1 Samel un ku-ubu ndá yeḛ tər dɔ Sawul’g. Yeḛ il ɓɔlee tɔɓəi pana: See Njesigənea̰ ɓa tər ubu dɔi’g mba kari to mbai dɔ né kea̰ yeḛ’g el wa. 2 Ɓogənè lé loo gə́ i ya̰’m mba̰ ndá i a kiŋga dəwje joo mbɔr dɔɓar Rasel’d gə́ to rəw-nim-ɓee’g lə Bḛjami gə́ to Selsak lé. Ndá d’a kulai pana: Ko̰-mulayḛ̀je-je gə́ i aw saŋg dee lé d’iŋga dee mba̰. Nɛ aa oo, bɔbije ə̰ji dɔ mulayḛ̀je-je’g el ŋga, nɛ mée to kəgəgə mbata lə sí aree pana: See ɗi ɓa n’a ra mbata lə ŋgon neḛ lé wa. 3 I a kḭ lée’g neelé kaw lam ndá a teḛ kag-sɛnə’d gə́ Tabɔr. Lée neelé ɓa diŋgamje munda gə́ d’isi d’aw gə́ rɔ Ala’g lé loo gə́ Betel’g lé d’a kiŋgai keneŋ. Yeḛ gə́ kára a kaw gə ŋgan bya̰je munda ləm, yeḛ gə́ raŋg a kaw gə pil muruje munda ləma, yeḛ gə́ raŋg a kaw gə mán-nduú gə́ mḭ as ku kára ləm tɔ. 4 D’a rai lapia tɔɓəi d’a kari pil muruje joo ndá i a taa ji dee’g ya. 5 Gée gə́ gogo ndá i a teḛ Gibea-Elohim, loo gə́ kudu njérɔje lə Pilistije d’isi keneŋ lé. Loo gə́ i a gə kandə mee ɓee-boo’g lé ndá i a kiŋga kudu-njéteggintaje gə́ d’ḭ dɔdərloo’g ləm, d’ɔr no̰ dee gə kṵdu ləm, gə dalè ləm, gə tébé ləma, gə kṵdu-ko̰dè ləm tɔ, tɔɓəi deḛ kara d’isi tegginta ləm tɔ. 6 Ndil Njesigənea̰ a dəb dɔi’g ndá i a tegginta sə dee na̰’d, tɔɓəi a tel to ne dəw gə́ ɓəd. 7 Loo gə́ nétɔjije neelé d’aw lée’g béréré dɔi’g ndá maji kari ra né gə́ i iŋga loo rəa mbata Ala nai səi ya. 8 Tɔɓəi i a kḭ nɔm’g kédé kaw Gilgal ndá aa oo, m’a kḭ kaw rɔi’g kaw kinja nékinjanéməsje gə́ ka̰ roo ləm, gə nékinjanéməsje gə́ ka̰ kɔm na̰’d ləm tɔ. I a ŋgina as ndɔ siri saar kam m’ree rɔi’g gə mba kam m’ulai né gə́ kəm kari ra ɓa.
9 Loo gə́ Sawul turu giree mba kya̰ Samel ndá Ala ar mee Sawul lé tel to ɓəd ndá nétɔjije lai neelé d’aw lée’g béréré mee ndəa gən ya. 10 Loo gə́ deḛ teḛ Gibea ndá aa oo, kudu-njéteggintaje ree tila kəmee d’iŋgá. Ndil Ala dəb dəa’g ndá yeḛ tegginta mbuna dee’g tɔ. 11 Deḛ lai gə́ gəree kédé lé loo gə́ d’oo to gə́ yeḛ aar tegginta gə njéteggintaje na̰’d ndá deḛ d’ula na̰ ta gə́ yo gə́ nee mbuna koso-dəwje’g pana: See ɗi ɓa ra ŋgolə Kis lé wa. See Sawul kara to gə́ mbuna njéteggintaje’g ya to wa. 12 Dəw gə́ Gibea ila dee’g pana: See na̰ ɓa to bɔ deeje wa. Gelee gə́ nee ɓa pa ne gosota pana: See Sawul kara to gə́ mbuna njéteggintaje lé ya to wa .
13 Loo gə́ yeḛ unda ŋgaŋ tegginta ləa ndá yeḛ tel tuga loo aw dɔ diŋgri loo’g. 14 Na̰ Sawulje dəji Sawul gə kura ləa pana: See seḭ lé awje ra wa.
Sawul ilá keneŋ pana: Jeḛ j’aw ndolèje ko̰-mulayḛ̀je-je nɛ jeḛ j’iŋga deeje el ndá j’awje rɔ Samel’g ɓa.
15 Nan Sawulje lé ulá pana: Ulam ta gə́ Samel ula sí lé.
16 Sawul tel ila naneeje keneŋ pana: Yeḛ ula sí woḭ to gə́ ko̰-mulayḛ̀je-je lé d’iŋga dee mba̰.
Nɛ ta gə́ wɔji dɔ ɓeeko̰ gə́ Samel ulá lé ɓa yeḛ pa el.
D’ula mbai dɔ Sawul’g
17 Samel ɓar koso-dəwje ar dee mbo̰ dɔ na̰ no̰ Njesigənea̰’g loo’d gə́ Mispa. 18 Ndá yeḛ ula Israɛlje pana: Njesigənea̰ Ala lə Israɛlje pa togə́bè pana: Neḛ n’ar Israɛlje d’unda loo mee ɓee gə́ Ejiptə’g teḛ ndá neḛ n’ɔr dee ji njé gə́ Ejiptə’g ləm, gə ji ɓeeko̰je lai’d gə́ d’ula kəm dee ndòo ləm tɔ. 19 Nɛ ɓogənè seḭ mbadje Ala lə sí, yeḛ gə́ ɔr sí dan némajelje’g lə sí lai ləm, gə dan némeekonje’g lə sí lai ləm tɔ ndá seḭ uláje pajena: Maji karee unda mbai dɔ sí’g. Ɓasinè lé gə́ reeje aarje no̰ Njesigənea̰’g gə goo ginkojije lə sí ləm, gə goo bula lə sí gə́ tɔl-dɔg-dɔg (1.000) ləm tɔ.
20 Samel ar ginkoji lə Israɛlje lai ree pər gə́ rəa’g ndá d’ɔr kəm ginkoji lə Bḛjami. 21 Yeḛ ar ginkoji lə Bḛjami ree pər gə goo gel-bɔje lə dee lə dee ndá d’ɔr kəm gel-bɔje lə Matri. Bèe ɓa d’ɔr Sawul, ŋgolə Kis tɔ. Deḛ saŋgee nɛ d’iŋgá el. 22 Deḛ tel dəji Njesigənea̰ tɔɓəi pana: See dəw lé ree nee ya wa.
Njesigənea̰ pana: Yeḛ iya rəa mbuna nékodoje’g kən.
23 Deḛ d’aḭ d’aw d’ɔree keneŋ ndá yeḛ ree aar dan koso-dəwje’g. Yeḛ ŋgal ar dəa unda deḛ lai.
24 Samel ula koso-dəwje lai pana: See ooje yeḛ gə́ Njesigənea̰ ɔree tɔr ne ndia dəa’g lé ya wa. Dəw kára kara mbuna koso-dəwje’g lai gə́ as səa lé godo.
Yen ŋga koso-dəwje d’unda bula yi-i-i pana: Maji kar mbai lé si kəmba ya. 25 Samel ar koso-dəwje gər né gə́ wɔji dɔ ɓeeko̰ ndá yeḛ ndaŋg taree mee maktub’g ila no̰ Njesigənea̰’g. Tɔɓəi yeḛ ya̰ koso-dəwje lai ar nana kara aw kəi ləa-ləa ya. 26 Sawul kara tel aw kəi ləa gə́ Gibea’g tɔ. Kankəm dəwje gə́ Ala ra kula meḛ dee’g ɓa danee d’aw səa na̰’d. 27 Nɛ lé bèe kara dəwje gə́ njémeeyèrje gə́ d’isi keneŋ pana: Yen gə́ ɗi bèe wa. Dəw gə́ nee ŋga a taa dɔ sí wa! Yee ɓa deḛ d’ə̰jee ne bəḭ-bəḭ ndá d’un né kára kara d’wa ne səa noji el. Nɛ Sawul oo gə́ né el tɔ.
© Ngambai Bible © Alliance Biblique du Tchad 1989, 2015.
