel to ne mbai gə́ Juda ya. 10 Yeḛ si Jerusalem o̰ ne ɓee as ləbee rɔ-sɔ-giree-kára. Maaka, ŋgolə Abisalɔm gə́ dené ɓa to kea̰je tɔ. 11 Asa ra né gə́ danasur kəm Njesigənea̰’g to gə́ keaje gə́ Dabid ra bèe. 12 Yeḛ tuba kaiya-dəwje gə́ mee ɓee’g neelé ləm, yeḛ sané magəje lai-lai gə́ bɔbeeje-je ra lé ar dee godo ləm tɔ. 13 Maaka gə́ to kea̰je ya kara yeḛ ɔr rɔnduba gə́ wɔji dɔ mbai gə́ dené dəa’g mbata yeḛ ra magə-Astarté. Asa kunda magə neelé təd ləm, yeḛ aw roo mbɔr kəm-rəw-mán’d gə́ Sedro̰ ləm tɔ. 14 Nɛ lé mée to kára ba sur dɔ Njesigənea̰’g loo gə́ yeḛ si ne kəmba ɓəi kara yeḛ ar dɔ looje gə́ ndəw lé godo el. 15 Yeḛ ar dee ree gə néje gə́ bɔbeeje unda dee gə kəmee ləm, yeḛ nja kara unda dee gə kəmee ləm tɔ ɔm dee mee kəi’g lə Njesigənea̰: larnda ləm, gə larlɔr ləma, gə nékulaje ləm tɔ.
16 Loo gə́ d’isi ne kəmba ɓəi lé rɔ to mbuna Asa gə Basa’g, mbai gə́ Israɛl ya. 17 Basa, mbai gə́ Israɛl ɔr rɔ aw rɔ gə Judaje ndá yeḛ tum gin ɓee gə́ Rama mba kɔg ne njé’g lə Asa, mbai gə́ Juda loo teḛ raga ləm, gə loo tel kəi ləm tɔ. 18 Asa odo larnda gə larlɔr lai gə́ nai mee kəi-nébao’g lə Njesigənea̰ ləm, gə nébaoje gə́ to mee kəi’g lə mbai ləm tɔ ndá yeḛ ɔm ji kuraje’g ləa ɓa yeḛ ula dee ne rɔ Ben-Adad, ŋgolə Tabrimon, gə́ to ŋgolə Hesjo̰, mbai gə́ Siri gə́ si Damas lé. Mbai Asa ar dee d’ulá pana: 19 Maji kar sí manje rɔ sí j’ar na̰ mba kɔm na̰’d sad to gə́ bɔmje gə bɔbije man ne rɔ dee d’ar na̰ bèe tɔ. Aa oo, m’ula gə nénoji gə́ to larnda gə larlɔr neelé m’ari. Maji kari aw tuji ne ta manrɔ lə sí-seḭ gə Basa, mbai gə́ Israɛl mba karee ɔr rəa rɔm’g gə́ gogo. 20 Ben-Adad ndigi ta lə mbai Asa lé ya tɔ ndá, yeḛ ula ɓé-njérɔje ləa mba kar dee d’aw rɔ gə ɓee-booje gə́ Israɛl ndá yeḛ dum dɔ Ijo̰, gə Dan, gə Abel-Bet-Maaka ləm, gə ɓeeje gə́ Kineret lai ləma, gə ɓeeje gə́ Neptali lai ləm tɔ. 21 Loo gə́ Basa oo taree ndá yeḛ əw rəa tum gin Rama ndá, yeḛ tel si Tirsa tɔ. 22 Mbai Asa ɓar Judaje lai ya̰ dəw kára kara el, ar dee d’odo mbalje gə kagje gə́ Basa wa dɔ gɔlee gə mba tum ne gin Rama lé, bèe ɓa mbai Asa tum ne gin Geba gə́ Bḛjami ləm, gə Mispa ləm tɔ.
23 Ges sor-néraje lai gə́ Asa ra ləm, gə siŋgamoŋje gə néje lai gə́ yeḛ ra ləma, gə ɓee-booje lai gə́ yeḛ unda dee ləm tɔ lé see deḛ ndaŋg taree mee Maktub-sorta néraje’g lə mbaije gə́ Juda el wa. Lée togə́bè kara ləb ɓuga’g ləa lé rɔko̰ ra gɔleeje tɔ. 24 Asa wəi ndá deḛ dubee dɔɓar bɔbeeje-je’g mee ɓee-boo’g lə keaje Dabid. Yen ɓa ŋgonee gə́ Josapat o̰ ɓee toree’g ɓəi.
Nadab, mbai gə́ Israɛl
25 Nadab, ŋgolə Jeroboam un kudu ko̰ɓee gə́ Israɛl mee ləb ko̰ɓee’g lə Asa, mbai gə́ Juda gə́ njekɔm’g joo. Yeḛ o̰ Israɛlje as ləbee joo. 26 Yeḛ ra né gə́ majel kəm Njesigənea̰’g, yeḛ un dɔ gɔl bɔbeeje ya̰ ne rəa yag dan kaiya gə́ bɔbeeje ar Israɛlje ra tɔ. 27 Beasa, ŋgolə Aija gə́ to ginkoji Isakarje lé ula njuma̰ meḛ mareeje’g oma̰ ne səa ndá Basa tɔlee mee ɓee gə́ Gibeto̰ gə́ to ɓee lə Pilistije mee ndəa gə́ Nadab gə Israɛlje lai d’aḭ ne dɔ ɓee gə́ Gibeto̰ sub gə rɔ lé tɔ. 28 Basa tɔlee mee ləb gə́ njekɔm’g munda gə́ mbai Asa o̰ ne Juda lé ndá yeḛ o̰ ɓee toree’g. 29 Loo gə́ yeḛ tel to mbai mba̰ ndá yeḛ tɔl gel-bɔje lə Jeroboam lai ɓó yeḛ ya̰ dəw kára kara kəmba el, yeḛ tuji néje lai gə́ d’əmə lé gə goo ta gə́ Njesigənea̰ pa ne gə ndu kura ləa gə́ Aija, dəw gə́ Silo lé , 30 gə mbata kaiyaje gə́ Jeroboam ra ləm, gə́ yeḛ gə́ ar Israɛlje kara ra ləm tɔ ndá, ar mee Njesigənea̰, Ala lə Israɛlje ḭ ne səa pu dɔ dee’g tɔ.
31 Ges sor-néraje lə Nadab gə néje lai gə́ yeḛ ra lé see ndaŋg taree mee Maktub-sortaje’g lə mbaije gə́ Israɛl lé el wa.
32 Mee ndəa gə́ d’isi ne gə kəm dee lé rɔ to mbuna Asa gə Basa’g, mbai gə́ Israɛl lé ta-ta ya.
Basa, mbai gə́ Israɛl
33 Mee ləb gə́ njekɔm’g munda gə́ mbai Asa o̰ ne Juda lé Basa, ŋgolə Aija un kudu ko̰ ne Israɛlje lai ya. Yeḛ si Tirsa o̰ ne ɓee ləb rɔ-joo-giree-sɔ. 34 Yeḛ ra né gə́ majel kəm Njesigənea̰’g un ne dɔ gɔl Jeroboam ləm, ya̰ ne rəa yag dan kaiya gə́ Jeroboam ar Israɛlje ra lé ləm tɔ.
© Ngambai Bible © Alliance Biblique du Tchad 1989, 2015.
