Josapat tel to mbai gə́ Juda
1 Josapat, ŋgolə Asa ɓa o̰ ɓee tor bɔbeeje’g. Yeḛ wa rəa kɔgərɔ rɔ ne gə Israɛlje. 2 Yeḛ unda njérɔje mee ɓee-booje gə́ Juda lai gə́ d’ila ndògo-bɔrɔ gugu ne dɔ dee ləm, yeḛ unda kudu-njérɔje mee ɓee gə́ Juda gə mee ɓee-booje gə́ Eprayim lai gə́ bɔbeeje Asa taa dee kédé lé ləm tɔ. 3 Njesigənea̰ nai gə Josapat mbata yeḛ njaa gə goo rəwje gə́ dɔtar gə́ bɔbeeje Dabid njaa keneŋ ɓó yeḛ saŋg goo magə-Baalje el, 4 nɛ yeḛ ula rəa ndubu mba gər torndu Ala lə bɔbeeje ləm, yeḛ aa dɔ godndiaje kər-kər lal ndaji néra lə Israɛlje ləm tɔ. 5 Njesigənea̰ ar ɓeeko̰ to njaŋg meḛ ji Josapat’g ndá dəwje lai gə́ Juda ree gə nékarje d’aree, ar nébaoje taa rəa pəl-pəl tɔ. 6 Mée ɔsee ɓɔḭ-ɓɔḭ gə́ kédé-kédé dɔ rəwje’g lə Njesigənea̰ ndá yeḛ ar looje gə́ ndəw gə magəje godo mee ɓee gə́ Juda ya.
7 Ləb ko̰ɓee ləa gə́ njekɔm’g munda lé yeḛ ɔm kula ji ŋgan-mbaije’g ləa gə́ Ben-Hayil, gə Abdias, gə Jakari, gə Netaneel, gə Mise mba kar dee d’aw ndoo dee né mee ɓee-booje gə́ Juda. 8 Yeḛ ula Ləbije gə́ ri dee nee sə dee na̰’d: Semaeja, gə Netania, gə Jebadia, gə Ajael, gə Semiramot, gə Jonatan, gə Adonija, gə Tobija, gə Tob-Adonija, gə Ləbije ləm, gə Elisama, gə Joram, gə́ to njékinjanéməsje ləm tɔ. 9 Deḛ ndoo dəwje né mee ɓee gə́ Juda mbata deḛ d’aw gə maktub godndu Njesigənea̰ ji dee’g. Deḛ d’aw gə looje lai gə́ mee ɓee-booje gə́ Juda ndoo koso-dəwje né tɔ.
Siŋgamoŋ lə Josapat
10 Ɓəl-boo lə Njesigənea̰ taa mee ɓeeje gə mee ɓeeko̰je lai gə́ gugu gir Juda ar dee rɔ gə Josapat el. 11 Pilistije ree gə nékarje d’aar Josapat ləm gə nékoga dɔ rɔ gə́ to gə́ larnda ləm tɔ, tɔɓəi Arabə kara ree gə́ bàl badje tɔl-dɔg-loo-siri gə dɔ dee tɔl-siri (7.700) ləm, gə bàl bya̰je tɔl-dɔg-loo-siri gə dɔ dee tɔl-siri (7.700) ləm tɔ d’aree ya.
12 Siŋgamoŋ lə Josapat lé ḭ dɔ maree’d gə́ kédé-kédé. Yeḛ ra kəije gə́ ŋgəŋ gə́ duu dɔ loo ləm, gə ɓee-booje ləm tɔ dɔ naŋg gə́ Juda gə mba kar dee to gə́ loo-ŋgəm-néje keneŋ. 13 Yeḛ ar dee ra kulaje bula yaa̰ mee ɓee-booje gə́ Juda ləm, yeḛ unda bao-rɔje ləa gə́ to njésiŋgamoŋje mee ɓee gə́ Jerusalem ləm tɔ. 14 Aa ooje, bula lə dee gə goo gel-bɔje lə dee ɓa nee: Mbuna Judaje’g lé ɓé-njérɔje gə́ tɔl-dɔg-dɔg (1.000) ndá Adna ɓa to mbai lə njérɔje gə́ tɔl-dɔg-loo-tɔl-munda (3.000) lé. 15 Deḛ gə́ mbɔree’g lé Jokana to mbai lə njérɔje gə́ tɔl-dɔg-loo-tɔl-joo gə dɔ dee rɔ-jinaijoo (200.080). 16 Deḛ gə́ mbɔree’g lé Amasia, ŋgolə Jikri, ḭ gə mee unda rəa gə kəmee ar Njesigənea̰, yeḛ aw gə bao-rɔje tɔl-dɔg-loo-tɔl-joo (200.000) tɔ. 17 Mbuna Bḛjamije’g lé Eliada to bao-rɔ gə́ njesiŋgamoŋ gə́ aw gə njérɔ gə ɓandaŋgje gə dərje lé d’as tɔl-dɔg-loo-tɔl-joo (200.000) ya tɔ. 18 Deḛ gə́ mbɔree’g lé Jojabad gə njérɔje ləa gə́ d’aw gə nérɔje ji dee’g pèrèrè gə mba rɔ ne lé d’as tɔl-dɔg-loo-tɔl gə dɔ dee rɔ-jinaijoo (200.080). 19 Deḛje nee lé ɓa to njérɔje lə mbai gə́ d’orè dɔ deḛ gə́ raŋg gə́ mbai unda dee mee ɓee-booje’g lai gə́ d’ila ndògo-bɔrɔ gugu ne dɔ deḛ gə́ to mee ɓeeko̰ gə́ Juda lé.
© Ngambai Bible © Alliance Biblique du Tchad 1989, 2015.
