Ndərta gə́ njekɔm’g joo gə́ gaŋg dɔ Gɔg’d
1 I ŋgon-dəw lé maji kari tegginta wɔji ne dɔ Gɔg! A pana: Mbaidɔmbaije gə́ Njesigənea̰ pa togə́bè pana: Aa oo, i Gɔg, mbai gə́ njekaa dɔ dəb ɓeeko̰ gə́ Ros, gə Mesek, gə Tubal lé neḛ n’aw səi gə ta. 2 N’a ndɔri ləm, n’a kɔr nɔḭ ləm, n’a kari aw rudu loo gə́ dɔgel ləma, n’a kaw səi dɔ mbalje gə́ Israɛl’g ləm tɔ. 3 N’a təd kag ɓandaŋg ləi gə́ jigeli’g ləm, n’a kar kandə ɓandaŋgje gə́ jikɔli’g gəḭ naŋg ləm tɔ. 4 I a kwəi dɔ mbalje gə́ Israɛl, i gə kudu-njérɔje ləi lai ləm, gə koso-dəwje gə́ d’a kaw səi lé ləm tɔ, n’a kari to nésɔ lə yelje gə́ njésɔ mar deeje ləm, gə néje lai gə́ gə bag dee ləma, gə daje gə́ wala ləm tɔ. 5 I a kwəi mee wala’g mbata neḛ Mbaidɔmbaije gə́ Njesigənea̰ ɓa n’pa taree, 6 N’a kula pər mee ɓee gə́ Magɔg’d ləm, gə mbuna deḛ gə́ d’isi gə́ majee dɔgoré-looje’g ləm tɔ, bèe ɓa deḛ d’a gər ne to gə́ neḛ n’to Njesigənea̰. 7 N’a kar dee gər ri neḛ gə́ to gə kəmee mbuna koso-dəwje’g lə neḛ gə́ Israɛl ndá n’a kya̰ loo kar dee d’ila ndɔl dɔ ri neḛ gə́ to gə kəmee lé el ŋga. Bèe ɓa ginkoji dəwje gə raŋg d’a gər ne to gə́ neḛ n’to Njesigənea̰, Njerɔkunda gə́ mee ɓee gə́ Israɛl. 8 Mbaidɔmbaije gə́ Njesigənea̰ ɓa pa bèe pana: Aa oo, néje neelé si aw gə́ nee ya, to néje gə́ un kudu teḛ ya, to ndəa gə́ neḛ n’pa taree lé ya. 9 Yen ŋga deḛ gə́ d’isi mee ɓee-booje gə́ Israɛl d’a teḛ raga ləm, deḛ d’a roo nérɔje dula-dula, dər-gugujuje gə dərje gə́ lam-lam ləm, gə kag ɓandaŋgje gə kandə ɓandaŋgje ləma, kagje gə́ tɔl dəa gə niŋga ndəije ləm tɔ, d’a ra ne pər as ləb siri. 10 D’a kodo kirje gə́ mee wala’g el ləm, d’a tuga kirje gə́ mee kag-kɔr’g el ləm tɔ mbata nérɔje ɓa d’a ra ne pər. Deḛ gə́ d’unda dee banrɔ lé deḛ d’a kunda dee-deḛ nja kara banrɔ tɔ, deḛ gə́ d’odo néje lə dee lé deḛ d’a kodo néje lə dee-deḛ tɔ. Mbaidɔmbaije gə́ Njesigənea̰ ɓa pa bèe.
11 Mee ndəa’g neelé n’a kar Gɔg loo gə́ a to dɔɓaree mee ɓee gə́ Israɛl, mee wəl-loo lə njékaw mbáje gə́ to par gə́ bər lə baa-boo-kad lé, dɔɓar neelé a kudu rəw dɔ njékaw mbáje’g. Lée neelé ɓa d’a dubu Gɔg gə dəw-bulaje ləa lai keneŋ ndá wəl-loo neelé d’a ɓaree wəl-loo lə koso-dəwje lə Gɔg. 12 Gel-bɔje lə Israɛl lé d’a dubu dee mba kar né gə́ mina̰ godo mee ɓee’g ndá kur dubu dee a kəw as naḭ siri. 13 Koso-dəwje lai gə́ mee ɓee’g lé d’a dubu dee ndá ri dee a ɓar ne mee ndəa gə́ d’a kula rɔnduba dɔ neḛ’g, Mbaidɔmbaije gə́ Njesigənea̰ ɓa pa bèe. 14 D’a kɔr dəwje kar dee d’aw gə́ yo gə́ nee mee ɓee’g ta-ta tɔɓəi njékaw mbáje d’a la sə dee kar dee dubu nin dəwje gə́ nai raga. D’a kar ɓee lé àr ŋgad-ŋgad ləm, d’a saŋg dee togə́bè as naḭ siri ya doŋgɔ ləm tɔ. 15 D’a kaw gə́ yo gə́ nee mee ɓee’g, tɔɓəi loo gə́ dəw kára mbuna dee’g a koo siŋga dəw ndá yeḛ a kunda nétɔji mbɔree’g saar kar njékurubwaje ree dubee mee wəl-loo’g lə koso-dəwje lə Gɔg. 16 Ɓee-boo gə́ d’a ɓaree Hamona a to keneŋ. Togə́bè ɓa d’a kar ɓee lé àr ne ŋgad-ŋgad.
17 I ŋgon-dəw lé Mbaidɔmbaije gə́ Njesigənea̰ pa togə́bè pana: Maji kari ula yelje gə néje lai gə́ gə bag dee ləm, gə daje gə́ wala lai ləm tɔ m’pana: Mbo̰je dɔ na̰ reeje, ḭje gə looje ɓəd-ɓəd ree iŋgaje na̰ mbata nékinjaməs gə́ neḛ nja n’inja mbata lə sí to nékinjaməs gə́ boo gə́ n’inja dɔ mbalje gə́ Israɛl! Seḭ a sɔje da ləm, seḭ a kaije məs ləm tɔ . 18 Seḭ a sɔje dakasrɔ bao-rɔje ləm, seḭ a kaije məs mbaije gə́ njékaa dɔ dəb ɓeeko̰je gə́ dɔ naŋg nee ləm tɔ asəna gə ka̰ bàl badje, gə ŋgan badje, gə bàl bya̰je, gə bɔ maŋgje gə́ Basan gə́ d’ər ndɔl-ndɔl bèe. 19 Seḭ a sɔje ubu saar karee as sí nag-nag ləm, seḭ a kaije məs saar karee ra sí ləm tɔ, loo-muru-gad lə nékinjaməs’g lə neḛ gə́ n’a kinja kar sí lé. 20 Ta ka nésɔ’g lə neḛ lé dakasrɔ kundaje gə dakasrɔ njékal deeje gə dakasrɔ bao-rɔje gə dakasrɔ njérɔje lai lé seḭ a sɔje kaareeje as sí nag-nag, Mbaidɔmbaije gə́ Njesigənea̰ ɓa pa bèe.
21 N’a riba dɔ rɔnduba lə neḛ mbuna ginkoji dəwje gə raŋg’g, tɔɓəi ginkoji dəwje gə raŋg lai d’a koo rəwta-gaŋgje lə neḛ gə́ n’a gə gaŋg ləm, gə bo̰ néra dee gə́ n’a karee ɔs ta dee’g gə ji neḛ ləm tɔ. 22 Gel-bɔje lə Israɛl d’a gər to gə́ neḛ n’to Njesigənea̰, Ala lə dee un kudee mee ndəa’g neelé saar teḛ ne mee ndɔje gə́ d’a gə ree ɓəi.
Ta tɔl ŋgaŋ taje lə Ejekiel
23 Bèe ɓa ginkoji dəwje gə raŋg d’a gər ne to gə́ néra kori-korije lə gel-bɔje lə Israɛl ɓa ar dee d’aw ne sə dee ɓee-ɓər’g gə mbəa ləm, to mbata koji gə́ deḛ d’ila dɔ neḛ’g el ləm tɔ, yee ɓa neḛ n’iya ne sə dee kəm neḛ ləm, neḛ n’uba dee ne n’ya̰ dee ne ji njéba̰je’g lə dee gə mba kar dee-deḛ lai d’wəi ne yoo-kiambas ləm tɔ. 24 N’ra sə dee gə goo mina̰ lə dee ləm, gə goo kaltaje lə dee ləm tɔ ndá neḛ n’iya sə dee kəm neḛ ya.
25 Gelee gə́ nee ɓa Mbaidɔmbaije gə́ Njesigənea̰ pa ne togə́bè pana: Ɓasinè n’a tel gə njé’g lə Jakob gə́ d’aw sə dee ɓee-ɓər’g lé ree sə dee ləm, n’a koo kəmtondoo lə gel-bɔje lə Israɛl lai ləma, n’a kaḭ bada dɔ ri neḛ gə́ to gə kəmee lé ləm tɔ. 26 Yen ŋga meḛ dee a kwəi dɔ rɔkul-boo’g lə dee ləm, gə dɔ kaltaje lai gə́ deḛ d’al ta neḛ’g loo gə́ deḛ d’isi gə́ majee mee ɓee’g lə dee ar dəw kára kara jɔg dee keneŋ el lé ləm tɔ. 27 Loo gə́ n’a kḭ sə dee mbuna koso-dəwje-dəwje’g ree sə dee ləm, loo gə́ n’a kḭ sə dee mee ɓee’g lə njéba̰je lə dee mbo̰ dee dɔ na̰’d ləm tɔ ndá deḛ ɓa d’a kunda neḛ gə kəmee kəm ginkoji dəwje gə raŋg gə́ bula ya. 28 Yee ɓa d’a gər ne to gə́ neḛ n’to Njesigənea̰, Ala lə dee gə́ n’aw sə dee ɓee-ɓər’g mbuna ginkoji dəwje gə raŋg’g ləm, gə n’tel mbo̰ dee dɔ na̰’d mee ɓee’g lə dee ləm tɔ, n’a kya̰ dəw lə dee kára kara mbuna ginkoji dəwje gə raŋg’g el ləm, 29 n’a kiya sə dee kəm neḛ el ŋga ləm tɔ. Mbata n’a kar ndil neḛ ɔm dɔ gel-bɔje’g lə Israɛl, Mbaidɔmbaije gə́ Njesigənea̰ ɓa pa bèe.
© Ngambai Bible © Alliance Biblique du Tchad 1989, 2015.
