D’unda Joas gə́ mbai
2Mb 11.4-201 Mee ləb gə́ njekɔm’g siri lé Jeojoda wa diŋgam mée’g ndá yeḛ man rəa ɔm ne na̰’d gə ɓé-njérɔje gə́ tɔl-tɔl (100) gə́ ri dee ɓa nee: Ajaria, ŋgolə Jeroham ləm, gə Ismael ŋgolə Jokana ləm, gə Ajaria, ŋgolə Obed ləm, gə Maaséja, ŋgolə Adaja ləma, gə Elisapat, ŋgolə Jikri ləm tɔ. 2 Deḛ d’aw gə looje lai mee ɓeeko̰ gə́ Juda, mbo̰ Ləbije gə́ d’isi mee ɓee-booje lai gə́ Juda ləm, gə mbai dɔ gel-bɔje lə Israɛlje ləm tɔ ndá deḛ ree Jerusalem tɔ. 3 Deḛ lai gə́ mbo̰ dɔ na̰ lé manrɔ dee d’ar mbai mee kəi-Ala’g. Ndá Jeojoda ula dee pana: Aa ooje, ŋgolə mbai lé a ko̰ɓee to gə́ Njesigənea̰ pa ne njaŋg wɔji ne dɔ ŋgalə Dabid lé ya . 4 Aa ooje, né gə́ seḭ a gə raje ɓa nee: Kudu sí gə́ kára gə́ to njékinjanéməsje mbuna kudu sí gə́ munda’g lé d’a gə kun kudu kula gə́ wɔji dɔ dee ndɔ-kwa-rɔ’g lé deḛ nja d’a to njéŋgəm-takəije ləm, 5 deḛ gə́ kudu kára gə́ raŋg d’a ŋgəm takəi lə mbai ləma, kudu kára gə́ raŋg d’a ŋgəm tarəwkəi lə Jesɔd ləm tɔ. Bèe ɓa koso-dəwje lai d’a kaar mee gadloo’g lə Njesigənea̰ ya. 6 Maji kar dəw kára kara andə mee kəi’g lə Njesigənea̰ el nɛ njékinjanéməsje gə Ləbije gə́ d’aw ra kula keneŋ, deḛ ɓa d’a kandə keneŋ mbata deḛ to gə kəmee ya. Koso-dəwje lai ndá d’a to njéŋgəmlooje lə Njesigənea̰ tɔ. 7 Ləbije d’a gugu dɔ mbai lé sub, nana kara a kaar gə nérɔ jia’g jia’g mba kar nana ɓa gə́ ndigi kandə mee kəi’g ndá d’a tɔlee: seḭ a kaarje mbɔr mbai’g loo gə́ yeḛ a gə kandə kəi əsé loo gə́ yeḛ a gə teḛ raga tɔ.
8 Ləbije gə Judaje lai ra néje lai gə́ Jeojoda, njekinjanéməs un ndia dɔ’g ar dee lé tɔl bém ya. Nana kara mbo̰ dəwje ləa, deḛ gə́ d’un kudu ra kula lə dee ndɔ-kwa-rɔ’g ləm, gə deḛ gə́ d’ḭ loo-kula’g gə ndɔ-kwa-rɔ teḛ ləm tɔ, mbata Jeojoda lé ɔr kəm kudu dee kára kara el. 9 Jeojoda, njekinjanéməs ar ɓé-njérɔje gə́ tɔl-tɔl (100) lé niŋgaje gə dər-gugujuje gə ŋgan dərje gə́ lam-lam gə́ kédé mbai Dabid ɔm dee mee kəi-Ala’g tɔ. 10 Yeḛ unda dəwje ar dee gugu ne dɔ mbai lé sub, nana kara aar gə nérɔje jia’g-jia’g, un kudee mbɔr kəi gə́ dɔkɔl saar teḛ ne mbɔree gə́ dɔgel mbɔr loo-nékinjaməs’g ləm gə mbɔr kəi’g ləm tɔ. 11 Deḛ d’ar ŋgolə mbai lé aw no̰ dee’g kédé ndá deḛ d’ula dɔgugu-mbai dəa’g d’aree nékɔrgoota gə́ wɔji dəa ɓa d’undá ne gə́ mbai ɓəi. Bèe ɓa Jeojoda gə ŋganeeje d’wa dəa gə ubu ndá deḛ pana: Maji kar dɔ mbai ai səgərə ya!
12 Loo gə́ Atali oo ndu koso-dəwje gə́ ɓar loo gə́ d’aḭ d’ula ne rɔnduba dɔ mbai’g ndá yeḛ ree rɔ koso-dəwje gə́ mee kəi’g lə Njesigənea̰ lé. 13 Yeḛ aa loo oo mbai gə́ aar tar dɔ loo-kaar’g gə́ to tarəwkəi’g ndá njékɔrno̰-njékim to̰to̰je d’aar mbɔr mbai’g lé ləm, koso-dəwje lai gə́ mee ɓee’g ra rɔlel ləm, d’im to̰to̰je ləma, njékɔspaje gə́ d’aw gə nékimje ji dee’g lé d’ɔr ne no̰ pa kula rɔnduba ləm tɔ. Ndá Atali til kubuje rəa’g hao̰-hao̰ pa ne pana: Kula njuma̰ ɓa nee! Kula njuma̰ ɓa nee! 14 Yen ŋga Jeojoda, njekinjanéməs un ndia ar ɓé-njérɔje gə́ tɔl-tɔl (100) lé ar deḛ gə́ rəm pər gə́ rəa’g lé ula dee pana: Areeje ɔd loo-kaar sí’g teḛ raga, ɓó lé nana ɓa gə́ aw gée’g ndá tɔleeje gə kiambas ya. Mbata njekinjanéməs pa kédé pana: Maji kar dee tɔlee mee kəi’g lə Njesigənea̰ el. 15 Deḛ d’aree loo ndá yeḛ aw mee kəi’g lə mbai gə tarəwkɔg gə́ ria lə Rəw-kaw-kundaje: lé gə́ neelé ɓa deḛ tɔlee keneŋ tɔ.
16 Jeojoda ləm, gə mbai lé ləma, gə koso-dəwje ləm tɔ lé manrɔ dee bər-bər gə mba to koso-dəwje lə Njesigənea̰ ya. 17 Koso-dəwje lai d’aw mee kəi’g lə magə-Baal d’aw jané kad-kad ləm, tɔ loo-nékinjanéməsje gə́ wɔji dəa gə néndajije ləa pɔs-pɔs ləm tɔ, tɔɓəi deḛ tɔl Matan, njekinjanéməs lə Baal lé no̰ loo-nékinjanéməsje’g tɔ. 18 Jeojoda tel ɔm kula gə́ wɔji dɔ kəi lə Njesigənea̰ ji njékinjanéməsje gə́ to Ləbije to gə́ Dabid kai dee ne kula mee kəi’g lə Njesigənea̰ ar dee d’inja ne nékinjanéməsje gə́ ka̰ roo kar Njesigənea̰ to gə́ ndaŋg ne taree mee maktub godndu’g lə Moyis gə pa kalrɔje gə goo ndukunje lə Dabid lé. 19 Yeḛ unda njéŋgəm-takəije takəije’g lə Njesigənea̰ gə mba kar nana ɓa gə́ ra né gə́ mina̰ gə́ rara kara a kandə keneŋ el tɔ.
20 Yeḛ ar ɓé-njérɔje gə́ tɔl-tɔl (100) ləm, gə dəwje gə́ boo-boo gə́ dəwje ra torndu dee ləma, gə koso-dəwje lai gə́ mee ɓee’g ləm tɔ d’ḭ gə mbai lé mee kəi’g lə Njesigənea̰ d’unda loo teḛ. Deḛ d’andə mee kəi’g lə mbai gə tarəw gə́ ur dɔ mareeje’g ndá deḛ d’ar mbai si dɔ kalimbai ko̰ɓee’g tɔ.
21 Koso-dəwje lai d’al rɔ dee ləm, mee ɓee-boo to lɔm ləm tɔ. Deḛ tɔl Atali gə kiambas ya.
© Ngambai Bible © Alliance Biblique du Tchad 1989, 2015.
