Tamaji ra lə Junas
1 Njesigənea̰ ar ka̰ji-boo ree uru Junas mée’g mag ar Junas to mee ka̰ji-boo’g neelé ndəa munda dan kàrá gə loondul’g tɔ . 2 Junas gə́ to mee ka̰ji’g neelé ra tamaji ta Njesigənea̰, Ala’g ləa. 3 Yeḛ pana:
Dan néurti’g ɓa ma m’no̰ m’ɓari-i, Njesigənea̰
Ndá i oo ndum ya.
Dan loo’g lə njé gə́ d’wəi’g lé
Ma m’no̰ m’ɓari
Ndá i oo ndum ya tɔ.
4 I undam ilam dan ɓul mán baa-boo gə́ uru yaa̰’g,
Tur lə mán gə́ tur tuma̰-tuma̰ lé
Aḭ dɔm sub ləm,
Paŋgəm-manje gə mán bèlmje ləi lai dəs dɔm’g ləm tɔ.
5 Ma m’pana:
I tubam ɔsm nɔḭ’g rəw gə́ raŋg!
Nɛ lé bèe kara m’a koo kəi ləi
Gə́ to gə kəmee lé ndɔ gə́ raŋg ɓəi.
6 Manje neelé tur dɔm pubug
Gə mba kar kəmə ləm godo,
Ŋguru mán neelé tula dɔm yal ləm,
Mu manje kara ɓindi na̰ dɔm’g ləm tɔ.
7 Ma lé m’ndii mán
M’aw saar ŋgira mbalje gə́ naŋg
Ar pəgərə tarəwɓeeje lə njé gə́ d’wəi’g lé
D’udu dɔm’g saar gə no̰,
Lé bèe kara i Njesigənea̰ Ala ləm lé
I am m’unda loo mee bwa’g m’teḛ kəmba ya.
8 Loo gə́ ndiləm teḛ pərəŋ ndá
M’ar məəm olé dɔi-i Njesigənea̰’g,
Tamaji ləm kara aw njal teḛ rɔi’g
Mee kəi’g ləi gə́ to gə kəmee doi lé tɔ.
9 Deḛ gə́ d’unda rɔ dee mbo̰-mbo̰ rɔ magə-poleje’d gə́ kari ba lé
D’ɔs meekoso lemsé rɔ dee’g rəw.
10 Ma lé m’a kinja nékinjanéməsje ləm,
M’a kɔs pa rai ne oiyo ləma,
M’a tɔl ta ndukunje ləm gə́ m’un m’ari lé bém ya ləm tɔ,
Mbata Njesigənea̰ ɓa ajim ya.
11 Njesigənea̰ ula ka̰ji lé ta ndá yeḛ tɔmé Junas ilá dɔ naŋg gə́ tudu’g tɔ.
© Ngambai Bible © Alliance Biblique du Tchad 1989, 2015.
