Pool ula Timote rɔ dee’g
1 Togə́bè ɓa, loo gə́ j’oo loo mba kila meḛ sí po̰ el ŋga ɓa jeḛ j’wɔji mba nai gə kar sí ba Aten ɓəi 2 ndá jeḛ j’ula Timote rɔ sí’g. Yeḛ lé to ŋgoko̰ sí gə́ to kura lə Ala loo kɔr goo Tagə́maji lə Kristi ndá jeḛ j’ulá mba karee ndəji sí kar sí ŋgəŋje ne dan meekun’g lə sí ləm, 3 mba kar nékəmndoo gə́ seḭ sije keneŋ ɓasinè lé a kar dəw kára kara yə ne el ləm tɔ. Mbata seḭ gərje gao, to né gə́ goso dɔ sí ya. 4 Loo gə́ jeḛ nai rɔ sí’g ɓəi lé jeḛ j’ula sí kédé təsərə m’pana: Némeeko̰ a kula kəm sí ndòo ya, née ɓa teḛ ne dɔ sí’g tɔ ndá seḭ ooje gao ya. 5 Togə́bè ɓa, loo gə́ m’oo loo mba kila məəm po̰ el ŋga ndá m’ula kula goo sí’g mba koo see meekun lə sí to ban wa. Ma m’ɓəl nà banelə njesula dəwje lé a sula sí ɓa a kar kula ra sí lé tel to né gə́ gə mḭdé ba.
6 Nɛ ɓasinè Timote ḭ rɔ sí’g tel ree iŋga sí ndá yeḛ ula sí ta gə́ maji gə́ wɔji dɔ meekun lə sí ləm, gə meenoji lə sí ləm tɔ. Yeḛ ula sí pana: Kaw gə́ j’aw rɔ sí’g kédé lé seḭ la̰jije toree meḛ sí’g ta-ta gə meendakaḭ ar mal koo síjeḛ ra sí-seḭ ŋgwɔd-ŋgwɔd to gə́ jeḛ kara mal koo sí-seḭ ra síjeḛ ŋgwɔd-ŋgwɔd togə́bè ya tɔ . 7 Togə́bè ɓa, ŋgako̰ síje, lé j’isi dan néurtije’g gə dan némeekonje’g kara ta meekun lə sí gə́ j’oo taree lé ɓa gɔl meḛ sí ar sí j’isi ne keneŋ gə meekulɔm. 8 Ɓasinè rɔ sí ḭ kə̰geŋ mbata seḭ aarje njaŋg gin Mbaidɔmbaije’g. 9 See riri ŋga ɓa j’a ra mba ra ne Ala oiyo mbata rɔlel gə́ seḭ ar sí j’isije danee’g no̰ Ala’g lə sí nḛ lé wa. 10 Dan kàrá gə loondul’g lé jeḛ n’ra ndòo rɔ Ala’g lə sí gə tamaji gə́ nuŋga so mba karee ɔr rəw ar sí j’aw j’oo sí mba gɔl meekun lə sí karee maji ɔr njoroŋ tɔ.
11 Maji kar Ala Bɔ síjeḛ ləm, gə Mbaidɔmbaije lə sí Jeju ləm tɔ lé gɔl rəw no̰ sí gə́ par gə́ rɔ sí’g. 12 Maji kar Mbaidɔmbaije ar noji gə́ seḭ waje gə na̰ ləm, gə seḭ waje gə dəwje lai ləm tɔ lé ḭ dɔ maree’g gə́ kédé-kédé aree to asəna gə ka̰ síjeḛ mbata lə sí-seḭ bèe tɔ. 13 Maji karee ar meḛ sí to kɔgərɔ mba kar sí toje dəwje gə́ to gə kəmee gə́ ta kára kara wa dɔ sí no̰ Ala Bɔ síje’g el mee ndəa gə́ Jeju Mbaidɔmbaije a ree gə dəwje ləa lai gə́ to gə kəmee lé.
© Ngambai Bible © Alliance Biblique du Tchad 1989, 2015.
