Lapia gə́ ra dee
1 Ma Pool gə Silbɛ̰ gə Timote, jeḛ ndaŋg maktub nee j’ar Eglisə gə́ Tesalonik, seḭ gə́ ɔmje na̰’d gə Ala Bɔ síje ləm, gə Jeju Kristi Mbaidɔmbaije lé ləm tɔ. Maji kar noji gə meelɔm nai sə sí ya !
Meekun lə njé gə́ Tesalonik
2 Jeḛ n’ra Ala oiyo ta-ta mbata lə sí lai, loo gə́ jeḛ m’ɓar ne ri sí loo-ra-tamaji lə sí lé. 3 Tɔgərɔ ya, meḛ sí olé dɔ sí’g ta-ta no̰ Ala Bɔ síje’g loo gə́ j’ə̰ji dɔ meekun lə sí gə́ ra née ləm, gə nojimeenda gə́ seḭ waje gə mar síje ləma, gə kaar gə́ seḭ aarje njaŋg undaje ne meḛ sí yel gə́ dɔ Mbaidɔmbaije’g lə sí Jeju Kristi lé ləm tɔ. 4 Jeḛ n’gər gao, seḭ ŋgako̰ síje gə́ Ala unda sí dan kəmee’g lé yeḛ nja ɔr sí ne unda sí ne gə kəmee ya. 5 Mbata tagə́maji lə sí lé j’ila mberee j’ar sí gə ta gə́ teḛ ta sí’g gə karee el nɛ Ndilmeenda ɓa nai sə sí keneŋ ar sí j’ula ta meḛ sí’g gə siŋgamoŋ ləa-yeḛ ləm, ar sí gərje ta lə sí gə́ kankəmta ləm tɔ. Tɔgərɔ ya seḭ ooje né gə́ jeḛ n’ra mbuna sí’g lé to togə́bè mbata lə sí ya. 6 Seḭ nja kara seḭ toje njendaji kəm síjeḛ-je gə ka̰ Mbaidɔmbaije to loo gə́ seḭ taaje ta lé rəgm dan nékəmndooje bula ləm, Ndilmeenda ɓa gə́ njegin rɔlel lə sí keneŋ ləm tɔ . 7 Gelee gə́ nee ɓa, seḭ telje toje néndajikəm lə njétaamee-Kristije lai gə́ d’isi Masedoinə ləm, gə Akai ləm tɔ. 8 Tɔgərɔ ya, ta lə Mbaidɔmbaije lé ḭ rɔ sí’g oso ɓeeko̰ gə́ Masedoinə ləm gə Akai ləm gə karee el nɛ kɔm gə́ seḭ ɔmje meḛ sí dɔ Ala’g lé nea̰ oso gə loo mbidi-mbidi ar dəwje lai d’oo mba̰ ɓó loo to̰ tamee godo ŋga. 9 Kwa gə́ seḭ wa síje gə́ rɔ sí’g ləm, gə meekun lə sí gə́ seḭ unje arje Ala ləma, gə kya̰ gə́ seḭ ya̰je goo magəje lə sí mba kwa Ala gə́ tɔgərɔ gə́ njesikəmba meḛ sí’g ləm tɔ lé yee ɓa dəwje lai d’ɔr soree ya. 10 Yee ɓa, seḭ ŋginaje ne Ŋgonee gə́ a gə kḭ dara lé yee ɓa to Jeju gə́ Ala aree unda loo teḛ dan njé gə́ d’wəi’g ləm, yeḛ gə́ ɔr sí dan oŋg gə́ a gə ree lé ləm tɔ.
© Ngambai Bible © Alliance Biblique du Tchad 1989, 2015.