Godndu gə́ wɔji dɔ njékinjanéməsje
Nékinjaməs gə́ ka̰ roo
1 Njesigənea̰ ula Moyis pana: 2 Un ndui ar Aaro̰ gə ŋganeeje pana:
Aa ooje godndu gə́ wɔji dɔ nékinjaməs gə́ ka̰ roo lé ɓa to nee:
Nékinjaməs lé a nai dɔ pər’d loo-nékinjaməs’g loondul’g saar kar loo àr ndá d’a kɔs pər gelee’g ta-ta karee wəi el. 3 Njekinjanéməs lé a kula kubu ləa gə́ ŋgal yududu gə́ d’ṵji gə kúla palégal ləm, gə kubu bulaa ləm tɔ ndá yeḛ a kɔr bu pər gə́ roo ne nékinjaməs gə́ ka̰ roo loo-nékinjaməs’g lé kɔm mbɔr loo-nékinjaməs’g lé ya. 4 Tɔɓəi yeḛ a kɔr kubuje neelé kya̰ kula njé gə́ raŋg rəa’g mba kodo ne bu neelé kaw ne gir loo-si dee gə́ raga, loo gə́ d’unda gə kəmee lé. 5 Pər lé a ko̰ loo-nékinjaməs’g lé ta-ta ɓó a kwəi nda̰ el. Teḛ gə ndɔ gə ndɔje kára-kára lai ya njekinjanéməs lé a kula kir pər’d ləm, a kɔm nékinjanéməsje gə́ ka̰ roo keneŋ ləma, a roo ubu nékinjanéməsje gə́ ka̰ kɔm na̰’d keneŋ ləm tɔ. 6 Pər lé a ko̰ loo-nékinjaməs’g lé ta-ta ɓó a kwəi nda̰ el.
Nékar gə́ to nduji
7 Aa ooje, godndu gə́ wɔji dɔ nékar gə́ to nduji ɓa to nee: Ŋgalə Aaro̰ lé d’a kaw ne no̰ Njesigənea̰’g no̰ loo-nékinjaməs’g lé ya. 8 Njekinjanéməs lé a kɔr nduji gə́ ndá léréré gə́ podè gə ubu ləm, gə néje lai gə́ ə̰də sululu gə́ ɔm dɔ’g ləm tɔ as ŋgo jia kára ndá a roo dee loo-nékinjaməs’g asəna gə nékolé-mee bèe gə́ baḭyee ə̰də lel Njesigənea̰. 9 Gesee gə́ nai lé Aaro̰ gə ŋganeeje d’a sɔ, d’a sɔ lal kila əm-tiné keneŋ loo gə́ to gə kəmee’g, gadloo gə́ kəi-kubu-kiŋga-na̰’g. 10 D’a kila mee əb’g lal kila əm-tiné keneŋ. To ges nékarje gə́ ka̰ roo gə́ d’am ma nja ɓa m’ar dee gə́ ka̰ dee-deḛ lé. To né gə́ to gə kəmee doi asəna gə nékinjanéməsje gə́ ka̰ kiŋga meekoso lemsé ləm, gə mba kɔr ne ta gə́ wa dɔ dəw ləm tɔ. 11 Ŋgaka Aaro̰ lai gə́ diŋgam lé d’a sɔ né neelé. Yee ɓa to gə́ godndu gə́ to gə no̰ mbata lə ŋgaka síje gə́ kédé-kédé wɔji dɔ nékarje gə́ ka̰ roo no̰ Njesigənea̰’g lé, nana ɓa gə́ ɔrɔ rɔ néje neelé ndá yeḛ a to gə kəmee ya tɔ.
12 Njesigənea̰ ula Moyis pana:
13 Aa oo, nékarje gə́ Aaro̰ gə ŋganeeje d’a ree ne kar Njesigənea̰ mee ndəa gə́ d’a tər ne ubu dɔ dee’g lé ɓa to nee: nduji gə́ ndá léréré as nékwɔji kwɔi-lə-né sɔ, yee ɓa a to nékar gə́ to nduji gə́ to gə no̰ lé ndá d’a ree gə gesee gə ndɔ ləm, gə gesee gə́ kàrkametag ləm tɔ. 14 D’a kila mee əb’g gə ubu ndá loo gə́ ɔb mba̰ ɓa i a ree ne ɓəi, mbə gə́ d’ila lé i a təd dana gə́ gajeeje ɓa ree ne ɓəi, karee to asəna gə nékar gə́ baḭyee ə̰də lel Njesigənea̰ bèe. 15 Njekinjanéməs gə́ mbuna ŋgalə Aaro̰’d gə́ d’a gə tər ubu dəa’g gə mba karee taa toree lé yeḛ nja kara a ree gə nékar neelé togə́bè ya tɔ. Yee ɓa to godndu gə́ to gə no̰, no̰ Njesigənea̰’g: d’a roo bura ya. 16 Nékar gə́ rara gə́ to kó gə́ njekinjanéməs a kun kar lé d’a roo bura ya ɓó d’a sɔ el.
Nékinjaməs gə́ wɔji dɔ kɔr ta dɔ dəw’g
17 Njesigənea̰ ula Moyis pana: 18 Ula Aaro̰ gə ŋganeeje pana:
Aa ooje, godndu gə́ wɔji dɔ nékinjaməs gə́ ka̰ kiŋga meekoso lemsé lé ɓa to nee:
Loo gə́ d’inja gwɔb nékinjaməs gə́ ka̰ roo keneŋ lé lée neelé ɓa d’a kinja gwɔb nékinjaməs gə́ ka̰ kiŋga meekoso lemsé no̰ Njesigənea̰’g keneŋ bèe ya to: to né gə́ to gə kəmee doi ya. 19 Njekinjanéməs gə́ a kinja da gə́ ka̰ kiŋga meekoso lemsé neelé a sɔ mee loo gə́ to gə kəmee’g, dan mee loo gə́ to tarəw kəi-kubu-kiŋga-na̰’g. 20 Nana ɓa gə́ ɔrɔ rɔ dakas da neelé a to gə kəmee. Ɓó lé məsee uba tiriri ɔm dɔ kubu’g ndá lé gə́ məs ɔm keneŋ lé d’a togo mee loo gə́ to gə kəmee’g lé ya. 21 Jo gə́ deḛ ndiri ne da neelé ndá d’a kunda pɔs-pɔs tɔ, ɓó lé to jo larkas ɓa deḛ ndiri ne ndá d’a kusu mée togo gə mán sugu-sugu ya. 22 Diŋgamje gə́ to njékinjanéməsje ya ba ɓa d’a sɔ né neelé, to né gə́ to gə kəmee doi ya. 23 Nɛ da-kul gə́ rara ɓa gə́ to ka̰ kiŋga meekoso lemsé mee kəi-kubu-kiŋga-na̰’g mba karee iŋga meekoso lemsé gə́ to gə kəmee lé d’a sɔ el, d’a roo gə́ roo ya.
© Ngambai Bible © Alliance Biblique du Tchad 1989, 2015.
