Abrakam aw mba kinja Isaak gə́ nékinjaməs
1 Gée gə́ gogo Ala naa mee Abrakam ndá yeḛ baree pana: Abrakam! Yeḛ ndigi təa’g pana: Yḛ̀ m’aar nee .
2 Ala pana: Aw gə Isaak, ŋgoni gə́ kára ba kiao gə́ i undá dan kəmi’g lé. Ɔd aw səa ɓee gə́ Morija ndá lée neelé i a kḭjá gə́ nékinjaməs gə́ ka̰ roo dɔ mbal gə́ m’a gə kulai’g lé ɓəi .
3 Abrakam ḭ gə ndɔ rad, tɔ né gir mulayḛ̀je’g ləa, ar basaje joo gə Isaak d’aw səa na̰’d. Yeḛ ria kir gə́ ka̰ roo ne nékinjaməs lé ndá ɔd gə mba kaw loo gə́ Ala ulá keneŋ lé tɔ. 4 Ndɔ gə́ njekɔm’g munda lə dee ndá Abrakam un kəmee gə́ tar oo loo lé nai əw lam ba. 5 Abrakam ula basaje lé pana: síje loo gə́ nee’g gə mulayḛ̀je ndá ma jeḛ gə ŋgon basa lé j’a kaw loo gə́ nu’gən gə mba kwa Ala meḛ sí’g ɓa j’a tel ree rɔ sí’g ɓəi.
6 Abrakam un kir gə́ ka̰ roo ne nékinjaməs lé unda dɔ ŋgonee Isaak’g ndá yeḛ wa pər gə kia jia-yeḛ’g tɔ. Deḛ joo bɔr njaa na̰’d d’aw. 7 Yen ŋga Isaak ɓar bɔbeeje Abrakam pana: Bɔm! Ndá yeḛ ndigi təa’g pana: Ŋgonəm, yḛ̀ m’aar nee! Isaak un ta lé gogo ɓəi dəjee pana, Aa oo, pər gə kir ɓa to nee, ŋga see ŋgon badə gə́ to nékinjaməs gə́ ka̰ roo lé see to ra ɓəi wa.
8 Abrakam ilá keneŋ pana: Ŋgonəm, Ala nja a k’oo ŋgon badə gə́ a k’ar gə́ nékinjaməs gə́ ka̰ roo gə́ wɔji dəa lé ɓəi.
Ndá deḛ joo bɔr d’ɔd njaa na̰’d d’aw tɔ. 9 Loo gə́ deḛ teḛ loo gə́ Ala ulá lé ndá Abrakam ra loo-nékinjaməs keneŋ ləm, yeḛ ɔm kir dɔ’g ləm tɔ. Ndá yeḛ wa ŋgonee Isaak teá unee ilá dɔ kir gə́ to dɔ loo-nékinjaməs’g neelé . 10 Tɔɓəi Abrakam ula jia un kia gə mba kinja ne gwɔs ŋgonee lé. 11 Nɛ kura lə Njesigənea̰ gə́ si dara ɓaree pana: Abrakam! Abrakam! Ndá yeḛ ndigi təa’g pana: Yḛ̀ m’aar nee!
12 Kura gə́ dara lé pana: Un jii ɔrɔ ne rɔ ŋgon neelé el ləm, ra səa né el ləm tɔ. Mbata ɓasinè lé ma m’gər gao to gə́ i ɓəl Ala ya. Ŋgoni gə́ to ŋgon gə́ kára ba kiao lé i ɔgm el.
13 Abrakam un kəmee gə́ tar ndá oo bàl badə gə́ tuga gajee ŋgon kag’d. Ndá Abrakam aw wá, ree inja gə́ nékinjaməs roo gə pər taa ne tor ŋgonee lé tɔ. 14 Abrakam unda ri loo neelé lə Jehoba-Jire kɔr gelee pana: Njesigənea̰ to nje-kar sí né gə́ jeḛ j’aw ndée. Gelee gə́ nee ɓa ɓogənè kara deḛ pa ne pana: Dɔ mbal’g lə Njesigənea̰ lé d’a kar sí né gə́ j’aw ndée keneŋ.
15 Kura lə Njesigənea̰ gə́ si dara ɓar Abrakam gə́ njekɔm’g gɔl joo pana: 16 Njesigənea̰ pa togə́bè pana: Ma man rɔm gə rim-ma ya, gə mbata ra gə́ i ra né gə́ neelé ləm, gə ŋgoni gə́ to ŋgon gə́ kára ba kiao gə́ i ɔgm el lé ləm tɔ lé 17 ndá m’a tɔr ndum dɔi’g ləm, m’a kar ŋgakaije d’ɔs goo na̰ gə́ kédé-kédé kar dee bula d’asəna gə kéréméje gə́ dara ləm, gə d’asəna gə nagəra gə́ to ta baa-boo-kad’g ləm tɔ. Tɔɓəi ŋgakaije lé d’a taa tarəwkɔg lə njéba̰je lə dee gə́ né ka̰ dee-deḛ ya . 18 Ginkoji dəwje gə raŋg lai dɔ naŋg nee lé d’a kiŋga dɔkaisəgərə rɔ ŋgakaije’g mbata i lé njaa gə ŋgonkoji dɔ ta’g ləm ya .
19 Abrakam tel gogo aw rɔ basaje’g ləa ndá deḛ d’uba naŋg d’ḭ d’aw səa na̰’d Beer-Seba, mbata Abrakam ra ɓee Beer-Seba lé.
Ŋgaka Naɔr
20 Gée gə́ gogo d’ula Abrakam pana: Aa oo, Milka kara oji ŋganje gə́ diŋgam ar Naɔr gə́ to ŋgokɔḭ lé, 21 ŋgondəree to Uts, gə ŋgokea̰ Buj, gə Kemuel gə́ to bɔ Aramje, 22 gə Kesed, gə Hajo, gə Pildas, gə Jidlap, gə Betuel. 23 Betuel oji Rebeka. Deḛ gə́ jinaijoo neelé ɓa to ŋgalə Milka gə́ yeḛ oji dee gə Naɔr, ŋgoko̰ Abrakam lé. 24 Gamla-dené ləa gə́ ria lə Reuma lé yeḛ kara oji Teba, Gaham, Tahas, gə Maaka tɔ.
© Ngambai Bible © Alliance Biblique du Tchad 1989, 2015.
