Ta kwəi lə ŋgandər dəwje gə daje
1 Njesigənea̰ ula Moyis pana: M’a kar tuji-boo gə́ raŋg kára teḛ dɔ Parao̰’g gə dɔ Ejiptə’g ya ɓəi tɔ. Gée gə́ gogo ndá yeḛ a kya̰ sí kar sí ḭje awje ŋga. Loo gə́ yeḛ a gə kya̰ sí kar sí awje tɔgərɔ ya ndá yeḛ a tuba sí loo gə́ nee’g gə́ tuba ya . 2 Maji kari ula dəwje mba kar diŋgam gə́ rara kara a kwɔi njeboatakəi ləa gə́ diŋgam ləm, dené ndá a kwɔi njeboatakəi ləa gə́ dené ləm tɔ, néra-ma̰dje gə néra-basaje gə́ ra gə larnda əsé gə larlɔr tɔ.
3 Njesigənea̰ ar koso-dəwje lé taa kəm njé gə́ Ejiptə rəgm. Moyis kara to dəw gə́ boo mee ɓee gə́ Ejiptə kəm kuraje’g lə Parao̰ ləm, gə kəm koso-dəwje’g ləm tɔ.
4 Moyis pana: Njesigənea̰ pa togə́bè pana: Dan loo bab lé m’a gə dəs mee ɓee gə́ Ejiptə’g, 5 ndá ŋgandərje lai gə́ mee ɓee gə́ Ejiptə’g lé d’a gə kwəi, un kudee dɔ ŋgondər Parao̰’g, yeḛ gə́ si dɔ kalimbai’g saar teḛ ne dɔ ŋgondər kura ləa gə́ dené gə́ aar loo kusu kó’g ləm, teḛ ne dɔ ŋgandər nékulje’g lai ləm tɔ. 6 D’a no̰ gə kii mbidi-mbidi gə looje lai-lai mee ɓee gə́ Ejiptə, ndu no̰ gə́ bèe lé dəw oo togə́bè kédé el ləm, a koo togə́bè gogo el ləm tɔ. 7 Nɛ mbuna Israɛlje’g lai lé un kudee dɔ dəwje’g saar teḛ ne dɔ nékulje’g lai lé bisi kára kara a kinja miḭ el, mba kar sí gərje ne gao to gə́ Njesigənea̰ lé ɔr kəm Ejiptəje ɓəd ləm, ɔr kəm Israɛlje kara ɓəd ləm tɔ. 8 Togə́bè ɓa kuraje ləi lai gə́ d’aar neelé d’a rəm pər gə́ rɔm’g ləm d’a kunda barmba nɔm’g ndá d’a kulam pana: Maji kam m’teḛ, ma ləm gə dəwje lai gə́ d’wa kilam lé. Gée gə́ gogo m’a teḛ kaw ya.
Moyis unda loo mee kəi’g lə Parao̰ teḛ gə oŋg gə́ aw səa biriri-biriri ya.
9 Njesigənea̰ ula Moyis pana: Parao̰ a koo ta lə sí pai godo, gə mba kar némɔrije ləm d’ore ne goo na̰ goo na̰ mee ɓee gə́ Ejiptə ya. 10 Moyis gə Aaro̰ ra némɔrije lai neelé no̰ Parao̰’g, nɛ Njesigənea̰ ar mee Parao̰ ndər ya ɓəi ndá yeḛ ya̰ Israɛlje ar dee d’ḭ ɓee ləa d’aw el saar.
© Ngambai Bible © Alliance Biblique du Tchad 1989, 2015.
