Godndu gə́ wɔji dɔ kɔr won ba̰ji
1 Njesigənea̰ ula Moyis pana:
2 Godndu gə́ a kwɔji dɔ njeba̰ji mee ndəa gə́ d’a kɔr won ba̰ji rəa’g lé ɓa nee. D’a kaw səa rɔ njekinjanéməs’g . 3 Njekinjanéməs lé a teḛ gir loo-si dee gə́ raga, tɔɓəi yeḛ a tən njeba̰ji lé tɔ. Ɓó lé njeba̰ji lé doo ba̰ji ər rəa’g kəmsə ndá 4 njekinjanéməs lé a kun ndia mba kar dee ree gə yelje joo gə́ d’aw kəmba ləm, d’àr ŋgad-ŋgad ləm tɔ, gə barkəm kag-sɛdrə, gə kúla gə́ kas njir-njir, gə gərgənd to mbata lə yeḛ gə́ kəm kɔr won rɔko̰ rəa’g lé. 5 Njekinjanéməs a kun ndia mba kar dee d’inja gwɔb yel kára dɔ jo’d gə́ d’ɔm mán gə́ àr yal-yal keneŋ lé tɔ. 6 Yeḛ a kwa yel gə́ kəmba lé ləm, a kun barkəm kag-sɛdrə ləm, gə kúla gə́ kas njir-njir ləma, gə gərgənd ləm tɔ, yeḛ a kula dee na̰’d gə yel gə́ kəmba lé dan məs yel’d gə́ d’inja gwɔbee dɔ mán gə́ àr yal-yal’g lé. 7 Yeḛ a saga néje neelé gɔl siri dɔ yeḛ gə́ kəm kɔr won ba̰ji rəa’g lé. Tɔɓəi yeḛ a pa njaŋg pana: To dəw gə́ àr ndá yeḛ a kila yel gə́ kəmba lé tar karee aw. 8 Yeḛ gə́ d’ɔr won rəa lé a togo kubuje ləa ləm, a ndisa bḭ reaje bur-bur ləma, a ndogo mán ləm tɔ, ndá yeḛ a to dəw gə́ àr. Gée gə́ gogo yeḛ a kaskəm kandə loo-si dee’g, nɛ a si gir kəi-kubu’g ləa gə́ raga as ndɔ siri ɓəi. 9 Ndɔ gə́ njekɔm’g siri lé yeḛ a ndisa bḭ reaje bur-bur, dəa ləm, mbai təa ləma, bḭ dɔ kəmee ləm tɔ, yeḛ a ndisa bḭ reaje lai-lai ya, yeḛ a togo kubuje ləa ləm, a ndogo mán ləm tɔ ndá yeḛ a kàr ne ya.
10 Ndɔ gə́ njekɔm’g jinaijoo lé yeḛ a ree gə ŋgan badje joo gə́ rɔ dee mina̰ el ləm, gə ma̰də badə gə́ ra ləb kára ba gə́ rəa mina̰ el ləm, gə nékar gə́ to nduji gə́ ndá léréré as nékwɔji kwɔi-lə-né jinaijoo gə́ mbɔḭ gə ubu ləma, gə ubu as ges litər kára ləm tɔ. 11 Njekinjanéməs gə́ njekɔr won rɔko̰ neelé a ree gə dəw gə́ kəm kɔr won rɔko̰ rəa’g neelé gə néje lai neelé no̰ Njesigənea̰’g tarəw kəi-kubu-kiŋga-na̰’g. 12 Njekinjanéməs lé a kwa ŋgon badə kára ndá yeḛ a kḭjá gə́ nékinjaməs gə́ wɔji dɔ ta gə́ wa dəa lé a kun ubu as ges litər kára tɔ, yeḛ a ra nduree no̰ Njesigənea̰’g mba kundá ne gə kəmee. 13 Yeḛ a kinja gwɔb ŋgon badə loo gə́ d’aw d’inja gwɔb daje gə́ wɔji dɔ ka̰ kuga dɔ kaiya ləm, gə nje gə́ ka̰ roo ləm tɔ keneŋ, loo gə́ to gə kəmee lé, mbata nékinjaməs gə́ wɔji dɔ ta gə́ wa dɔ dəw lé to asəna gə nékinjaməs gə́ wɔji dɔ kuga dɔ kaiya bèe tɔ ndá da neelé to mbata lə njekinjanéməs lé, to né gə́ to gə kəmee doi ya. 14 Njekinjanéməs lé a kun məs da gə́ wɔji dɔ ta gə́ wa dɔ dəw lé, a rad məs neelé gel mbi yeḛ gə́ kəm kɔr won rɔko̰ rəa’g lé gə́ dɔkɔl ləm, gə ko̰ jia gə́ dɔkɔl ləma, gə ko̰ gɔlee gə́ dɔkɔl ləm tɔ. 15 Njekinjanéməs lé a kun ubu gə́ as ges litər kára ndá a kɔm lam mee ŋgo jia’g gə́ dɔgel. 16 Njekinjanéməs lé a kula ŋgaw jia gə́ dɔkɔl dan ubu gə́ to mee ŋgo jia’g gə́ dɔgel lé ndá yeḛ a sɔb ubu lé no̰ Njesigənea̰’g as gɔl siri. 17 Njekinjanéməs lé a rad ges ubu gə́ nai jia’g lé gel mbi dəw gə́ yeḛ a gə kɔr won rɔko̰ rəa’g lé gə́ dɔkɔl ləm, gə ko̰ jia gə́ dɔkɔl ləma, gə ko̰ gɔlee gə́ dɔkɔl ləm tɔ, dɔ məs da gə́ ka̰ ta gə́ wa dɔ dəw lé. 18 Njekinjanéməs lé a kɔm ges ubu gə́ nai jia’g lé dɔ yeḛ gə́ ɔr won rɔko̰ rəa’g ndá, yeḛ a ra bèe mba kuga ne dɔ kaiya ləa no̰ Njesigənea̰’g. 19 Tɔɓəi njekinjanéməs lé a kinja nékinjaməs gə́ ka̰ kuga dɔ kaiya lé, yeḛ a ra bèe mba kuga ne dɔ kaiya lə yeḛ gə́ ɔr won né gə́ mina̰ gə́ rəa’g lé tɔ. 20 Gée gə́ gogo yeḛ a kinja nékinjaməs gə́ ka̰ roo. Njekinjanéməs lé a kinja nékinjaməs gə́ ka̰ roo ləm, a kun nékar gə́ to nduji ləm tɔ ndá a kɔm dee loo-nékinjaməs’g, yeḛ a ra bèe mba kuga ne dɔ kaiya lə dəw neelé ndá yeḛ a kàr ya.
Kɔr won ba̰ji rɔ njeba̰ji gə́ to njendoo
21 Ɓó lé yeḛ to gə́ njendoo gə́ nékiŋgaje ləa as el ndá yeḛ a kwa ŋgon badə kára ba gə́ nékinjaməs gə́ ka̰ ta gə́ wa dəa loo gə́ dee ra nduree mba kundá ne gə kəmee kuga ne dɔ kaiya ləa lé. Yeḛ a kɔr nduji gə́ ndá léréré as nékwɔji kwɔi-lə-né munda gə́ mbɔḭ gə ubu gə́ nékar ləm, gə ubu as ges litər kára ləm tɔ. 22 Yeḛ a kwa dərndaje joo əsé ŋgan dərkulje joo to gə goo nékiŋgaje ləa, yeḛ gə́ kára mbata nékinjaməs gə́ ka̰ kuga dɔ kaiya ləm, yeḛ gə́ kára mbata nékinjaməs gə́ ka̰ roo ləm tɔ. 23 Ndɔ gə́ njekɔm’g jinaijoo lé yeḛ a kodo néje lai gə́ wɔji dɔ kɔr ne won rɔko̰ rəa’g neelé a kaw ne rɔ njekinjanéməs’g tarəw kəi-kubu-kiŋga-na̰’g no̰ Njesigənea̰’g. 24 Njekinjanéməs lé a kwa ŋgon badə gə́ nékinjaməs gə́ wɔji dɔ ta gə́ wa dəa ləm, a kun ubu as ges litər kára ləm tɔ ndá yeḛ a kula dee yo gə́ nee no̰ Njesigənea̰’g mba kunda dee ne gə kəmee. 25 Yeḛ a kinja gwɔb ŋgon badə gə́ ka̰ ta gə́ wa dɔ debee gə́ al dɔ godndu lé. Njekinjanéməs lé a kun məs da gə́ ka̰ ta gə́ wa dəa lé ndá yeḛ a rad məs neelé gel mbi yeḛ gə́ ɔr won rɔko̰ rəa’d gə́ dɔkɔl ləm, gə ko̰ jia gə́ dɔkɔl ləma, gə ko̰ gɔlee gə́ dɔkɔl ləm tɔ. 26 Njekinjanéməs lé a kɔm ubu mee ŋgo jia gə́ dɔgel’g. 27 Njekinjanéməs lé ubu gə́ to mee ŋgo jia gə́ dɔgel’g lé a sɔb gə ŋgaw jia gə́ dɔkɔl no̰ Njesigənea̰’g as gɔl siri. 28 Njekinjanéməs lé a rad ubu gə́ to mee ŋgo jia’g neelé gel mbi dəw gə́ yeḛ ɔr won rɔko̰ rəa’d gə́ dɔkɔl ləm, ko̰ jia gə́ dɔkɔl ləma, gə ko̰ gɔlee gə́ dɔkɔl ləm tɔ, lé gə́ yeḛ rad məs da gə́ wɔji dɔ ta gə́ wa dəa wɔji dɔ kal dɔ godndu keneŋ. 29 Njekinjanéməs lé a kɔm ges ubu gə́ nai mee ŋgo jia’g lé dɔ yeḛ gə́ ɔr won rɔko̰ rəa’g lé mba kuga ne dɔ kaiya ləa no̰ Njesigənea̰’g tɔ. 30 Tɔɓəi yeḛ a kinja dərnda gə́ kára əsé ŋgon dərkul gə́ kára gə́ debee neelé iŋga lé 31 yee gə́ kára gə́ nékinjaməs gə́ ka̰ kuga dɔ kaiya ləm, yee gə́ kára gə́ ka̰ roo ləma, gə nékar lé na̰’d ləm tɔ ndá njekinjanéməs a ra bèe mba kuga ne dɔ kaiya lə dəw gə́ yeḛ ɔr won rɔko̰ rəa’g no̰ Njesigənea̰’g lé.
32 Yee ɓa gə́ godndu gə́ wɔji dɔ kɔr won rɔko̰ rɔ yeḛ gə́ doo ba̰ji to rəa’g nɛ nékiŋgaje ləa as el lé.
Kaar kəi gə́ wa moro
33 Njesigənea̰ ula Moyis gə Aaro̰ pana:
34 Loo gə́ seḭ a ka̰dje mee ɓee gə́ Kana̰ gə́ ma m’ar sí gə́ ka̰ sí-seḭ lé ndá ɓó lé ma m’ar moro wa dɔ kəi kára mee ɓee gə́ to ka̰ sí-seḭ ndá 35 dəw gə́ njekəi lé a kaw mba kula njekinjanéməs taree təsərə pana: Ma m’oo né asəna gə moro bèe mee kəi’g ləm. 36 Ɓad ɓa gə mba kar njekinjanéməs lé andə keneŋ mba tən moro neelé ɓəi ndá yeḛ a kun ndia kar dee d’ɔr néje lai gə́ to mee kəi’g neelé d’unda raga gə mba kar néje lai gə́ to keneŋ lé tel to néje gə́ mina̰. Gée gə́ gogo ɓa, njekinjanéməs lé a kandə keneŋ mba tən kəi neelé ɓəi. 37 Njekinjanéməs lé a tən moro lé. Ɓó lé yeḛ oo to gə́ kaar kəi lé godəje gə́ ɔb wə əsé kas gəḭ to keneŋ ləm, gə uru ŋgudu-ŋgudu ləm tɔ ndá 38 yeḛ a kunda loo mee kəi’g neelé teḛ, tɔɓəi loo gə́ yeḛ aar tarəwkəi gə́ raga ndá a kar dee d’udu takəi neelé as ndɔ siri. 39 Ndɔ gə́ njekɔm’g siri lé njekinjanéməs lé a tel kaw keneŋ. Ɓó lé yeḛ oo to gə́ moro lé ndusu kaar kəi lé gə́ kédé-kédé ndá 40 yeḛ a kun ndia kar dee tɔr kɔr mbalje gə́ rɔko̰ neelé to keneŋ ləm, a kar dee d’aw d’ɔm dee gir ɓee gə́ raga loo gə́ mina̰’g ləm tɔ. 41 Yeḛ a kar dee kər mee kəi neelé kər-kər ndá bum naŋg gə́ deḛ kər lé d’a kwa rəw-rəw kaw kɔm gir ɓee gə́ raga, loo gə́ mina̰’g. 42 D’a kodo kɔr mbalje gə́ raŋg mba tula dee tor nje gə́ kédé’g tɔɓəi d’a kodo bɔrɔ gə́ raŋg mba rḛdə ne mee kəi lé mbiao̰-mbiao̰ tɔ.
43 Loo gə́ deḛ tɔr kɔr mbalje ləm, kər ləma, gə rḛdə mee kəi lé mbiao̰-mbiao̰ ləm tɔ ɓa ɓó lé moro neelé tel ree taa loo mee kəi’g lé pəl-pəl tɔɓəi ndá 44 njekinjanéməs lé a tel kaw keneŋ gogo ɓəi. Ɓó lé yeḛ oo to gə́ moro lé wa mee kəi gə́ ləw ba ndá kəi lé mina̰ ya. 45 D’a tɔ kəi neelé pɔs-pɔs, kɔr mbalje ləm, gə kagje ləma, gə bɔrɔ gə́ rḛdə ne mee kəi lé ləm tɔ, d’a kodo néje nee lai-lai kaw ne gir ɓee gə́ raga kaw kɔm dee loo gə́ mina̰’g.
46 Nana ɓa gə́ andə mee kəi’g neelé mee ndəaje’g lai gə́ təa to gə loo kudee lé ndá rəa a mina̰ ne saar kar kàr a kandə. 47 Nana ɓa gə́ to mee kəi’g neelé ndá a togo kubuje ləa, nana ɓa gə́ sɔ né mee kəi’g neelé kara a togo kubuje ləa ya tɔ.
48 Ɓó lé njekinjanéməs gə́ tel aw mee kəi’g neelé oo to gə́ moro neelé aw gə́ kédé-kédé el, loo gə́ deḛ rḛdə mee kəi neelé mbiao̰-mbiao̰ mba̰ ndá yeḛ a pa njaŋg pana: Kəi neelé àr mbata moro lé godo keneŋ ŋga.
49 Yeḛ a kwa yelje joo ləm, a kun barkəm kag-sɛdrə ləm, gə kúla gə́ kas njir-njir ləma, gə gərgənd ləm tɔ, mba kɔr ne won moro mee kəi’g neelé. 50 Yeḛ a kinja gwɔb yee gə́ kára dɔ jo’d gə́ d’ɔm mán gə́ àr yal-yal keneŋ. 51 Yeḛ a kodo barkəm kag-sɛdrə ləm, gə gərgənd ləm, gə kúla gə́ kas ləma, a kwa yel gə́ kəmba ləm tɔ, yeḛ a kula dee dan məs yel gə́ d’inja gwɔbee dɔ mán gə́ àr yal-yal’g lé ndá yeḛ a saga məs néje neelé gɔl siri dɔ kəi’g lé. 52 Yeḛ a kɔr won moro gə́ mee kəi’g neelé gə məs yel ləm, gə mán gə́ àr yal-yal ləm, gə yel gə́ kəmba ləm, gə barkəm kag-sɛdrə ləm, gə gərgənd ləm, gə kúla gə́ kas gəḭ ləm tɔ. 53 Yeḛ a kila yel gə́ kəmba lé tar gir ɓee gə́ raga karee aw. Yeḛ a ra togə́bè mba kɔr ne ta dɔ kəi’g neelé ndá kəi lé a kàr ya.
54 Yee ɓa gə́ godndu gə́ wɔji dɔ doo ba̰ji gə́ rara kara ləm, gə ŋgər ləm, 55 gə moro gə́ wa kubuje gə kəije ləm, 56 gə luje ləm, gə rɔko̰ kḭ ŋgwɔije ləma, gə nétila rɔje ləm tɔ: 57 Godndu neelé ndoo sí gə mba kar sí jeḛ n’gər ne loo gə́ né mina̰ əsé né àr’g. Yee ɓa to godndu gə́ wɔji dɔ ba̰ji ya.
© Ngambai Bible © Alliance Biblique du Tchad 1989, 2015.
