TAJE GƎ DƆTAR
1 Ndərta gə́ inja kəm Esai, ŋgolə Amots’g aree oo wɔji ne dɔ Judaje gə Jerusalemje mee ndəa gə́ Ojias gə Jotam gə Akaj gə Ejekias to ne mbaije gə́ Juda lé .
Njesigənea̰ gaŋgta dɔ koso-dəwje’g ləa
2 Dara, oo ta! Naŋg, ur mbii oo!
Mbata Njesigənea̰ pata pana:
Ma m’odo ŋganje m’ar dee tɔg
Nɛ deḛ d’ḭ d’ɔsm rəw.
3 Bɔ maŋg gər njekulee ləm,
Mulayḛ̀ gər bəgərə-sɔ-né ləa
Gə́ to rɔ ɓéeje’g ləm tɔ.
Nɛ Israɛlje ndigi gər né kára kara el,
Kəm koso-dəwje ləm inja dɔ gosonégər’g el.
4 Meeko̰ a koso dɔ sí-seḭ
Ginkoji dəwje gə́ njékaiyaje,
Seḭ gə́ toje koso-dəwje
Gə́ njéra né kori-korije ləm,
Gə́ ŋgaka njémeeyèrje ləma,
Gə́ ŋganje gə́ njéra némajelje ləm tɔ!
Seḭ ubaje Njesigənea̰ yá̰je ləm,
Seḭ ə̰jije Njemeenda lə Israɛlje bəḭ-bəḭ ləma,
Seḭ telje gir sí ilaje areeje ləm tɔ.
5 Loo gə́ kɔs ta rəw lə sí ḭ dɔ maree’d gə́ kédé-kédé lé
See bo̰ néra sí gə́ sigi
Gə́ ra ɓa kəm karee ɔs ta sí’g wa.
Rɔko̰ ta dɔ sí bura pəl-pəl ləm,
Meḛ sí bura kara tila ŋgaḭla-ŋgaḭla ləm tɔ.
6 Un ŋgira gɔl sí’g naŋg saar
Teḛ dɔ sí’g tar lé
Né kára gə́ maji godo keneŋ,
To gə́ doo ya bura ləm,
Gə doo gə́ dɔ mundu ləma,
Gə doo yii ləm tɔ
Gə́ lal kɔm mán keneŋ ləm,
Gə lal tɔ ləma,
Gə lal kunda ubu təa’g karee kul lɔm ləm tɔ.
7 Ɓee lə sí to nduba ləm,
Pər roo ɓee-booje lə sí ləm,
Dəw-dɔ-ɓeeje tuji ndɔje lə sí,
Kəm sí’g ya pugudu-pugudu ləma,
Deḛ d’undá naŋg rə̰dəŋ-rə̰dəŋ
Gə tuji pugudu-pugudu
To gə́ dəw-mee-kɔrje bèe ləm tɔ.
8 Ndá ɓee-boo gə́ Jerusalem ɓa nai
Asəna gə kəi-ləw gə́ to mee ndɔ-nduú’g bèe ləm,
Asəna gə kəi-kubu gə́ to mee loo-ndɔ-kosoje’g ləma,
Asəna gə ɓee-boo gə́ d’aḭ dəa sub gə rɔ bèe ləm tɔ.
9 Ɓó lé Ala gə́ njeboo-néje
Ya̰ kó ginka sí gə́ nai jəbərə ba el ndá
Kàr bèe nḛ jeḛ n’telje
J’asəna gə njé gə́ Sɔdɔm ləm,
Jeḛ n’telje n’tana gə njé gə́ Gɔmɔr bèe ləm tɔ .
Loo-kwa-Ala-mee’d gə́ to kḛji kəmee’g
10 Seḭ mbaije gə́ néra sí
Wa bwà ka̰ njé gə́ Sɔdɔm lé
Ooje ta lə Njesigənea̰!
Seḭ koso-dəwje gə́ néra sí
Wa bwà ka̰ njé gə́ Gɔmɔr lé
Urje mbi sí dɔ godndu Ala’g lə sí!
11 Njesigənea̰ pa njaŋg pana:
See ɗi ɓa m’a ra gə nékinjanéməsje lə sí
Gə́ ɔs goo na̰-na̰ lé wa.
Nékinjaməsje gə́ ka̰ roo
Gə́ to bàl bya̰je gə ubu bɔ maŋgje lé
Rɔm asm dɔ’g ŋga.
Məs bɔ maŋgje, gə ka̰ badje, gə ka̰ bàl bya̰je lé
Ar məəm lelm el .
12 Loo gə́ seḭ reeje nɔm’g lé
See na̰ ɓa dəji sí kar sí reeje
Tubaje gadloo gə́ to gə kəmee lé
Gə gɔl sí wa.
13 Nékarje gə́ gə mḭdé-mḭdé lé
Ǝwje rɔ sí reeje ne,
Né gə́ ə̰də sululu ləm,
Gə ndɔ ra naḭje gə́ teḛ sigi ləm,
Gə ndɔ-kwa-rɔ ləma,
Gə loo-mbo̰-dɔ-na̰je ləm tɔ lé
To kḛji kəm’g,
Gə mba kar néra gə́ kori-kori ɔm na̰’d
Gə loo-kwa-dɔ-na̰ gə́ to gə kəmee lé
Ma m’ndigi koo el.
14 Ndɔ ra naḭje lə sí gə́ teḛ sigi,
Gə naḭje lə sí lé
Ma m’ə̰ji dee bəḭ-bəḭ,
Deḛ to nékodo gə́ wɔi dɔm’g ləm,
Rɔm asm dɔ dee’g ləm tɔ.
15 Loo gə́ seḭ odoje ji sí gə́ tar ndá
Ma m’un kəm dɔ’g rəw,
Loo gə́ tamajije lə sí d’ɔs goo na̰ goo na̰ kara
Ma m’udu mbim dɔ’g tɔ,
Məs wa ji sí mbəgə-mbəgə.
16 Togoje rɔ sí,
Gə mba kàr ne ŋgad-ŋgad,
Néra sí gə́ majel lé
Ɔrje kəm’d gə́ gogo,
Ǝwje rɔ sí raje né gə́ majel.
17 Ndooje loo ra né gə́ maji ləm,
Ndolèje goo néra gə́ gə dɔ najee ləm,
Aaje dɔ yeḛ gə́ d’ula kəmee ndòo ləm,
Ɔrje kəmta lə ŋgonal gə goo rəbee ləma,
Aḭje bada dɔ njekəisiŋga’g ləm tɔ.
Ɓó lé seḭ rḛ́je dɔ kɔs ta rəw’g ndá ...
18 Njesigənea̰ pana:
Gə́ reeje ar sí j’ɔrje kəmta lə sí j’arje na̰!
Ɓó lé kaiyaje lə sí kas gəḭ ndá
D’a tel ndá kələw-kələw
Asəna gə bèl kəwje bèe,
Ɓó lé deḛ kas njir-njir ndá
D’a tel to asəna gə bḭ kubu bèe.
19 Ɓó lé seḭ ḭje gə meḛ sí
Mba koo ne ta ləm ndá
Seḭ a sɔje némajije
Gə́ ur dɔ mareeje mee ɓee’g neelé,
20 Nɛ ɓó lé seḭ mbadje ləm,
Ɓó lé seḭ ɔsje ta rəw ləm tɔ ndá
D’a tuji sí gə kiambas
Mbata yee ɓa gə́ né gə́ Njesigənea̰ pa njaŋg ya.
Kɔr won njé gə́ Jerusalem
21 See ban ɓa ɓee-boo gə́ njekila koji lé ya
Tel to asəna gə kaiya-dené bèe wa!
Kédé lé néra gə́ gə goo rəbee taa loo keneŋ pəl-pəl ləm,
Néra gə́ gə dɔ najee ɓa ra ɓee keneŋ ləm tɔ,
Nɛ ɓasinè ndá njétɔl dəwje ɓa d’isi keneŋ.
22 Larnda lə sí tel to gə́ siḭ-larje ləm,
Man-nduú lə sí lé mán ɓa unda badə gaŋgee ləm tɔ.
23 Mbaije lə sí to njékɔsta-rəwje ləm,
Gə njékɔm na̰’d gə njéɓogoje ləm tɔ.
Deḛ lai ndigi néndogo-gel ləm,
D’aiŋgwɔd goo nédɔji dee’g ləm,
Deḛ d’ɔr kəmta lə ŋgonal
Gə goo rəbee el ləma,
Deḛ d’ya̰ loo d’ar njekəisiŋga
Ree gə ta ləa rɔ dee’g el ləm tɔ.
24 Gelee gə́ nee ɓa, aa ooje,
Ta gə́ Mbaidɔmbaije Ala gə́ njeboo-néje
Gə́ to Njesiŋgamoŋ lə Israɛl pa lé ɓa nee:
N’a tel tɔl ta oŋg lə neḛ dɔ njékoma̰ sə neḛje’g
Ndá n’a dal ba̰ lə neḛ dɔ njéba̰je’g lə neḛ tɔ.
25 N’a tel gə ji neḛ par gə́ rɔ sí-seḭ gə́ Jerusalem ləm,
N’a kar siḭ-lar lə sí léḛ
Kɔr ne yiro gə́ keneŋ ləma,
Ŋgwɔi rɔm gə́ nai lé
N’a kɔr ndad-ndad ləm tɔ.
26 N’a tel kunda njégaŋ-rəwtaje lə sí to gə́ kédé ləm,
Gə njékwɔjita-kəmkàrje lə sí to gə́ kédé gə́ dɔtar ya ləm tɔ.
Gée gə́ gogo ndá d’a kunda ri sí
Le ɓee-boo gə́ njéra né gə́ gə dɔ najee-je d’isi keneŋ ləm,
Gə ɓee-boo gə́ njékilakojije d’isi keneŋ ləm tɔ.
27 Njé gə́ Sio̰ d’a kaji
Gə goo néra dee gə́ danasur ləm,
Deḛ gə́ d’a kun meḛ dee keneŋ
D’a kaji gə goo néra gə́ gə dɔ najee ləm tɔ.
28 Nɛ tuji a koso dɔ deḛ lai
Gə́ to njékɔsta-rəwje gə njékaiyaje ləm,
Deḛ gə́ d’uba Njesigənea̰ d’yá̰ lé
D’a kudu guduru ləm tɔ.
29 Rɔ sí a kul
Mbata kagje gə́ seḭ pole deeje ləm,
Kəm sɔḭ a dəb dɔ sí’g
Mbata loo-pole-néje lə sí
Gə́ seḭ ɔrje kəmee lé ləm tɔ.
30 Mbata seḭ a toje kasəna
Gə kag gə́ kamee ndòlé bèe ləm,
A toje kasəna
Gə loo-ndɔ gə́ mán godo keneŋ ləm tɔ.
31 Dəw gə́ njesiŋgamoŋ a tel kasəna gə bḭ kúla bèe ləm,
Kula rəa a to kasəna gə ndao-pər bèe ləm tɔ,
Deḛ joo bɔr d’a roo dula-dula
Ndá dəw gə́ njetɔl pəree a godo.
© Ngambai Bible © Alliance Biblique du Tchad 1989, 2015.
