Tuji lə Edɔmje ləm, gə tel ree ɓée lə Israɛlje ləm tɔ
1 Seḭ ginkoji dəwje gə raŋg lé reeje pər gə́ nee ooje!
Seḭ koso-dəwje lé lelje mbi sí!
Maji kar dɔ naŋg gə néje lai gə́ keneŋ ləm,
Dəwje lai gə́ dɔ naŋg nee gə néje lai gə́ ḭ keneŋ ləm tɔ lé d’oo ta ya!
2 Mbata oŋg lə Njesigənea̰ a gə kɔm dɔ ginkoji dəwje gə raŋg’g lai
Ndá oŋg-boo ləa a kɔm dɔ njérɔje’g lə deḛ lai tɔ.
Yeḛ wɔji mba kar dee d’udu guduru ləm,
Yeḛ ɔm dee ta yoo’g rib-rib ləm tɔ.
3 D’odo yoo dee d’ɔm dɔ na̰’d rib-rib ləm,
Nin dee ə̰də mbo̰ ləma,
Məs dee kara ula dɔ mbal’g ləm tɔ.
4 Boo-néje lai gə́ pə̰ dara’g lèḛ ləm,
Dara kara kə́ na̰’d mber-mber to gə́ maktub bèe,
Ndá boo-néje lai gə́ keneŋ toso
To gə́ kam nduúje
Gə kam kodéje ndòlé gəḭ ne bèe tɔ .
5 Kiambas ləm teḛ mee dara’g,
Aa ooje, yee a kḭ kur dɔ Edɔmje’g
Dɔ koso-dəwje gə́ m’wɔji njaŋg
Mba gaŋg rəwta dɔ dee’g tuji dee ne pugudu-pugudu .
6 Kiambas lə Njesigənea̰ lé məs gə ubu wa keneŋ mbəgə-mbəgə,
To məs ŋgan badje gə bàl bya̰je ləm,
To ubu gə́ wa reŋ bàl badje ləm tɔ,
Mbata nékinjaməs lə Njesigənea̰
To mee ɓee-boo gə́ Bosra ləm,
Yoo-dəwje to naŋg rib-rib mee ɓee gə́ Edɔm ləm tɔ.
7 Dadɔgje toso na̰’d
Gə maŋgje gə bɔ maŋgje tɔ,
Dɔ naŋg ai məs dee ləm,
Nduji naŋg o̰ ubu dee ləm tɔ.
8 Mbata to ndɔ dal ba̰ lə Njesigənea̰ ləm,
Gə ləb kuga dɔ ji dee
Mbata né gə́ deḛ ra gə Sio̰ ləm tɔ.
9 Kəm-rəw-manje gə́ Edɔm d’a tel to asəna gə tibi bia̰ ləm,
Nduji naŋgee a tel to asəna gə tibi bia̰ gə́ gel naŋg’d ləm tɔ,
Tɔɓəi dɔ naŋgee a to asəna gə tibi bia̰ gə́ o̰ pər bèe.
10 Dan kàrá gə loondul’g lai lé
Peree a kwəi el ləm,
Səa a tuu saar gə no̰ ləm tɔ,
Ɓee neelé a to gə́ dɔ nduba saar-saar gə no̰ ləm,
Dəw kára kara a dəs keneŋ el ŋga ləm tɔ .
11 Dogəro gə nduru d’a kwa gə́ loo-si dee ləm,
Kwɔi gə ga̰-ga̰ d’a si keneŋ ləm,
D’a kila kúla-kwɔji-né gə́ wɔji dɔ loo-némeeko̰ keneŋ ləma,
Nékwɔji-né gə́ ka̰ tuji loo a to keneŋ ləm tɔ.
12 D’a koo dəw gə́ boo kára kara
Gə mba kundá gə́ mbai el ləm,
D’a tuji mbaije ləa lai pugudu-pugudu ləm tɔ.
13 Kunje d’a kuba dan mee kəi-mbaije’g ləa ləm,
Kun-pɔrɔrɔje gə ŋgarje d’a kuba kəi-kaar-kɔgərɔ’g ləa ləm tɔ.
Ndá a tel to loo-to tàlje ləm,
Gə loo-kaar miruje ləm tɔ.
14 Daje gə́ dɔdilaloo’g dee gə jagmjərje d’a kiŋga na̰ keneŋ ləm,
Bàl bya̰je d’a naa ndu na̰ keneŋ ləm tɔ,
Lée neelé ndil gə́ majel gə́ ka̰ loondul a kiŋga loo-siée keneŋ
Karee tel to loo-kwa-rɔ ləa.
15 Lée neelé li a kiŋga loo-tée kɔm kaw keneŋ ləm,
A tɔ ŋganeeje ləma,
A mbo̰ dee gelee’g ləm tɔ,
Lée neelé malje lai d’a mbo̰ na̰ keneŋ tɔ.
16 Saŋje mee maktub’g lə Njesigənea̰
Turaje ta nee gə́ pana:
Yeḛ gə́ kára mbuna dee’d gə́ a lal ree lé godo ləm,
Yeḛ gə́ rara kara gə́ a lal lé godo ləm tɔ,
Mbata Njesigənea̰ nja ɓa pa mba̰ ləm,
Ndilee-yeḛ nja ɓa a mbo̰ dee dɔ na̰’d keneŋ.
17 Yeḛ ra nékwɔji-loo kaiyee mbata lə dee
Ndá jia-yeḛ nja ɓa a kai dee dɔ naŋg neelé gə kúla,
D’a taa gə́ né ka̰ dee-deḛ saar gə no̰ ləm,
D’a si keneŋ gə ləb dee ləb dee gə no̰ ləm tɔ.
© Ngambai Bible © Alliance Biblique du Tchad 1989, 2015.
