Ndərta gə́ gaŋg dɔ Ejiptəje’g
1 Mee ləb gə́ njekɔm’g dɔg lé naḭ gə́ njekɔm’g dɔg ra ndɔ dɔg-giree-joo ndá Njesigənea̰ ulam ta gə rɔtaje nee pana : 2 I ŋgon-dəw lé tel kəmi par gə́ rɔ Parao̰’g mbai gə́ Ejiptə tegginta wɔji ne dəa ləm, wɔji ne dɔ Ejiptəje lai ləm tɔ. 3 Maji kari pa pana: Mbaidɔmbaije gə́ Njesigənea̰ pa togə́bè pana: Aa oo, i Parao̰, mbai gə́ Ejiptə lé n’aw səi gə ta, i ɓəgərə-mar gə́ aw to mee baa-boo’g ləi lé i pana: Baa-boo ləi to kaḭ-i ya, i nja ɓa gə́ njerea lé! 4 N’a tuga ki ka tai’g ləm, n’a kar ka̰jije gə́ baa-boo’g ləi d’ul na̰ ŋgwɔii’g ləm tɔ ndá n’a ndɔri dan baa-boo’g ləi teḛ səi raga na̰’d gə ka̰jije gə́ keneŋ lai gə́ d’ul na̰ ŋgwɔii’g lé. 5 N’a rɔgi piriŋ kilai dɔdilaloo’g, i gə ka̰jije lai gə́ dan baa-boo’g ləi. I a koso mee ndɔje’g nɛ dəw a kuni kundai tar el ləm, a dubi el ləm tɔ. N’a kari tel to nésɔ lə daje gə yelje. 6 Yen ɓa dəwje gə́ Ejiptə lai d’a gər ne to gə́ neḛ n’to Njesigənea̰.
Mbata deḛ to kaar kó-ab gəd rɔ lə gel-bɔje lə Israɛl . 7 Loo gə́ d’uni ji dee’g ndá i təd ɔs dɔ tam dee riba ɓədədə-ɓədədə, loo gə́ deḛ gəd rɔ dee rɔi’g ndá i təd kəs-kəs ar ɓəd dee unda ndolé. 8 Gelee gə́ nee ɓa Mbaidɔmbaije gə́ Njesigənea̰ pa ne togə́bè pana: Aa oo, n’a kar dee ree rɔ səi gə kiambas ndá n’a tuji ne dəwje gə daje gə́ mee ɓee’g ləi lé pugudu-pugudu. 9 Ɓee gə́ Ejiptə a tel to dɔdilaloo gə́ wa ŋgɔ njag-njag ndá d’a gər to gə́ neḛ n’to Njesigənea̰ ya.
Mbata yeḛ pana: Baa-boo lé to ka̰ neḛ, neḛ ɓa gə́ njerea. 10 Gelee gə́ nee ɓa aa oo, neḛ n’aw səi-i gə baa-boo ləi gə ta tɔɓəi n’a kar ɓee gə́ Ejiptə tel to dɔdilaloo gə́ wa ŋgɔ njag-njag un kudee Migdɔl saar teḛ Sienə ləm, gə saar teḛ rəw-nimje gə́ Etiopi ləm tɔ. 11 Dəw kára kara a kila gɔlee keneŋ el ləm, da kára kara a kila gɔlee keneŋ el ləm tɔ. A to bèe ya lal kar dəw si keneŋ as ləb rɔ-sɔ. 12 N’a kar ɓee gə́ Ejiptə tel to dɔ nduba mbuna ɓeeje gə́ tuji pugudu-pugudu’g ləm, ɓee-booje ləa d’a kwa ŋgɔ njag-njag mbuna ɓee-booje gə́ wa ŋgɔ njag-njag ləm tɔ as ləb rɔ-sɔ. N’a tila Ejiptəje mbuna ginkoji dəwje gə raŋg’g ləm, n’a sané dee kad-kad mee ɓeeje’g ɓəd-ɓəd ləm tɔ.
13 Mbaidɔmbaije gə́ Njesigənea̰ pa togə́bè pana: Loo gə́ ləb rɔ-sɔ a kun ɗiao ndá n’a mbo̰ Ejiptəje mbuna koso-dəwje-dəwje gə́ neḛ n’sané dee keneŋ lé dɔ na̰’d. 14 N’a tel gə Ejiptəje gə́ d’aw sə dee ɓee-ɓər’g lé ree sə dee ndá n’a ree sə dee mee ɓee gə́ Patros gə́ to ɓee gə́ gin dee ḭ keneŋ tɔɓəi lé neelé ɓa d’a tum gin ɓeeko̰ gə́ kul kwɔji-kwɔji keneŋ tɔ. 15 Yee a to ɓeeko̰ gə́ əḭ el unda mareeje ndá yee a tel kur dɔ ginkoji dəwje gə raŋg’g el ŋga ləm, n’a rəm sə dee mba kar dee dum dɔ ginkoji dəwje gə raŋg el ŋga ləm tɔ. 16 Ɓeeko̰ neelé a to nékunda-mee-yel lə gel-bɔje lə Israɛl el ŋga, yee a kar meḛ dee olé dɔ néra kori-korije’g lə dee loo gə́ deḛ tel kəm dee gə́ rɔ Ejiptəje’g. Bèe ɓa d’a gər to gə́ neḛ n’to Mbaidɔmbaije gə́ Njesigənea̰ ya.
17 Mee ləb gə́ njekɔm’g rɔ-joo-giree-siri lé to ndɔ kára mee naḭ gə́ dɔtar lé ndá Njesigənea̰ ulam ta gə rɔtaje nee pana: 18 I ŋgon-dəw lé Nebukadnesar, mbai gə́ Babilɔn ar njérɔje ləa ra kula gə́ kədərə gə mba rɔ ne gə ɓee gə́ Tir, dɔ dəwje lai rəd peni-peni ləm, dɔ tam dee mbɔr mbɔji-mbɔji ləm tɔ, nɛ yeḛ əsé njérɔje ləa d’iŋga né kára gə́ nédɔji dee mee ɓee gə́ Tir’g dɔ kula gə́ deḛ ra mba rɔ ne səa lé el. 19 Gelee gə́ nee ɓa Mbaidɔmbaije gə́ Njesigənea̰ pa ne ta togə́bè pana: Aa oo, neḛ n’ar Nebukadnesar, mbai gə́ Babilɔn ɓee gə́ Ejiptə. Yeḛ a taa nébaoje gə́ keneŋ ləm, yeḛ a kunda dee banrɔ ləma, yeḛ a kodo nébanrɔje gə́ keneŋ ləm tɔ, yee ɓa a to nékoga-dɔ-ji njérɔje ləa ya. 20 Neḛ n’aree ɓee gə́ Ejiptə gə́ nékoga-dɔ-jia mbata rɔ gə́ yeḛ rɔ gə ɓee gə́ Tir, mbata deḛ ra kula d’am-ma. Mbaidɔmbaije gə́ Njesigənea̰ ɓa pa bèe.
21 Mee ndəa’g neelé n’a kar siŋga gel-bɔje lə Israɛl ḭ dɔ maree’g ləm, n’a kari teḛ tai pata dan dee’g ləm tɔ. Bèe ɓa d’a gər ne to gə́ neḛ n’to Njesigənea̰ lé ya.
© Ngambai Bible © Alliance Biblique du Tchad 1989, 2015.
