Rudu taje gə́ Dabid ndoo Salomo̰
1 L oo gə́ ndɔ kwəi lə Dabid nai dəb ndá yeḛ un ndukunje ar ŋgonee Salomo̰ pana: 2 M’a gə kun rəw gə́ dəwje lai gə́ dɔ naŋg nee d’un lé ya. Maji kari wa rɔi kɔgərɔ gə́ dəw gə́ diŋgam ya. 3 Maji kari aa dɔ godnduje lə Njesigənea̰, Ala ləi kər-kər ləm, gə njaa kila-rəwje’g ləa ləm, gə aa dɔ godndiaje, gə ndukunje ləa gə rəwta-gaŋgje ləa gə tandooje ləa ləm tɔ gə goo ta gə́ ndaŋg mee maktub godndu’g lə Moyis lé, togə́bè ɓa i a teḛ ne kɔr dɔ néje lai gə́ i a gə ra’g ləm, gə looje lai gə́ i a gə njaa keneŋ ləm tɔ. 4 Bèe ɓa ta nee gə́ Njesigənea̰ pa wɔji ne dɔm lé a kaw ne lée’g béréré mbata yeḛ pana: Ɓó lé ŋganije d’unda kəmkàr dɔ panjaa dee’g njaa ne gə ŋgonkoji no̰m’g gə ŋgaw meḛ dee bura ləm, gə rɔ dee bura ləm tɔ ndá i a lal njetaa tori dɔ kalimbai’g lə Israɛlje nda̰ el.
5 I gər né gə́ Joab, ŋgolə Seruja ra səm lé gao ləm, né gə́ yeḛ ra gə ɓé-njérɔje lə Israɛlje gə́ joo gə́ ri dee lə Abner, ŋgolə Ner ləm, gə Amasa, ŋgolə Jeter lé gao ləm tɔ. Loo gə́ loo to lɔm ya nɛ yeḛ tɔl dee ɔm məs dee naŋg gə rɔ, rad ne məs rɔ neelé dɔ ndar gə́ tɔ ne ɓəree ləm, gə dɔ négɔlje’g ləa ləm tɔ . 6 I a ra né gə goo kəmkàr ləi ndá i a kya̰ loo kar yiŋga dəa pudu ɓa a kaw ne gə meekulɔm ɓee lə njé gə́ d’wəi el. 7 I a ra meemaji gə ŋgalə Barjilai, dəw gə́ Galaad lé, d’a si mbuna deḛ gə́ d’usɔ səi né na̰’d ta-ta ya. Mbata loo gə́ deḛ ree la səm mee ndəa gə́ m’aḭ ne no̰ ŋgokɔḭ Absalɔm’g lé deḛ ra səm meemaji togə́bè tɔ . 8 Aa oo, Simei, ŋgolə Gera, yeḛ gə́ to ginkoji lə Bḛjami gə́ ɓee gə́ Bahurim lé si mbɔri’g dəb. Yeḛ lé pata ndɔlje gə́ kəbərə-kəbərə ila dɔm’g ndɔ gə́ m’aw ne Mahanayim. Nɛ yeḛ ree iŋgam mbɔr baa’d gə́ Jurdɛ̰ ndá ma man rɔm gə ri Njesigənea̰ m’aree m’pana: M’a tɔlee gə kiambas el . 9 Ɓasinè i a kyá̰ lal kar bo̰ nérea ɔs təa’g el ŋga, mbata i to dəw gə́ njekəmkàr ləm, i gər né gə́ kəm ra səa gao ləm tɔ. I a kar yiŋga dəa gə́ ndá kələw-kələw lé tel to məs lai ɓa karee aw ne ɓee lə njé gə́ d’wəi ɓəi.
Dabid wəi ar Salomo̰ ɓa taa toree
1SgI 29.26-2810 Dabid wəi ndá deḛ dubee dan mee ɓee-boo’g ləa. 11 Ləbje lai gə́ Dabid o̰ ne ɓee dɔ Israɛlje’g lé d’as rɔ-sɔ. Yeḛ si Ebro̰ o̰ ɓee ləbee siri ləm, yeḛ si Jerusalem o̰ ɓee ləbee rɔ-munda-giree-munda ləm tɔ . 12 Togə́bè ɓa Salomo̰ si ne dɔ kalimbai’g lə bɔbeeje gə́ Dabid ndá ɓeeko̰ ləa lé to ne njaŋg ya .
Salomo̰ ar dee tɔl Adonija
13 Adonija, ŋgolə Dabid gə́ yeḛ ojee gə Agit lé aw rɔ Bat-Seba, ko̰ Salomo̰je’g ndá yeḛ dəjee pana: See i ree gə́ majee ya wa.
Yeḛ tel ilá keneŋ pana: Oiyo bèe ya.
14 Tɔɓəi yeḛ tel pana: Ma m’aw gə ta kára mba kulai.
Yeḛ tel ilá keneŋ pana: Gə́ pa.
15 Ndá Adonija tel pana: I gər gao to gə́ ɓeeko̰ lé to kama ləm, Israɛlje lai kara kəm dee to dɔm’g mba kam m’o̰ dee ləm tɔ. Nɛ ɓeeko̰ lé tel to ka̰ ŋgokɔm mbata Njesigənea̰ ɓa aree. 16 Ɓasinè ma m’ndigi dəjii né kára, maji kari ɔgm el ya kari.
Ndá yeḛ ilá keneŋ pana: Gə́ pa.
17 Ndá yeḛ pana: M’ra ndòo rɔi’g mba kari ula mbai Salomo̰ karee arm Abisag, ŋgoma̰də gə́ Sunem karee to dené ləm lé ndá yeḛ a kɔgi el .
18 Bat-Seba pana: Maji ya. M’a pata ləi kar mbai lé oo ya.
19 Bat-Seba aw rɔ mbai Salomo̰’g mba kulá ta gə́ wɔji dɔ Adonija lé. Mbai lé ḭta aw tila kəmee, yeḛ unda barmba nea̰’g ɓa tel si dɔ kalimbai’g ləa ɓəi. D’unda kag-si kára d’ar ko̰ mbaije lé si ne dɔ jikɔlee’g tɔ. 20 Tɔɓəi yeḛ ulá pana: M’aw gə ta nee lam gə mba dəjii. Maji kari ɔgm el.
Ndá mbai ilá’g pana: Kɔm, gə́ dəjim ya mbata m’a kɔgi né gə́ i dəjim lé el.
21 Yeḛ pana: Abisag, ŋgoma̰də gə́ Sunem lé maji kari aree to dené lə ŋgokɔḭ Adonija.
22 Mbai Salomo̰ tel ila kea̰je keneŋ pana: See gelee ban ɓa i dəji ne Abisag, ŋgoma̰də gə́ Sunem mba kar Adonija wa. Maji kari dəjim ɓeeko̰ ɓa gə mbata ləa (mbata yeḛ to ŋgokɔm gə́ tɔg) dəjim mbata ləa-yeḛ ləm, gə mbata lə Abiatar, njekinjanéməs ləma, gə mbata lə Joab, ŋgolə Seruja ləm tɔ.
23 Yen ŋga mbai Salomo̰ man rəa gə ri Njesigənea̰ pana: Ɓó lé m’ar Adonija uga ta neelé gə rəa dɔ ta gə́ yeḛ pa neelé el ndá maji kar Ala ra səm nédɔkudu ya. 24 Ɓasinè Njesigənea̰ gə́ to njesikəmba lé ɓa am m’isi dɔ kalimbai’g lə bɔm gə́ Dabid ləm, yeḛ nja ɓa to njetum gin kəi ləm gə goo ndukun ləa ləm tɔ. Ɓogənè ya Adonija a kwəi.
25 Togə́bè ɓa mbai Salomo̰ ula Benaja, ŋgolə Jeojoda lé aree unda Adonija tɔlee tɔ.
Salomo̰ tuba Abiatar mee ɓee gə́ Jerusalem
26 Mbai lé ula Abiatar, njekinjanéməs tɔɓəi pana: Ɔd aw Anatot dɔ naŋgje’g ləi mbata i lé kəm kari wəi ya tɔ, nɛ m’a kari wəi ɓogənè el mbata i un sa̰duk-manrɔ lə Mbaidɔmbaije gə́ Njesigənea̰ no̰ bɔm Dabid’g ləm, nékəmndooje lai gə́ ra bɔm lé rai səa ləm tɔ .
27 Togə́bè ɓa Salomo̰ ɔr Abiatar loo kulaje’g ləa gə́ wɔji dɔ kinja néməs kar Njesigənea̰ lé gə mba kar ta gə́ Njesigənea̰ pa wɔji ne dɔ njémeekəije lə Eli mee ɓee gə́ Silo lé aw ne lée’g béréré tɔ .
Salomo̰ ar dee tɔl Joab
28 Ta neelé oso mbi Joab’g, yeḛ gə́ un goo Adonija nɛ yeḛ aw goo Absalɔm’g kédé el lé. Yen ŋga Joab aḭ aw iya rəa mee kəi-kubu-si-Njesigənea̰’g ndá wa dɔ kum loo-nékinjaməs gə́ ḭta lé. 29 Deḛ d’ula mbai Salomo̰ pana: Joab iya rəa mee kəi-kubu-si-Njesigənea̰’g ndá yeḛ aar mbɔr loo-nékinjaməs’g lé ya.
Togə́bè ɓa Salomo̰ ula Benaja, ŋgolə Jeojoda pana: Aw tɔlee.
30 Benaja aw mee kəi-kubu-si-Njesigənea̰’g ndá yeḛ ula Joab pana: Teḛ raga, to mbai ɓa un ndia togə́bè ya.
Nɛ yeḛ tel ilá keneŋ pana: Wah! Ma m’ndigi kwəi loo gə́ nee’g ya. Benaja aw ndaji taree ar mbai pana: Joab lé pa togə́bè ləm yeḛ ilam keneŋ bèe ya ləm tɔ.
31 Mbai lé ula Benaja pana: Ra to gə́ yeḛ pa lé ya, tɔlee ndá dubee, togə́bè ɓa i a kɔr ne ta məs gə́ Joab ɔm naŋg lal gelee lé dɔm-ma’g ləm, gə dɔ njémeekəije’g lə bɔm ləm tɔ. 32 Njesigənea̰ a kar ta məsee nai dəa-yeḛ’g ya mbata yeḛ tɔl dəwje joo gə́ to njémeekarabasurje ləm, gə́ maji d’undá ləm tɔ ndá yeḛ tɔl dee gə kiambas lal kar bɔm Dabid oo taree: to Abner, ŋgolə Ner, ɓé-njérɔje gə́ Israɛl ləm, gə Amasa, ŋgolə Jeter, ɓé-njérɔje gə́ Juda ləm tɔ. 33 Ta məs dee a nai dɔ Joab’g gə dɔ ŋgakeaje-je’g saar gə no̰, nɛ meekulɔm lə Njesigənea̰ a to saar gə no̰ mbata lə Dabid ləm, gə ŋgakeaje ləm, gə gel-bɔje ləa ləma, gə kalimbai ləa ləm tɔ.
34 Benaja, ŋgolə Jeojoda aw unda Joab tɔlee ndá yeḛ dubee dan mee kəi’g ləa gə́ to dɔdilaloo’g lé. 35 Mbai unda Benaja, ŋgolə Jeojoda gə́ ɓé-njérɔje taa ne tor Joab ləm, yeḛ ar Sadɔk to njekinjanéməs tor Abiatar’g ləm tɔ.
Salomo̰ ar dee tɔl Simei
36 Mbai ɓar Simei ndá ulá pana: Maji kari ra kəi ləi Jerusalem ndá i a si keneŋ nɛ i a teḛ raga kaw loo gə́ raŋg’d el. 37 Oo maji, ndɔ gə́ i a teḛ raga dəs kəm mán nia̰ gə́ Sedro̰ ya ndá d’a tɔli nɛ ta məsi a nai dɔi-i’g ya.
38 Simei tel ila mbai’g pana: To maji ya. Kura ləi a ra to gə́ mbai ləm pa ne lé ya.
Bèe ɓa Simei si ne Jerusalem kuree əw. 39 Rudu ləb gə́ njekɔm’g munda ndá ɓərje lə Simei joo d’aḭ d’aw ɓee lə Akis, ŋgolə Maaka, mbai gə́ Gat. D’ula Simei pana: Aa oo, ɓərje ləi lé d’isi Gat. 40 Simei ḭta ila kali gir mulayḛ̀je’g ləa aw Gat, ɓee lə Akis mba saŋg ɓərje ləa lé. Loo gə́ Simei aw ndá yeḛ ḭ gə ɓərje ləa lé Gat tel ree sə dee ya. 41 Deḛ d’ula Salomo̰ pana: Simei lé ḭ Jerusalem aw Gat ɓa yeḛ tel ree ɓəi. 42 Mbai ɓar Simei lé ndá dəjee pana, See ma m’ari man rɔi gə ri Njesigənea̰ ləm, ma m’ulai gə ndum njaŋg m’pana: Oo maji, ndɔ gə́ i a kunda loo teḛ kaw loo gə́ raŋg ndá a kwəi, see m’pa bèe el wa. Ndá i ya kara ilam keneŋ pana: M’oo ya. See i pa bèe el wa. 43 See gelee ban ɓa i aa dɔ manrɔ lə Njesigənea̰ gə ndukun gə́ ma m’un m’ari lé el wa. 44 Ndá mbai ula Simei lé ya tɔɓəi pana: Némajelje lai gə́ i ra gə bɔm Dabid lé i gər məəi’g gao ya, Njesigənea̰ a kar némeeyèr ləi tel oso dɔi’g ya. 45 Nɛ dɔ mbai Salomo̰ a kai səgərə ləm, kalimbai lə Dabid kara a to njaŋg no̰ Njesigənea̰’g saar gə no̰ ya ləm tɔ.
46 Yen ŋga mbai un ndia ar Benaja, ŋgolə Jeojoda ndá yeḛ teḛ aw kunda Simei tɔlee.
Togə́bè ɓa ɓeeko̰ lé to ne njaŋg ji Salomo̰’g tɔ.
© Ngambai Bible © Alliance Biblique du Tchad 1989, 2015.
