Rɔkul gə́ d’ila dɔ njékaḭkulaje’g lə Dabid lé
2Sam 10.1-51 Gée gə́ gogo, Nahas, mbai lə Amo̰je wəi ndá ŋgonee ɓa o̰ ɓee toree’g tɔ. 2 Ndá Dabid pana: M’a ra meemaji gə Hana, ŋgolə Nahas to gə́ bɔbeeje ra səm bèe lé tɔ. Bèe ɓa Dabid ula njékaḭkulaje mba kar dee d’aw gɔl mée mbata lə bɔbeeje gə́ wəi lé. Loo gə́ njékaḭkulaje lə Dabid teḛ mee ɓee’g lə Amo̰je rɔ Hana’g mba gɔl mée ndá 3 dəwje gə́ boo lə mbai dɔ Amo̰je d’ula Hana pana: See i ə̰ji to gə́ Dabid ndigi kila riɓar dɔ bɔbi’g ɓa ula ne njégɔl meeije rɔi’g gə mbəa wa. See yeḛ saŋg rəw gə mba kar dee gər mee ɓee-boo ləm, gə mba tən ɓee kédé ləm tɔ ɓa gə mba ree tujee ɓəi ɓa yeḛ ula ne njékaḭkulaje ləa rɔi’g gə mbəa el wa.
4 Togə́bè ɓa Hana wa njékaḭkulaje lə Dabid lé ar dee ndisa dəb mbai ta dee ləm, ar dee tḭja kubuje lə dee dana gaŋg saar teḛ ta kudu dee’g ləm tɔ ɓa ya̰ dee ar dee d’aw ɓəi. 5 Loo gə́ Dabid oo ta né gə́ teḛ dɔ dəwje’g ləa neelé ndá yeḛ ula njékulaje ar dee d’aw d’iŋga dee mbata rɔkul gə́ boo to dɔ dee’g lé, bèe ɓa mbai ar dee d’ula dee pana: Maji kar sí síje Jeriko saar kar mbai ta sí idi ɓa reeje ɓée ɓəi.
Dabid rɔ gə Amo̰je gə Aramje
2Sam 10.6-196 Amo̰je lé d’oo to gə́ deḛ tel to kḛji kəm Dabid’g ndá Hana gə Amo̰je d’ula gə larnda as nékwɔji kwɔi-lə-né tɔl-dɔg-loo rɔ-munda (3.000) rɔ Aramje gə́ wɔji dɔ Mesɔpotami ləm, gə Aramje gə́ wɔji dɔ Soba ləm tɔ mba kiŋga ne pusu-rɔje gə njérɔ gə kundaje. 7 Deḛ d’uga pusu-rɔ gə larnda neelé as tɔl-dɔg-loo rɔ-munda-giree-joo (32.000) ləm, mbai gə́ Maaka gə njérɔje ləa ree ra loo-si dee’g no̰ Médeba’g ləm tɔ. Amo̰je lé d’ḭ mee ɓee-booje’g lə dee mbo̰ dɔ na̰ gə mba rɔ.
8 Loo gə́ Dabid oo ta neelé ndá yeḛ ula Joab gə njérɔje lai gə́ to bao-rɔje mba kaw rɔ sə dee. 9 Amo̰je lé teḛ tɔs rɔ dee gə mba rɔ tarəwkɔg’d, mbaije gə́ ree keneŋ lé d’aar gə kəm dee ɓəd loo-rɔ’g tɔ. 10 Joab oo to gə́ rɔ a gə to nea̰’g ləm, gə giree’g ləm tɔ ndá yeḛ mbər kudu bao-rɔje mbuna njésiŋgamoŋje lai gə́ Israɛl unda kudu kára mba kar dee rɔ gə Aramje tɔ, 11 tɔɓəi ges deḛ gə́ nai lé yeḛ ɔm dee gel Abisai gə́ to ŋgokea̰ mba kar dee rɔ gə Amo̰je tɔ. 12 Yeḛ ulá pana: Ɓó lé siŋga Aramje ur dɔm’g ndá i a ree la səm, tɔɓəi ɓó lé siŋga Amo̰je ur dɔi-i’g ndá m’a kaw la səi tɔ. 13 Wa rɔi kɔgərɔ ləm, ar sí j’waje diŋgam meḛ sí’g ləm tɔ mbata lə koso-dəwje lə sí ləm, gə mbata ɓee-booje lə Ala lə sí ləm tɔ ndá maji kar Njesigənea̰ ra né gə́ yeḛ oo gə́ né gə́ maji kəm ra ya.
14 Joab gə njé’g ləa d’aw gə́ kédé gə mba rɔ gə Aramje ndá deḛ d’aḭ no̰ dee’g tɔ. 15 Loo gə́ Amo̰je d’oo to gə́ Aramje buŋga na̰ d’aḭ ndá deḛ kara buŋga na̰ d’aḭ no̰ Abisai’g, yeḛ gə́ to ŋgoko̰ Joab tɔɓəi deḛ tel d’aw mee ɓee-boo’g tɔ ndá Joab tel aw Jerusalem gogo tɔ.
16 Aramje d’oo to gə́ Israɛlje dum dɔ dee ndá deḛ d’ula kula rɔ Aramje gə́ d’isi kel tura-baa’g nu mba kar dee ree la sə dee, ndá Sopak, ɓé-njérɔje lə Hadaréjer ɓa gə́ dəw dɔ dee ya. 17 Deḛ d’ula Dabid taree ndá yeḛ mbo̰ Israɛlje lai ar dee gaŋg baa gə́ Jurdɛ̰ d’aw d’iŋga dee gə mba rɔ sə dee. Yeḛ wa dɔ gɔl njérɔje ləa gə mba rɔ gə Aramje ya. Nɛ Aramje d’aḭ no̰ Israɛlje’g tɔ. 18 Dabid tɔl kudu njérɔje gə́ d’uba pusu-rɔje as tɔl-dɔg-loo siri (7.000) ləm, gə goŋ-rɔje tɔl-dɔg-loo rɔ-sɔ (4.000) ləma, yeḛ tɔl Sopak gə́ to ɓé-njérɔje lə dee lé ləm tɔ.
19 Mbaije lai gə́ d’ula dɔ dee gin Hadaréjer’g lé loo gə́ d’oo to gə́ Israɛlje dum dee gə rɔ ndá deḛ d’ɔm na̰’d gə Dabid d’ula ne dɔ dee gelee’g. Bèe ɓa Aramje d’oo né kára gə mba ra la ne gə Amo̰je gogo el tɔ.
© Ngambai Bible © Alliance Biblique du Tchad 1989, 2015.
