Dabid gə Bat-Seba
1 Goo ləb gə́ sigi’g lé to mee ndəaje gə́ mbaije d’aw mba rɔ ne gə na̰ na̰ lé ndá Dabid ula Joab gə kuraje ləa gə njérɔje gə́ Israɛl lai mba kar dee d’aw tuji Amo̰je ləm, gə mba kaḭ dɔ Raba sub gə rɔ ləm tɔ. Nɛ Dabid nai Jerusalem ya .
2 Kàrkemetag gə́ kára bèe ndá Dabid ḭ loo-tée’g. Loo gə́ yeḛ aw njaa dɔ kəi’g ləa gə́ tar gə́ to kəi-mbai lé ndá yeḛ oo dené kára gə́ aar ndogo mán, yeḛ to dené gə́ ma̰də yaa̰ tɔ. 3 Dabid ar dee dəji ta lə dené neelé ndá d’ulá pana: See to Bat-Seba, ŋgolə Eliam gə́ to dené lə Uri, dəw gə́ Het lé el wa. 4 Yen ŋga Dabid ula njékulaje ar dee ree səa rəa’g ndá yeḛ to səa ɓa yeḛ tel aw kəi ləa gogo ɓəi. Dené neelé ḭ loo togo won rəa’g ɓa ree səa d’aree kən.
5 Dené neelé taa kèm ndá yeḛ ula dee ar dee d’ula Dabid pana: Ma lé m’aw gə kèm.
6 Yen ŋga Dabid ula kula rɔ Joab’g pana: Ar Uri gə́ to dəw gə́ Het lé ree iŋgam.
Joab ula Uri lé aree aw iŋga Dabid. 7 Loo gə́ Uri teḛ rɔ Dabid’g ndá yeḛ dəjee ta lə Joab ləm, gə ta lə njérɔje ləma, gə ta lə rɔ ləm tɔ. 8 Tɔɓəi Dabid ula Uri pana: Aw wa rɔi kəi ləi lam ɓa.
Uri unda loo mee kəi-mbai’g teḛ ndá mbai lé ula gə nénoji aree. 9 Nɛ Uri to takəi’g lə mbai gə kuraje lə ɓéeje lai na̰’d ɓó yeḛ aw kəi ləa el. 10 D’ula Dabid taree pana: Uri lé aw mee kəi’g ləa el. Ndá Dabid dəji Uri pana: See i ḭ mbá’g ɓa ree el wa. See gelee ban ɓa i aw mee kəi’g ləi el wa.
11 Uri tel ila Dabid keneŋ pana: Sa̰duk-manrɔ gə Israɛlje gə Judaje d’isi mee kəi-kubuje’g ləm, mbai ləm Joab gə kuraje lə mbai ləm kara d’isi loo gə́ wala’g ləm tɔ ndá see ma ŋga ɓa m’a kaw mee kəi’g kaw sɔ gə kai gə to gə dené ləm wa. Tɔgərɔ ya si gə́ i si kəmba gə darɔi ɓəi neelé m’a ra né gə́ togə́bè lé pai godo.
12 Dabid ula Uri pana: Ɓogənè ndá i a nai nee ya ɓəi ndá bèlè ɓa m’a kari tel aw ɓəi.
Togə́bè ɓa Uri nai ne Jerusalem mee ndəa’g neelé ləm, gə bèlè ləm tɔ. 13 Dabid ɓaree aree sɔ gə ai saar ar kido tɔlee tɔ. Loo gə́ loondul ndá Uri teḛ aw aw to loo-tée’g na̰’d gə kuraje lə ɓéeje lé ɓó yeḛ aw mee kəi’g ləa el.
14 Bèlè gə ndɔ ndá Dabid ndaŋg maktub ar Joab ndá ar Uri ya aw ne jia’g mba karee. 15 Yeḛ ndaŋg ta mee maktub’g neelé pana: Maji kar sí undaje Uri loo gə́ rɔ nuŋga keneŋ kəd-kəd ndá ɔrje rɔ sí rəa’g mba kar dee tɔlee.
Kwəi lə Uri, ŋgaw Bat-Sebaje lé
16 Joab ar dee d’aḭ dɔ ɓee-boo sub gə rɔ ndá yeḛ ar Uri aar loo gə́ bao-rɔje gə́ to njésiŋgamoŋje d’aar keneŋ kègègè lé ya. 17 Njé gə́ mee ɓee-boo’g neelé teḛ d’aw rɔ gə Joab ndá njé gə́ na̰je bula mbuna njérɔje’g gə mbuna kuraje’g lə Dabid d’wəi ləm, Uri, dəw gə́ Het lé kara wəi ləm tɔ. 18 Joab ula njekaḭkula kára mba karee aw ɔr goo ta néje lai gə́ dəs loo-rɔ’g lé ar Dabid. 19 Yeḛ un ndia ar njekaḭkula neelé pana: Loo gə́ i ɔr goo ta néje lai gə́ teḛ loo-rɔ’g lé ar mbai oo ndá 20 banelə mée a kḭ səa pu karee pana: See gelee ban ɓa seḭ awje mbɔr ɓee-boo’g pər ɓa mba rɔje wa. See seḭ gərje to gə́ d’a kal dɔ ndògo-bɔrɔ mba kur ɓandaŋgje el wa. 21 See na̰ ɓa tɔl Abimelek, ŋgolə Jerubeset lé wa. See to dené gə́ al dɔ ndògo-bɔrɔ ɓa ila kɔri mbal-kusu-né aree oso dəa’g aree wəi ne ɓee gə́ Tebes lé el wa. Ŋga see gelee ban ɓa seḭ awje pər gə́ mbɔr ndògo-bɔrɔ’g wa. Yen ŋga i a kulá pana: Kura ləi Uri, dəw gə́ Het lé kara wəi ya tɔ .
22 Njekaḭkula lé ɔd aw. Loo gə́ yeḛ teḛ rɔ Dabid’g ndá yeḛ ɔr goo néje lai gə́ Joab ulá lé aree oo. 23 Njekaḭkula lé ula Dabid pana: Dəwje neelé siŋga dee ur dɔ ka̰ síjeḛ’g. Deḛ teḛ d’aw d’iŋga sí mee wala’g ndá jeḛ j’ɔs dee gə́ gogo saar jeḛ n’teḛje sə dee tarəwkɔg’d ya. 24 Njérɔ gə ɓandaŋgje lé d’aar dɔ ndògo-bɔrɔ’g ɓa t’ur kuraje ləi ar kuraje lə mbai d’wəi bula ləm, ar kura ləi Uri gə́ to dəw gə́ Het lé kara wəi ləm tɔ.
25 Dabid ula njekaḭkula lé pana: Aa oo, ta gə́ i a kula Joab ɓa nee: Maji kar mée ea̰ mbata né neelé el mbata kiambas lé tuji dəwje gə́ yo gə́ nee. Maji karee wa rəa kɔgərɔ rɔ ɓee-boo neelé mba tujee ya. Nɛ i lé maji kari ula diŋgam mée’g ɓa.
26 Dené lə Uri lé oo ta kwəi lə ŋgabeeje ndá yeḛ no̰ mbata ŋgabeeje. 27 Loo gə́ kwa ndòo yoo lé kuree as mba̰ ndá Dabid ula kula ar dee ree səa kəi ləa. Yeḛ tel to dené ləa ndá yeḛ oji səa ŋgon gə́ diŋgam.
Nɛ né gə́ Dabid ra lé taa kəm Njesigənea̰ el.
© Ngambai Bible © Alliance Biblique du Tchad 1989, 2015.
