Tura gə́ deḛ tura bula lə Ləbije ləm, gə kula ra deeje ləm tɔ
1 Aa ooje, ŋgaka Aaro̰ gə Moyis mee ndəa gə́ Njesigənea̰ wɔji ne ta gə Moyis dɔ mbal gə́ Sinai lé ɓa nee: 2 Ri ŋgalə Aaro̰ ɓa nee: Nadab, ŋgondəree ləm, Abihu ləm, Eləajar ləma, gə Itamar ləm tɔ . 3 Yee neelé ɓa to ri ŋgalə Aaro̰ gə́ deḛ ndèm ubu dɔ dee’g d’ar dee to ne njékinjanéməsje ləm, gə d’unda dee gə kəmee mba kar dee ra ne kula gə́ wɔji dɔ nékinjanéməsje ləm tɔ. 4 Nadab gə Abihu d’wəi no̰ Njesigənea̰’g dɔdilaloo gə́ Sinai, deḛ neelé ŋgan deeje godo. Eləajar gə Itamar lé ɓa ra kula gə́ wɔji dɔ nékinjanéməsje kəm Aaro̰ gə́ to bɔ deeje lé .
5 Njesigənea̰ ula Moyis pana: 6 Ar ginkoji Ləbije rəm gə́ kédé ndá i a kunda dee no̰ Aaro̰ gə́ njekinjanéməs’g mba kar dee la səa dɔ kula’g. 7 Deḛ d’a la səa dɔ kula’g ləm, d’a ra kula kar koso-dəwje lai no̰ kəi-kubu-kiŋga-na̰’g lé tɔ, gə mba ra ne kulaje gə́ wɔji dɔ kəi gə́ to gə kəmee lé tɔ. 8 Nékulaje lai gə́ wɔji dɔ kəi-kubu-kiŋga-na̰ ləm, gə néje gə́ d’ɔm ji Israɛlje’g mba kar dee ŋgəm ləm tɔ lé d’a kaa dɔ dee kər-kər: d’a ra kula gə́ wɔji dɔ kəi-kubu lé togə́bè ya. 9 I a kɔm Ləbije lé ji Aaro̰’g gə ji ŋganeeje gə́ diŋgam’g, bèe ɓa Israɛlje lé d’a kunda dee ne gə kəmee bura kar dee ya. 10 I a kunda Aaro̰ gə ŋganeeje gə́ diŋgam mba kar dee tɔs kəm dee bao-bao dɔ kula gə́ wɔji dɔ dee loo-nékinjaməs’g lé, dəw gə́ raŋg gə́ aw keneŋ ndá d’a tɔlee gə́ tɔl ya.
11 Njesigənea̰ ula Moyis pana: 12 Aa oo, ma ya m’ɔr Ləbije mbuna Israɛlje’g tor ŋgandərje lai gə́ to ŋgandər Israɛlje gə́ d’oji dee doŋgɔr, bèe ɓa Ləbije lé d’a to ne kamaje ya doŋgɔ doi tɔ. 13 Mbata ŋgondər gə́ rara kara to kama ya doŋgɔ doi, mee ndəa gə́ m’unda ne ŋgandərje lai mee ɓee gə́ Ejiptə lé ma m’ɔr ŋgandər Israɛlje lai m’unda dee gə kəmee gə́ kamaje ya doŋgɔ doi, ŋgandər dəwje lai, gə ŋgandər daje ləm tɔ: d’a to kamaje ya doŋgɔ doi. Ma m’to Njesigənea̰ .
14 Njesigənea̰ ula Moyis ta dɔdilaloo gə́ Sinai pana: 15 Ar dee tura bula lə ŋgalə Ləbije, gə goo kəije lə bɔ deeje-je ləm, gə goo gel-bɔje lə dee lə dee ləm tɔ, i a kar dee tura bula lə njé gə́ diŋgam lai un kudee dɔ deḛ gə́ ra naḭ kára gə́ tar’g.
16 Moyis tura bula lə dee gə goo ndukun lə Njesigənea̰ ndá yeḛ ra gə goo ndukun gə́ yeḛ un aree lé ya. 17 Ri ŋgalə Ləbije lé ɓa to nee: Gerso̰ ləm, Keat ləma, gə Merari ləm tɔ. 18 Aa ooje, ŋgalə Gerso̰ gə goo gel-bɔje lə dee ɓa to nee: Libni gə Simei. 19 Aa ooje, ŋgalə Keat, gə goo gel-bɔje lə dee ɓa nee: Amram ləm, Jisəar ləm, Ebro̰ ləma, gə Ujiel ləm tɔ, 20 ri ŋgalə Merari, gə goo gel-bɔje lə dee ɓa nee: Mali gə Musi. Deḛ nja nee ɓa to gel-bɔje lə Ləbi gə goo kəije lə bɔ deeje-je lé.
21 Ŋgaka Gerso̰ lé to ka gel-bɔje lə Libni gə Simei ləm tɔ, deḛ nee ɓa d’ore dee na̰’d ɓar dee gel-bɔje lə Gerso̰je. 22 Deḛ gə́ tura bula lə dee un kudee dɔ njé gə́ diŋgam gə́ ra naḭ kára gə́ tar lé d’as dəwje tɔl-dɔg-loo-siri dɔ dee tɔl-mi (7.500). 23 Gel-bɔje lə Gerso̰je lé d’isi gir kəi-kubu’g par gə́ dɔ-gó. 24 Mbai dɔ gel-bɔje lə Gerso̰je lé ria lə Eliasap, ŋgolə Lael. 25 Kula gə́ wɔji dɔ ŋgalə Gerso̰ lé to kaa dɔ loo gə́ to gə kəmee doi ləm gə kəi-kubu-kiŋga-na̰ gə né kila dɔ’g ləm gə pal-kubu gə́ tɔ ta kəi’g lé ləm tɔ, 26 pal-kubuje gə́ deḛ d’ila gə́ ndògo gə kubu gə́ tɔ tarəwkɔg’d ləm, gə looje gə́ gugu dɔ kəi gə́ to gə kəmee gə loo-nékinjaməs ləma, gə kulaje lai gə́ ra ne kula kəi-kubu lé ləm tɔ.
27 Ŋgaka Keatje lé to gel-bɔje lə Amramje ləm, gel-bɔje lə Jisəarje ləm, gel-bɔje lə Ebro̰je ləma, gə gel-bɔje lə Ujielje ləm tɔ, deḛ ɓa d’ore dee na̰’d ɓar dee gel-bɔje lə Keatje ya. 28 Loo gə́ deḛ tura njé gə́ diŋgam lai un kudee dɔ deḛ gə́ ra nai kára gə́ tar ndá d’as dəwje tɔl-dɔg-loo-jinaijoo gə dɔ dee tɔl-misa̰ (8.600) ɓa, d’ɔm kula gə́ wɔji dɔ kəi gə́ to gə kəmee ji dee’g. 29 Gel-bɔje lə ŋgalə Keat d’isi par gə́ dɔkɔl lə kəi-kubu lə Ala. 30 Mbai dɔ kəi lə bɔ lə Keatje lé ria lə Elisapan, ŋgolə Ujiel. 31 Néje gə́ d’ɔm ji dee’g ɓa nee: Sa̰duk ləm, tabul ləm, kag pərndɔje ləm, loo-nékinjaməs gə loo-tuu-né gə́ ə̰də sululu ləm, nékulaje gə́ wɔji dɔ kəi gə́ to gə kəmee mba kar dee ra ne kula keneŋ ləma, gə kubu gaŋg mee kəi gə néje gə́ wɔji dəa ləm tɔ.
32 Mbai dɔ mbaije lə Ləbije lé ria lə Eləajar, ŋgolə Aaro̰ gə́ njekinjanéməs lé, yeḛ nja aa dɔ deḛ gə́ ra kula mee loo gə́ to gə kəmee’g.
33 Ŋgaka Merarije lé to gel-bɔje lə Mali gə gel-bɔje lə Musi, deḛ ɓa d’ore dee na̰’d ɓar dee gel-bɔje lə Merarije. 34 Deḛ gə́ tura bula lə dee, un kudee dɔ njé gə́ diŋgam gə́ ra naḭ kára gə́ tar d’as dəwje tɔl-dɔg-loo-misa̰ gə dɔ dee tɔl-joo lé (6.200). 35 Mbai dɔ gel-bɔje lə Merari lé ria lə Suriel, ŋgolə Abihayil. Deḛ d’isi par gə́ dɔgel lə kəi-kubu lé. 36 Néje gə́ d’ɔm ji ŋgalə Merari’g mba kar dee ŋgəm ləm, mba kar dee d’aa dɔ dee kər-kər ləm tɔ lé ɓa nee: Kagje gə́ ra ne kəi gə́ to gə kəmee ləm, kunda kagje ləa ləm, guburu-kagje ləa gə bəgərəjə gə́ ka̰ tula gel dee’g ləma, gə nékulaje lai gə néje lai gə́ wɔji dəa ləm tɔ, 37 guburu-kagje lə ndògo gə́ gugu dəa sub ləm, gə bəgərəjə gə́ tula gel dee’g ləma, gə kagje lə dee gə́ ɓər naŋg, gə kulaje lə dee ləm tɔ.
38 Moyis gə Aaro̰ gə ŋganeeje gə́ diŋgam d’isi no̰ kəi-kubu’g par gə́ bər, no̰ kəi-kubu-kiŋga-na̰’g, par gə́ loo kuba gə́ lə kàr. Né gə́ d’ya̰ ji Israɛlje’g lé dəw gə́ raŋg gə́ tibi mbɔree ndá d’a tɔlee gə́ tɔl ya. 39 Ləbije lai gə́ Moyis gə Aaro̰ tura dee, gə goo ndukun lə Njesigənea̰ gə́ un ar dee, gə goo gel-bɔje lə dee lə dee lé, njé gə́ diŋgam lai un kudee dɔ deḛ gə́ ra naḭ kára’d gə́ tar lé d’as dəwje tɔl-dɔg-loo rɔ-joo giree-joo (22.000).
Ləbije taa tor ŋgandər Israɛlje
40 Njesigənea̰ ula Moyis pana: Tura bula lə ŋgandərje gə́ diŋgam lai mbuna Israɛlje’g, un kudee dɔ deḛ gə́ ra nai kára’d gə́ tar ndá tura dee gə goo ri dee ri dee. 41 I a kɔr Ləbije gə́ kama, Njesigənea̰, tor ŋgandər Israɛlje lai ləm, gə nékulje lə Ləbije tor ŋgandər nékulje’g lə Israɛlje lai ləm tɔ.
42 Moyis tura bula lə ŋgandərje lai mbuna Israɛlje’g gə goo ndukun gə́ Njesigənea̰ un aree lé. 43 Ŋgandərje gə́ diŋgam lai gə́ deḛ tura dee gə ri dee ri dee, un kudee dɔ deḛ gə́ ra nai kára’d gə́ tar lé d’as dəwje tɔl-dɔg-loo rɔ-joo giree-joo gə dɔ dee tɔl-joo gə rɔ-siri-gir-dee-munda (22.273).
44 Njesigənea̰ ula Moyis pana: 45 Ɔr Ləbije tor ŋgandər Israɛlje’g lai ləm, gə nékulje lə Ləbije tor nékulje’g lə dee ləm tɔ, ndá Ləbije lé d’a to kamaje ya doŋgɔ doi. Ma m’to Njesigənea̰. 46 Mba kuga ne dɔ Israɛlje gə́ tɔl-joo gə dɔ dee rɔ-siri giree-munda (273) gə́ bula d’unda Ləbije lé 47 i a taa ŋgan lar mi-mi mbata lə dəw kára-kára, i a taa lar lé gə goo lar lə loo gə́ to gə kəmee gə́ kwɔiyee as ŋgan nékwɔji kwɔi-lə-né dɔg. 48 Lar neelé i a kar Aaro̰ gə ŋganeeje gə́ diŋgam mba kuga ne dɔ deḛ gə́ bula lə dee al dɔ bula lə Ləbije lé.
49 Moyis taa lar lé mba kuga ne dɔ deḛ gə́ bula lə dee al dɔ bula lə dəwje gə́ Ləbije ɓa d’uga dɔ dee lé, 50 yeḛ taa lar lé ji ŋgandər Israɛlje’g as bèe: ŋgan lar tɔl-dɔg-loo kára gə dəa tɔl-munda gə dəa rɔ-misa̰-giree-mi (1.365), gə goo ŋgan lar lə loo gə́ to gə kəmee lé. 51 Lar kuga dɔ dee lé Moyis ar Aaro̰ gə ŋganeeje gə́ diŋgam gə goo ndukun lə Njesigənea̰, tɔɓəi Moyis ra togə́bè gə goo ndukun gə́ Njesigənea̰ un aree lé ya.
© Ngambai Bible © Alliance Biblique du Tchad 1989, 2015.
