Jonatan ula Dabid ta némajel gə́ Sawul wɔji mba ra səa lé
1 Dabid ḭ Najot gə́ to mbɔr Rama’g lé aḭ. Yeḛ aw iŋga Jonatan dəjee pana: See ɗi ɓa m’ra wa. Néram gə́ gə goo rəbee el lé to ɗi wa. See kaiya ɗi ɓa m’ra kəm bɔbije’g ɓa yeḛ ndigi kam m’udu ne wa.
2 Jonatan tel ilá keneŋ pana: Wah! bèe el! I a kwəi el. Baumje lé a gə ra né gə́ boi əsé né gə́ lam kara yeḛ lal kulam taree el. Nɛ See gelee ban ɓa yeḛ a kiya səm dɔ yee gə́ nee lal kam m’oo ɓəi wa. To ta gə́ kari ba.
3 Dabid pa ya tɔɓəi gə rɔkubu pana: Bɔbije gər gao to gə́ ma m’taa kəmi rəgm ndá yeḛ a pana: Maji kar dee d’ar Jonatan oo el nà a kar mée ea̰. Nɛ to gə́ Njesigənea̰ si kəmba ləm, i ya kara si kəmba ya ləm tɔ ndá ma kulai to gə́ ta yoom nai tebdé ba bèe ya.
4 Jonatan ula Dabid pana: Né gə́ i ndigi ndá m’a ra kari ya.
5 Dabid tel ilá keneŋ pana: Aa oo, bèlè ndá a to ndɔ ra naḭ gə́ teḛ sigi ndá to kəm kam m’isi gə mbai na̰’d ta nésɔ’g ya. Nɛ ya̰’m am m’aw m’iya rɔm mee ndɔ’g saar kàrkemetag gə́ mee ndɔ gə́ njekɔm’g munda lé ɓa . 6 Ɓó lé bɔbije oo to gə́ m’godo ɓa dəjim ndá i a kulá pana: Dabid ra ndòo rɔm’g pana: M’ya̰ neḛ m’ar neḛ n’aw Betlehem, ɓee-boo’g lə neḛ lé mbata lé neelé njémeekəije lə neḛ lai d’a gə kaw kinja nékinjaməs gə́ wɔji dɔ ləb kára-kára lé keneŋ. 7 Ɓó lé yeḛ pana: Maji ya! ndá né kára gə́ kəm kar kura ləi ɓəl lé godo. Nɛ ɓó lé oŋg ḭ səa ɓəi ndá maji kari gər gao to gə́ yeḛ wɔji mée’g gə mba ra səm majel ya. 8 Bèe ndá maji kari tɔji kura ləi meemaji ləi ɓa mbata kédé jeḛ səi lé jeḛ manje rɔ sí j’ar na̰ no̰ Njesigənea̰’g. Ɓó lé néra gə́ gə goo rəbee el to rɔm’g ndá maji kari-i nja tɔlm ŋga mən, mba ɗi tɔɓəi ɓa a kaw ne səm saar rɔ bɔbije’g tɔɓəi wa.
9 Jonatan ulá pana: Ɓó lé m’oo néra gə́ majel gə́ bɔm wɔji-kwɔji ra səi lé ndá maji kari ə̰ji to gə́ m’a kiya səi dəa lal kulai bèe lé el. Wah! maji kari ə̰ji bèe el.
10 Dabid dəji Jonatan pana: Ɓó lé bɔbije a kila ta gə́ kədərə keneŋ ndá see na̰ ɓa a ree kulam taree wa.
11 Yen ŋga Jonatan ula Dabid pana: Ree ar sí teḛ j’awje wala.
Ndá deḛ joo bɔr teḛ d’aw wala ya tɔ. 12 Jonatan ula Dabid pana: Ma m’ar Njesigənea̰, Ala lə Israɛlje to njekoo goo ta ləm ya! Bèlè əsé nona ndá m’a kuru mee bɔm koo. Ɓó lé yeḛ wɔji mée’g gə mba ra meemaji gə Dabid ɓa m’lal kula dəw karee ulai ndá 13 maji kar Njesigənea̰ ra gə Jonatan nédɔkudu ya. Esé ɓó lé bɔm wɔji mba ra səi né gə́ majel kara m’a kulai ya tɔ ndá m’a kya̰’i kari aw gə meekulɔm tɔ. Maji kar Njesigənea̰ nai səi to gə́ yeḛ nai ne gə bɔmje kédé bèe tɔ. 14 Ɓó lé m’isi kəmba ɓəi ndá maji kari ra səm némeemaji lə Njesigənea̰ ya. 15 Esé lé m’wəi kara ar goo meemaji ləi yɔr mba njémeekəije ləm nda̰ el. Lée Njesigənea̰ a tɔs njéba̰je lə Dabid kára-kára lai tɔr dee dɔ naŋg nee kara aree yɔr el ya .
16 Mbata Jonatan lé man rəa ar njémeekəije lə Dabid pana: Maji kar Njesigənea̰ dal ba̰ lə Dabid dɔ njéba̰je’g ləa. 17 Jonatan ar Dabid man rəa aree ya gə goo ndigi gə́ yeḛ ndigee yaa̰ mbata Jonatan lé ndigee to gə́ darəa-yeḛ bèe tɔ.
18 Jonatan ulá pana: Bèlè to ndɔ ra naḭ gə́ teḛ sigi ndá d’a koo to gə́ i godo mbata loo-sii a to kari ba. 19 Ndɔ gə́ njekɔm’g munda lé i a tel kaw duu-loo gə́ i iya rɔi keneŋ kédé loo gə́ ta oso ndá i a si mbɔr biri mbal gə́ Ejel’g lé dəb. 20 M’a tur kandə ɓandaŋgje munda gə́ rɔ biri mbal’g lé to gə́ m’wɔji ne dɔ né bèe. 21 Yen ŋga, aa oo, m’a kula basa lé karee aw saŋg kandə ɓandaŋgje lé pana: Aw odo dee ree ne. Ɓó lé m’ula basa lé m’pana: Aa oo, kandə ɓandaŋgje lé to nɔḭ’gən, odo dee. Ndá gə́ ree mbata meelɔm to mbata ləi ɓó né gə́ kəm kari ɓəl lé godo, Njesigənea̰ si kəmba. 22 Nɛ ɓó lé m’ula basa lé m’pana: Aa oo, ɓandaŋgje lé to nɔḭ’g kédé nu’n! Ndá aw loo ləi mbata Njesigənea̰ ɓa ulai mba kari aw ya. 23 Ta gə́ jeḛ səi m’paje lé Njesigənea̰ to njekoo sə sí gée saar gə no̰ ya.
24 Dabid lé iya rəa mee wala’g tɔ.
To ndɔ ra naḭ gə́ teḛ sigi ndá mbai lé si ta ka-nésɔ’g mba sɔ né. 25 Mbai lé si dɔ kag-siée’d gə́ d’unda kaar bɔrɔ’g to gə́ yeḛ aw si keneŋ ta-ta lé ya. Jonatan ḭ aar tar ndá Abner ɓa si mbɔr Sawul’g nɛ loo-si Dabid lé ɓa to kari ba. 26 Mee ndəa’g neelé Sawul pata kára el mbata yeḛ ə̰ji mée’g pana: Banelə né teḛ dəa’g əsé rəa mina̰, tɔgərɔ rəa mina̰ ya. 27 Bèlè lookàree, ndɔ gə́ njekɔm’g joo mee ndɔ ra naḭ gə́ teḛ sigi’g lé loo-si Dabid to kari ba ya ɓəi. Sawul dəji ŋgonee Jonatan pana: See gelee ban ɓa ŋgolə Isai lé ree ta nésɔ’g tagə́nè el ləm, gə ɓogənè el ləm wa.
28 Jonatan tel ila Sawul’g pana: Dabid dəjim am m’yá̰ m’aree aw Betlehem. 29 Yeḛ pana: N’ra ndòo rɔm’g mba kam m’ya̰ neḛ m’ar neḛ n’aw mbata mee ɓee-boo’g lə neḛ lé nékinjaməs gə́ wɔji dɔ njémeekəije lə neḛ to keneŋ. Ɓó lé neḛ n’taa kəm rəgm ndá maji kam m’ya̰ neḛ m’ar neḛ n’aw kalaŋ n’aw n’oo ŋgako̰ neḛje lé ɓa. Gelee gə́ nee ɓa yeḛ ree ne ta ka-nésɔ’g lə mbai lé el gə mbəa.
30 Oŋg lə Sawul ḭ səa pu dɔ Jonatan’g aree ulá pana: I ŋgon gə́ njedum gə njekɔsta-rəw lé kwa gə́ i wa kura gə ŋgolə Isai aree to nérɔkul ləi gə nérɔkul lə kɔinje to lé see ma m’gər el wa. 31 Mbata ɓó lé loo gə́ ŋgolə Isai lé si kəmba dɔ naŋg nee ndá i a kiŋga meelɔm el ləm, ɓeeko̰ ləi kara a to lɔm el ləm tɔ. Bèe ndá ɓasinè ya, ula kula ar dee saŋgee ree səa d’am mbata yeḛ lé kəm karee wəi ya.
32 Jonatan dəji bɔbeeje Sawul pana: See gelee ban ɓa d’a tɔlee lé wa. See ɗi ɓa yeḛ ra wa.
33 Yen ŋga Sawul un ko̰-niŋga ləa tɔjee ne mba kuree ne. Ndá Jonatan gər to gə́ bɔbeeje wɔji mée’g njaŋg mba tɔl Dabid ya. 34 Jonatan ḭ ta ka-nésɔ’g oso gə oŋg biriŋ. Yeḛ sɔ né el mee ndɔ gə́ njekɔm’g joo’g lə ndɔ ra naḭ gə́ teḛ sigi lé. Kəmee to ndòo mbata lə Dabid ləm, mbata bɔbeeje ila rɔkul-boo dəa’g ləm tɔ.
35 Bèlè lookàree gə ndɔ lé, Jonatan aw mee wala’g loo gə́ deḛ gə Dabid d’wɔji mba kiŋga na̰ keneŋ lé ndá yeḛ ar basa kára aw səa. 36 Yeḛ ula ŋgon lé pana: Aḭ-ŋgwɔd, aw odo kandə ɓandaŋgje gə́ m’a gə kur lé.
Ŋgon lé aw aiŋgwɔd ndá Jonatan ur kandə ɓandaŋg lé aree al dəa oso nea̰’g. 37 Loo gə́ yeḛ ree loo gə́ kandə ɓandaŋg gə́ yeḛ ur lé to keneŋ ndá Jonatan ɓar goo ŋgon lé gə ndia gə́ boi wəl pana: See kandə ɓandaŋg lé to nɔḭ’g kédé nu ɓəi el wa.Njekuru ɓandaŋg (20.37) 38 Yeḛ ra né wəl tɔɓəi pana: Ɔs rɔi ɓad aw kalaŋ ɓó aar naŋg el!
Ndá ŋgon lə Jonatan lé odo kandə ɓandaŋgje lé ɔd aw ne rɔ ɓéeje’g. 39 Ŋgon lé gər ginee el nɛ Jonatan deḛ gə Dabid ɓa gər gin né neelé ya. 40 Jonatan tel gə nérɔje ləa ar ŋgon ləa lé ulá ne pana: Ɔd aw ne mee ɓee-boo’g. 41 Loo gə́ ŋgon lé ɔd aw mba̰ ndá Dabid ḭ dəb loo gə́ kára gə́ to par gə́ dɔkɔl, tɔɓəi yeḛ oso bəbərə dəb kəmee naŋg naŋg as gɔl munda. Ndá Kuramar-na̰je gə́ joo neelé d’wa na̰ kar na̰’g sud ləm no̰ na̰’d ləm tɔ, nɛ Dabid ɓa no̰ ɓugudu-ɓugudu unda maree ya.
42 Jonatan ula Dabid pana: Aw gə meekulɔm. Ɓasinè jeḛ manje rɔ sí j’ar na̰ gə ri Njesigənea̰ m’pajena: Maji kar Njesigənea̰ nai mbuna sí-jeḛ səi’g ləm, gə mbuna ŋgakamje-je’g gə ŋgakaije-je’g ləm tɔ saar gə no̰ ya.
© Ngambai Bible © Alliance Biblique du Tchad 1989, 2015.
