Kəm-rəw-mán gə́ ḭ mee kəi gə́ to gə kəmee doi’g lé
1 Yeḛ tel ree səm par gə́ tarəw kəi gə́ to gə kəmee doi’g. Ndá aa oo, mán ḭ gin tarəwkəi gə́ naŋg teḛ ula gə́ bər mbata kəi lé təa to par gə́ bər. Man lé ula par gə́ dɔkɔl lə kəi gə́ to gə kəmee ləm, gə dɔkɔl lə loo-nékinjaməs ləm tɔ . 2 Yeḛ ɔr nɔm teḛ səm gə rəw gə́ tarəw gə́ dɔgel ndá yeḛ am m’gugu dɔ loo gə́ raga saar m’teḛ tarəwkəi gə́ raga gə́ to par gə́ bər lé. Aa oo, mán lé ula dəb loo gə́ dɔkɔl. 3 Loo gə́ dəw neelé aw par gə́ bər ndá kúla-kwɔji-né to jia’g ndá yeḛ wɔji ne loo as kəmkil dəw tɔl-dɔg (1.000), yeḛ am m’ur mán lé ndá mán lé aw saar wa ŋgərə̰-gɔlm. 4 Yeḛ wɔji loo lé as kəmkil dəw tɔl-dɔg (1.000) ya tɔɓəi, yeḛ am m’ur mán lé ndá mán lé aw saar wa no̰ kəjim. Yeḛ wɔji loo as kəmkil dəw tɔl-dɔg (1.000) ya tɔɓəi, yeḛ am m’ur mán lé ndá mán lé aw saar wa ɓərm. 5 Yeḛ wɔji mán lé as kəmkil dəw tɔl-dɔg (1.000) ya tɔɓəi ndá to kəm-rəw-mán gə́ ula mbiao̰-mbiao̰ gə́ m’askəm kur teḛ el mbata mán lé uru yaa̰ gə́ kalé ɓa gə́ kuma̰, to kəm-rəw-mán gə́ ula mbiao̰-mbiao̰ gə́ dəw askəm kur teḛ el. 6 Yeḛ dəjim pana: Ma ŋgon-dəw lé see kəm wəi dɔ’g sḭ ya wa. Tɔɓəi yeḛ tel ree səm dɔ koŋgo gə́ raga. 7 Loo gə́ yeḛ tel ree səm dɔ koŋgo’g lé ndá aa oo, kagje bula to keleje’g loo joo bɔr. 8 Yeḛ ulam pana: Man neelé a kaḭ gə́ dəb ɓee gə́ to par gə́ bər ndá a teḛ ndag-mbo’g kaw kur dan baa-boo-kad’g, loo gə́ yee a kur danee’g ndá mán baa-boo-kad lé a tel maji. 9 Nékundaje lai gə́ d’aw kəmba lé d’a si kəmba looje lai gə́ kəm-rəw-mán a kula keneŋ lé, ka̰jije d’a bula keneŋ digi-digi tɔ, mbata loo gə́ mán neelé a kula keneŋ ndá manje a tel to maji, bèe ɓa looje lai gə́ kəm-rəw-mán lé a kula keneŋ ndá néje lai d’a si kəmba keneŋ. 10 Njékɔs-ka̰jije d’a kaar dɔ koŋgeeje’g, d’a naji buraje un kudee En-Gedi saar teḛ En-Eglayim, ka̰jije gə́ gə gel dee gel dee d’a to keneŋ asəna gə ka̰jije gə́ to baa-boo-kad gə́ boi bèe ndá d’a bula digi-digi.Njékɔs-ka̰jije ta baa-boo-kad’g (47.10) 11 Dɔ bɔreeje gə daŋgeeje d’a tel maji nda̰ el nɛ d’a kya̰ dee karee to loo kad. 12 Mbɔr kəm-rəw-mán’g lé kag sɔje gə́ gə gel dee gel dee d’a kuba dɔ koŋgeeje’g loo joo bɔr. Kagje neelé kam dee a ndòlé nda̰ el ləm, kandə dee a godo nda̰ el ləm tɔ. D’a kandə gə naḭje kára-kára lai mbata mán a kḭ mee loo gə́ to gə kəmee’g teḛ kula gel dee’g. Kandə dee a to nékul rɔ ləm, kam dee a to kuma̰-kaji-rɔ ləm tɔ .
Njesigənea̰ wɔji rəw-nim-ɓee gə́ Israɛl
13 Mbaidɔmbaije gə́ Njesigənea̰ pa togə́bè pana: Aa ooje, rəw-nimje lə ɓee gə́ seḭ a kaije ginkoji Israɛlje gə́ dɔg-gir-dee-joo gə́ né ka̰ dee lé ɓa nee: Ka̰ Jisəb a to loo joo. 14 Seḭ a taaje gə́ né ka̰ sí ka̰ sí karee as na̰-na̰, mbata neḛ n’un ji neḛ gə́ tar man ne rɔ neḛ gə mba kar bɔ síje-je. Bèe ɓa ɓee neelé seḭ a kiŋgaje gə́ né ka̰ sí ya. 15 Aa ooje, rəw-nimje lə ɓee lé ɓa nee: Kel loo gə́ dɔgel ndá un kudee baa-boo-kad gə́ boi’g a dəs gə́ rəw gə́ Hetlon saar teḛ Sedad, 16 gə Amat, gə Berota, gə Sibrayim mbuna rəw-nim ɓee gə́ Damas ləm, gə rəw-nim ɓee gə́ Amat gə Hatjer-Hatikon par gə́ rəw-nim ɓee gə́ Habran ləm tɔ, 17 bèe ɓa rəw-nim lé a kun kudee baa-boo gə́ Hasar-Enon ləm, gə rəw-nim ɓee gə́ Damas gə Sapo̰ gə́ to dɔgel lé saar teḛ rəw-nim ɓee gə́ Amat ləm tɔ, yee neelé ɓa a to dəb loo gə́ dɔgel. 18 Dəb loo gə́ bər a to baa gə́ Jurdɛ̰ mbuna Habran gə Damas gə Galaad ləm, gə ɓee lə Israɛlje ləm tɔ, seḭ a kwɔjije un kudee rəw-nim gə́ dɔgel saar teḛ baa-boo-kad gə́ to par gə́ bər, yee ɓa a to dəb loo gə́ bər. 19 Dəb loo gə́ dɔkɔl gə́ to par gə́ dɔkɔl lé a kun kudee Tamar saar teḛ manje gə́ Meriba gə́ to Kades saar teḛ kəm-rəw-mán’g par gə́ baa-boo-kad gə́ boi’g lé, yee ɓa a to dəb loo gə́ dɔkɔl. 20 Dəb loo gə́ par gə́ dɔ-gó ndá a to baa-boo-kad gə́ boi, un kudee rəw-nim’g saar wɔji dɔ ɓee gə́ Amat njoroŋ, yee ɓa a to dəb loo gə́ dɔ-gó.
21 Seḭ a kaije na̰ ɓee neelé gə goo ginkoji Israɛlje. 22 Né gə́ to asəna gə tḛ́ bèe ɓa seḭ a kundaje ne kəmee lə sí-seḭ ləm, gə ka̰ dəw-dɔ-ɓeeje gə́ d’a si mbuna sí’d gə́ d’a koji ŋgan deeje mbuna sí’g ləm tɔ, seḭ a koo deeje gə́ kojiɓeje mbuna Israɛlje’g, né gə́ to asəna gə tḛ́ bèe ɓa deḛ d’a taa ne loo sə sí mbuna ginkoji Israɛlje’g. 23 Seḭ a karje dəw-dɔ-ɓee loo ləa mbuna ginkoji dəwje gə́ yeḛ si keneŋ lé, Mbaidɔmbaije gə́ Njesigənea̰ ɓa pa bèe.
© Ngambai Bible © Alliance Biblique du Tchad 1989, 2015.
