Némḭdije gə́ wɔji dɔ karè gə́ kandə kagje to keneŋ lé
1 Mbaidɔmbaije gə́ Njesigənea̰ tɔjim némḭdi gə́ nee am m’oo ya tɔɓəi. Aa oo, karè gə́ kandə kagje gə́ ərə to keneŋ. 2 Yeḛ dəjim pana: Amɔs, see ɗi ɓa i oo wa.
Ma m’pana: To karè gə́ kandə kagje gə́ ərə to keneŋ.
Ndá Njesigənea̰ ulam pana: Ndəa lə koso-dəwje lə neḛ gə́ Israɛl lé rudee un ɗiao mba̰.
N’a kar mee neḛ oso lemsé dɔ dee’g el.
3 Mee ndəa gə́ neelé ndu pa gə́ mee kəi’g lə mbai lé
A tel to gə́ ndu no̰ gə kii,
Mbaidɔmbaije gə́ Njesigənea̰ ɓa pa bèe,
D’a kodo nin dəwje bula yaa̰
Kɔm gə looje lai,
Kar kaa mbi loo pa doi-doi.
4 Ooje ta nee, seḭ gə́ njerum njéndooje ləm,
Gə tujije njénékəmndooje ləm tɔ lé,
5 Seḭ pajena:
See ndɔ gə́ ra ɓa naḭ gə́ sigi a dəs
Mba kar sí ndogoje kó lé wa.
See ndɔ siri lé a godo kàr gə́ ban ɓa
Mba kar sí j’ɔr kó dàmá
Mba kaw ndogo wa.
J’a rəmje gə nékwɔji-né ləm,
Laree kara j’a karee ḭ dɔ maree’g ləma,
J’a kərje kəm dee gə nékwɔji-né gə́ ŋgɔm ləm tɔ,
6 Tɔɓəi j’a ndogoje njénékəmndooje gə lar ləm,
Njendoo kara j’a ndogoje ne négɔl ləma,
J’a ndogoje bina kó ləm tɔ.
7 Njesigənea̰ man rəa gə goo rɔnduba lə Jakob pana:
Tɔgərɔ ya, n’a kar mee neḛ wəi dɔ néra deeje gə́ kára kara el.
8 See gelee gə́ nee ɓa, dɔ naŋg neelé a yə ne el wa.
See njéɓeeje d’a si ne dan kəmndooyoo’g el wa.
Naŋg neelé bura a kḭ asəna gə baa bèe ləm,
Yee a kḭ ləm, a rəm ləm tɔ
Asəna gə baa gə́ Ejiptə bèe.
9 Mbaidɔmbaije gə́ Njesigənea̰ pa pana:
Mee ndəa’g neelé n’a kar kàr
Gə́ aar daŋdɔ bèe ya andə ləm,
Dan kàrá kara n’a kar dɔ naŋg ndul ndiŋ-ndiŋ ləm tɔ.
10 N’a kar loo-ra-naḭje lə sí tel to gə́ loo-yoo ləm,
Pakɔsje lə sí lai a tel to gə́ no̰ yoo ləm,
N’a kar sí ulaje kubu-kwa-ndòo reŋ sí’g lai ləma,
N’a kar dɔ sí lai àr ŋgori-ŋgori ləm tɔ.
N’a kar ɓee neelé wa ndòo
To gə́ d’wa ne ndòo lə ŋgon kára lə kea̰ bèe
Ndá rudee a to kasəna gə ndɔ meekad mbag-mbag bèe.
11 Mbaidɔmbaije gə́ Njesigənea̰ pa pana:
Aa ooje, mee ndəaje gə́ d’a gə teḛ lé
N’a kar ɓoo-boo gə́ a koso dɔ naŋg’g lé
A to ɓó gə́ wɔji dɔ muru əsé kunda
Gə́ wɔji dɔ mán gə́ godo lé el
Nɛ ɓó gə kunda neelé a to wɔji dɔ
Mal koo ta lə Njesigənea̰ ya goo kára ba.
12 D’a kila tar mbir-mbir
Kḭ ta baa-boo gə́ kára aw saar teḛ yee gə́ raŋg’d ləm,
D’a kḭ par gə́ dɔgel kaw saar bər ləma,
D’a kaw yo gə́ nee mba saŋg ta lə Njesigənea̰ ləm tɔ,
Nɛ d’a kiŋga el.
13 Mee ndəa’g neelé ŋgama̰dje gə́ maji péd-péd ləm, gə basaje ləm tɔ lé
D’a kwəi yoo-kunda mán ya.
14 Deḛ gə́ d’ubu rɔ dee dɔ kaiya’g lə Samari lé,
Deḛ gə́ pana:
Dan, maji kar magə ləi si gə ləbee-ləbee gə no̰,
Maji kar rəw lə Beer-Seba to gə no̰ lé
D’a t’oso nɛ d’a kḭ tar el tɔ.
© Ngambai Bible © Alliance Biblique du Tchad 1989, 2015.
