Sisak gə́ to mbai gə́ Ejiptə lé rɔ ɓee gə́ Juda
1Mb 14.25-281 Loo gə́ ɓeeko̰ lə Roboam to njaŋg ləm, siŋgá to yaa̰ ləm tɔ ndá yeḛ uba godndu Njesigənea̰ ya̰ ləm, Israɛlje lai kara d’uba d’ya̰ səa na̰’d ləm tɔ. 2 Mee ləb ko̰ɓee lə Roboam gə́ njekɔm’g mi lé ndá Sisak, mbai gə́ Ejiptə aw rɔ gə Jerusalem mbata deḛ ra kaiya d’ɔs ne ta lə Njesigənea̰ rəw. 3 Yeḛ aw gə pusu-rɔje tɔl-dɔg-dəa-tɔl-joo (120) ləm, gə njérɔ gə kundaje tɔl-dɔg-loo-rɔ-misa̰ (160) ləm tɔ, ndá yeḛ ḭ ne Ejiptə gə koso-dəwje gə́ dum tura gə́ to Libije ləm, gə Sukije ləma, gə Etiopije ləm tɔ. 4 Yeḛ taa ɓee-booje lə Judaje gə́ d’ila ndògo-bɔrɔ gugu ne dɔ dee ɓa aw kəmee gə́ kédé saar teḛ ne Jerusalem ɓəi. 5 Yen ŋga Semaeja, njetegginta aw rɔ Roboam’g gə rɔ mbaije gə́ Juda gə́ mbo̰ dɔ na̰ Jerusalem mbata ɓəl gə́ deḛ ɓəl Sisak gə́ si ree lé tɔ ndá yeḛ ula dee pana: Njesigənea̰ pa togə́bè pana: Seḭ lé seḭ ubamje ya̰mje mba̰. Bèe ndá ma kara m’uba sí m’ya̰ sí tɔ ndá m’ya̰ sí meḛ jii Sisak’g ŋga.
6 Mbaije gə́ Israɛl, gə mbai lé d’ula dɔ dee pana: Njesigənea̰ lé to njemeekarabasur ya. 7 Loo gə́ Njesigənea̰ oo to gə́ deḛ d’oso kul ndá Njesigənea̰ ula Semaeja ta togə́bè pana: Deḛ d’oso kul ɓó m’a tuji dee el ləm, m’a tila gə́ tila dɔ la sə dee gə́ el ləma, oŋg ləm a kɔm dɔ Jerusalem’g gə ji Sisak lé el ləm tɔ, 8 nɛ d’a kaw ŋguna-ŋguna nea̰’g ndá d’a gər loo kɔr kəm ra kula karm ma gə ra kula kar ɓeeko̰je gə́ raŋg lé ya.
9 Sisak, mbai gə́ Ejiptə lé ɔr rɔ aw rɔ gə́ njé gə́ Jerusalem. Yeḛ odo nébaoje gə́ mee kəi’g lə Njesigənea̰ ləm, gə nébaoje gə́ mee kəi’g lə mbai ləm tɔ lé lai ya. Yeḛ odo dərje gə́ to larlɔr gə́ Salomo̰ ra dee tɔ . 10 Mbai Roboam ra dərje gə larkas taa ne tor dee, tɔɓəi yeḛ ɔm dərje lé ji ɓé-njérɔkwɔilɔje’d gə́ to njékaḭ bada dɔ looje gə́ ka̰ ŋgəm takəije lə mbai mba kar dee ŋgəm maji. 11 Ndɔ gə́ mbai wɔji gə mba kaw mee kəi’g lə Njesigənea̰ lé ndá njérɔkwɔilɔje d’odo dərje lé ree ne, tɔɓəi deḛ tel gə dərje lé d’aw ne loo-ŋgəm dee’g tɔ.
12 Loo gə́ Roboam oso kul ula dəa ndá Njesigənea̰ tel gə́ oŋg ləa gə́ wɔji dəa aree wəi bèm ɓó yeḛ tujee ne pugudu-pugudu el. Bèe ɓa néje gə́ maji to ne mee ɓee gə́ Juda ya ɓəi.
Rudu ko̰ɓee lə Roboam
1Mb 14.21-241Mb 29-3113 Mbai Roboam lé aar njaŋg dɔ siŋgamoŋ’d ləa mee ɓee gə́ Jerusalem o̰ ne ɓee. Ləbee as rɔ-sɔ-giree-kára ɓa yeḛ tel to mbai, tɔɓəi yeḛ si Jerusalem o̰ ne ɓee as ləb dɔg-giree-siri Jerusalem, ɓee-boo gə́ Njesigənea̰ mbəree mbuna ginkoji Israɛlje’g gə mba kar ria ɓar keneŋ lé. Ri kea̰je lə Naaman, gə́ to ginkoji’g lə Amo̰ tɔ. 14 Yeḛ ra némajel mbata yeḛ ndolè goo Njesigənea̰ gə mée gə́ kára ba sur el.
15 Néraje lə Roboam gə́ kédé gə njé gə́ gogo lé ndaŋg taree mee maktub’g lə Semaeja, njetegginta ləm, gə ka̰ Ido, njetegginta ləma, gə mee maktub ndaŋg ri ginkaje’g lé ləm tɔ. Rɔ to mbuna Roboam’g gə Jeroboam’g ta-ta.
16 Roboam wəi ndá deḛ dubee mee ɓee-boo’g lə Dabid. Abija, ŋgonee ɓa o̰ ɓee toree’g tɔ.
© Ngambai Bible © Alliance Biblique du Tchad 1989, 2015.
