Jerusalem to asəna gə jo-lar gə́ wɔməs bèe
1 Mee ləb gə́ njekɔm’g jinaikara lé naḭ gə́ njekɔm’g dɔg ra ndɔ dɔg ndá Njesigənea̰ ulam ta gə rɔtaje nee pana: 2 I ŋgon-dəw lé, ndaŋg ndɔ neelé mee maktub’g, to ndɔ gə́ ɓogənè lé ya! Mbai gə́ Babilɔn un kudu kaḭ dɔ Jerusalem sub gə rɔ ya . 3 Maji kari un gosota pa ar gel-bɔje gə́ to njékɔsta-rəwje lé ula dee ne pana: Mbaidɔmbaije gə́ Njesigənea̰ pa togə́bè pana:
Wa dɔ gɔl jo-lar unda dɔ pər’d
Ɔm mán keneŋ.
4 Ɔm kɔr da keneŋ,
Kɔreje lai gə́ maji-maji gə́ to biŋgee gə kɔbee,
Ndá ɔm siŋgaje gə́ maji-maji keneŋ aree rusu tub.
5 Mbər ŋgon nékul gə́ maji wa,
Tɔɓəi tɔs kag gel jo’g,
Aree ndiri ɓugu-ɓugu
Ar siŋgaje gə́ mee jo’g lé kara iri yɔm-yɔm.
6 Gelee gə́ nee ɓa Mbaidɔmbaije gə́ Njesigənea̰ pa ne togə́bè pana:
Meeko̰ a koso dɔ ɓee-boo gə́ njekilaməs’g!
Yee to asəna gə jo-lar gə́ wɔməs gə́ ɔr el lé bèe!
Odo kɔr daje gə́ keneŋ lé kára-kára gə goo na̰ goo na̰
Ɓó ɔr kəm dee el.
7 Mbata məs gə́ deḛ d’ila lé
To mee ɓee’g,
Deḛ d’ɔm məs lé dɔ mbal gə́ raga ndəgəsə
Ɓó d’ɔm dɔ naŋg’d ɓa
D’a daa babur dɔ’g el.
8 Gə mba tɔji dee boo-oŋg lə neḛ ləm,
Gə mba dal ne ba̰ lə neḛ ləm tɔ lé
N’ɔm məs dee dɔ mbal gə́ raga ndəgəsə
Gə mba kar né on dəa el.
9 Gelee gə́ nee ɓa Mbaidɔmbaije gə́ Njesigənea̰ pa ne togə́bè pana:
Meeko̰ a koso dɔ ɓee gə́ njekilaməs’g!
Neḛ kara n’a ra loo-roo-dəwje gə́ boo.
10 Tuga kir dɔ na̰’d ula pər keneŋ
Ndiri ne da lé maji ləm,
Dusu kad keneŋ ləma,
Ar siŋgaje iri yɔm-yɔm ləm tɔ.
11 Unda jo-lar gə́ mée to kari lé dɔ pər’g
Mba karee nuŋga kəd-kəd
Kar larkas gə́ rəa’g lé
Taa pər làm-làm ləm,
Mba kar kwɔməs ləa lé léḛ o̰ pər.
12 Kula rɔ ndubu gə́ togə́bè lé
To né gə́ kari ba.
Mée gə́ wɔməs lé a kɔr el,
Pər ya ɓa a kɔree.
13 Kaiya ɓa to dan né gə́ mina̰ jɔmri-jɔmri’g ləi mbata neḛ ndiŋga rɔ neḛ mba kɔr né gə́ mina̰ jɔmri-jɔmri lé rɔi’g nɛ i tel àr ne el, i a kàr el ŋga saar n’a kar boo-oŋg lə neḛ aw ne lée’g béréré dɔi’g.
14 Neḛ Njesigənea̰ m’pata ndá né neelé a teḛ ya, n’a ra née ləm, n’a kya̰ gée el ləma, n’a koo kəmtondoo əsé n’a tel gə ndu neḛ el ləm tɔ. D’a gaŋg rəwta dɔi’g gə goo panjaai ləm, gə nérai ləm tɔ. Mbaidɔmbaije gə́ Njesigənea̰ ɓa pa bèe.
Kwəi lə dené lə Ejekiel
15 Njesigənea̰ ulam ta gə rɔtaje nee pana: 16 I ŋgon-dəw lé aa oo, neḛ n’a gə kɔs né gə́ to ŋgonkəmi lé gə yoo gə́ ndəd ya rɔd kɔree. Nɛ i a kwa ndòo el ləm, a no̰ el ləma, mán kəmi a koso teŋ el ləm tɔ. 17 Maji kari tuma̰ məəi’g ɓó wa ndòo yoo el ləm, ula jɔg dɔi’g ləm, ula né gɔli’g ləm, o̰ mbaitai gə né el ləma, o̰ muru lə njé gə́ raŋg el ləm tɔ.
18 Ma m’pata m’ar koso-dəwje gə ndɔ ndá kàrkemetag dené ləm wəi. Bèlè lookàree gə ndɔ ndá ma m’ra né gə́ Njesigənea̰ un ndia dɔ’g am lé. 19 Koso-dəwje dəjim pana: Né gə́ m’ra lé see m’a kɔr ginee gə́ wɔji dɔ dee kar dee d’oo el wa.
20 Ma m’ila dee keneŋ m’pana: Njesigənea̰ ulam ta gə rɔtaje nee pana: 21 Maji kam m’ula gel-bɔje lə Israɛl m’pana: Mbaidɔmbaije gə́ Njesigənea̰ pa togə́bè pana: Aa ooje, n’a gə kila ndɔl dɔ loo lə neḛ gə́ to gə kəmee gə́ to néti-rɔ dɔ siŋgamoŋ’d lə sí ləm, gə to ŋgonkəm sí ləma, gə né gə́ seḭ undaje dan kəm sí’g ləm tɔ. Ŋgan síje gə́ diŋgam gə njé gə́ dené gə́ seḭ ya̰ deeje lé d’a kwəi yoo-kiambas tɔ. 22 Seḭ a raje né to gə́ m’ra ya. Seḭ a kɔnje mbaita sí gə né el ləm, seḭ a ko̰je muru lə njé gə́ raŋg el ləm, 23 jɔg lə sí a to dɔ sí’g ya ləm, négɔlje lə sí a to gɔl sí’g ya ləm, seḭ a kwaje ndòo yoo el ləma, seḭ a no̰je el ləm tɔ. Nɛ seḭ a kundaje ndolè mbata néra majelje lə sí ləm, seḭ a tuma̰je ŋgururu-ŋgururu mbuna na̰’g ləm tɔ. 24 Ejekiel a to gə́ nétɔji mbata lə sí. Seḭ a raje né kaareeje asəna gə kea̰ béréré. Loo gə́ néje nee a teḛ ndá seḭ a gərje to gə́ neḛ n’to Mbaidɔmbaije gə́ Njesigənea̰ ya.
25 Nɛ ma ŋgon-dəw lé mee ndəa’g n’a tɔs nésiŋgamoŋ lə dee ləm, gə nérɔlel lə dee ləm, gə nérɔnduba lə dee ləm, gə né gə́ taa kəm dee rəgm ləm, gə né gə́ deḛ d’unda dan kəm dee’g ləma, gə ŋgan deeje gə́ diŋgam gə njé gə́ dené ləm tɔ lé rɔd-rɔd tɔr dee lé 26 mee ndəa’g neelé ya dəw gə́ teḛ ta rɔ’g pəd-pəd kára a ree rɔm’g ree kila taree mbim’g. 27 Mee ndəa’g neelé tam a teḛ kam m’pata gə dəw neelé ndá m’a pata ɓó m’a si mundu el ŋga. M’a to nétɔji mbata lə dee ndá deḛ d’a gər to gə́ neḛ n’to Njesigənea̰ ya.
© Ngambai Bible © Alliance Biblique du Tchad 1989, 2015.
