1 Dabid pana: Loo gə́ neelé a to kəi lə Njesigənea̰ Ala ləm, loo gə́ neelé a to loo-nékinjaməs gə́ ka̰ roo né keneŋ gə mbata lə Israɛlje ləm tɔ.
Dabid wa dɔ gɔl néje gə mba kunda ne kəi gə́ to gə kəmee
2 Dabid mbo̰ dəw-dɔ-ɓeeje gə́ d’isi mee ɓee gə́ Israɛl, un ndia ar njétɔl kɔr mbalje gə mba kar dee tɔl mbalje kar dee d’asəna gə mba kunda ne kəi Ala. 3 Yeḛ wa dɔ gɔl larndul yaa̰ mba ra gə́ ŋgawlar ɓər tabidi-rəwkəije ləm, gə néməmə deeje gə́ ra dee gə larkas bula yaa̰, ar loo kwɔji kwɔi lə dee godo ləm, 4 gə kag-sɛdrəje gə́ dum tura ləm tɔ mbata njé gə́ Sido̰ gə njé gə́ Tir ree gə kag-sɛdrəje neelé d’ar dee taa loo rɔ Dabid’g pəl-pəl ya. 5 Dabid pana: Ŋgonəm Salomo̰ to basa gə́ as el ɓəi ləm, kəi gə́ d’a gə kunda mbata lə Njesigənea̰ lé ria a ɓar kur dɔ loo’g ləma, rɔnduba ləa a ɓar gə mee ɓeeje lai ləm tɔ, gelee gə́ nee ɓa ma m’ndigi kwa ne dɔ gɔl néje mbata ləa tɔ. Bèe ɓa Dabid wa ne dɔ gɔl néje bula yaa̰ kédé ɓa wəi ɓəi.
Dabid ɔm kula kunda kəi gə́ to gə kəmee ji Salomo̰’g
6 Dabid ɓar ŋgonee Salomo̰ gə́ rəa’g ndá yeḛ un ndia aree gə mba karee unda kəi ar Njesigənea̰, Ala lə Israɛlje. 7 Dabid ula Salomo̰ pana: Ŋgonəm, ma nja m’wɔji məəm’g gə mba kunda kəi gə mba ri Njesigənea̰, Ala ləm . 8 Nɛ Njesigənea̰ ulam ta togə́bè pana: I lé ɔm məs naŋg yaa̰ ləm, i rɔ rɔ yaa̰ ləm tɔ, I a kunda kəi gə mba rim el mbata i ɔm məs naŋg no̰m’g yaa̰ ya. 9 Yeḛ ulam tɔɓəi pana: I a koji ŋgon gə́ diŋgam ndá yeḛ a to dəw gə́ njesi lɔm, yeḛ ɓa m’a karee loo-kwa-rɔ loo gə́ m’a kɔree ne ji njéba̰je’g ləa gə́ gugu dəa sub lé, mbata Salomo̰ ɓa a to ria ndá m’a kar Israɛlje d’isi ne dan maji’g ləm, loo a to lɔm ləm tɔ ləb si kəmba’g ləa lé. 10 Yeḛ ɓa a kunda kəi gə mbata rim. Yeḛ a to ŋgonəm ndá ma m’a to bɔbeeje, tɔɓəi m’a kar kalimbai ɓeeko̰ ləa to njaŋg mbuna Israɛlje’g saar gə no̰. 11 Ɓasinè, ŋgonəm, maji kar Njesigənea̰ nai səi gə mba kari teḛkɔr ləm, gə mba kari unda kəi lə Njesigənea̰, Ala ləi to gə́ yeḛ pa taree wɔji ne dɔi lé ləm tɔ. 12 Maji kar Njesigənea̰ ari kəmkàr gə gosonégər ləm, ari o̰ ɓee dɔ Israɛlje’g aa ne dɔ godndu Njesigənea̰, Ala ləi kər-kər ləm tɔ. 13 Togə́bè ɓa i a teḛ ne kɔr loo gə́ i a tɔs kəmi bao-bao dɔ ndukunje gə godnduje gə́ Njesigənea̰ un ar Moyis mbata lə Israɛlje lé. Wa rɔi kɔgərɔ ləm, wa diŋgam məəi’g ləma, ɓəl əsé unda bala el ləm tɔ . 14 Ma m’ula rɔm ndubu ɓa m’wa ne dɔ gɔl larlɔr gə́ al dɔ nékwɔji kwɔi-lə-né tɔl-dɔg-loo-munda (3.000) ləm, gə larnda gə́ al dɔ nékwɔji kwɔi-lə-né tɔl-dɔg-loo-rɔ-munda (30.000) ləma, gə larkas gə larndul yaa̰ gə́ askəm kwɔji kwɔi lə dee el mbata to bula yaa̰ ləm tɔ mbata kəi lə Njesigənea̰ lé, m’wa dɔ gɔl kagje gə mbalje ndá i a kɔm maree dɔ’g ya ɓəi tɔ. 15 Njékulaje bula d’isi mbɔri’g, deḛ gə́ to njétɔl kɔr mbalje ləm, gə njéra kula kagje ləma, gə diŋgamje gə́ njégosokulaje gə́ ɓəd-ɓəd ləm tɔ. 16 Larlɔr, gə larnda, gə larkas, gə larndul dum tura to keneŋ. Uba naŋg ḭta ra né ndá maji kar Njesigənea̰ nai səi ya.
17 Dabid un ndia ar mbaije lai gə́ Israɛl mba kar dee la gə ŋgonee gə́ Salomo̰ ndá yeḛ ula dee pana: 18 Njesigənea̰ gə́ to Ala lə sí lé see yeḛ nai sə sí ar sí waje rɔ sí gə looje lai el wa. Mbata yeḛ ya̰ koso-dəwje gə́ mee ɓee’g neelé jim’g ndá njé gə́ dɔ naŋg nee lé d’ula dɔ dee no̰ Njesigənea̰’g ləm, gə no̰ koso-dəwje’g ləa ləm tɔ. 19 Ɓasinè lé ulaje rɔ sí ndubu gə ŋgaw meḛ sí bura, saŋgje ne Ala lə sí gə́ Njesigənea̰, maji kar sí ḭje tar raje kəi-si Njesigənea̰, Ala gə́ to gə kəmee gə mba kar sí reeje gə sa̰duk-manrɔ lə Njesigənea̰ ləm, gə nékulaje gə́ d’unda dee gə kəmee d’ar Ala ləm tɔ lé mee kəi gə́ d’a gə ra gə mba ri Njesigənea̰ lé tɔ.
© Ngambai Bible © Alliance Biblique du Tchad 1989, 2015.
