Ejekias wa dɔ gɔl rəw ra kula mee kəi gə́ to gə kəmee’g
1 Loo gə́ deḛ ra naḭ lé tɔl bém mba̰ ndá deḛ lai gə́ to Israɛlje gə́ d’aar keneŋ lé d’ɔd d’aw mee ɓee-booje gə́ Juda d’aw təd néndajije, gə tuji magəje, gə tuji dɔ looje gə́ ndəw gə loo-nékinjanéməsje mee ɓee’g lə Judaje gə Bḛjamije lai ləm, gə mee ɓee’g lə Eprayimje gə Manasəje ləm tɔ pugudu-pugudu. Tɔɓəi Israɛlje tel d’aw mee ɓee-booje’g lə dee, ar nana kara tel aw mee kəi’g ləa-ləa.
2 Ejekias unda njékinjanéməsje gə Ləbije gə kudu dee kudu dee gə goo kai gə́ kai dee lé nana kara gə goo kula rəa-rəa ndá njékinjanéməsje gə Ləbije ɓa kula lə dee wɔji dɔ kinja nékinjanéməsje gə́ ka̰ roo gə́ ka̰ kɔm na̰’d ləm, gə mba ra kula gə́ raŋg ləma, gə mba kɔs paje gə pa pidije ləm tɔ loo-si Njesigənea̰’g lé. 3 Mbai lé un ta némajije ləa ar mbata lə nékinjanéməsje gə́ ka̰ roo gə ndɔ-kwa-rɔje ləm, gə naḭje gə́ teḛ sigi ləma, gə ndɔ ra naḭje ləm tɔ to gə́ deḛ ndaŋg ne taree mee maktub godndu’g lə Njesigənea̰ lé .
4 Tɔɓəi yeḛ un ndia ar koso-dəwje gə́ d’isi Jerusalem mba kar dee d’aa dɔ godndu Njesigənea̰ gə ŋgonkoji tɔ . 5 Loo gə́ d’ila mber ndukun neelé ndá Israɛlje d’un ta nékiŋgaje lə dee gə́ dɔtar yaa̰ gə́ to kó ləm, gə mán-nduú gə́ sigi ləm, gə ubu ləm, gə ubu tə̰ji ləma, gə kandə néndɔje lai ləm tɔ, deḛ ree gə ta néje lai gə́ dɔg ɓa kun təa kára-kára kar lé yaa̰ tɔ. 6 Yen ŋga koso-dəwje gə́ Israɛl gə Juda gə́ d’isi mee ɓee-booje gə́ Juda d’ar ta néje gə́ dɔg ɓa kun təa kára-kára kar gə́ wɔji dɔ nékulje gə́ boo-boo əsé njé gə́ lam-lam ləm, gə ta néje gə́ to gə kəmee gə́ dɔg ɓa kun təa kára-kára kar gə́ d’unda gə kəmee d’ar Njesigənea̰, Ala lə dee ləm tɔ ndá d’ɔm dee gə kudee-kudee tɔ. 7 D’un kudu kɔm dee gə kugee-kugee mee naḭ gə́ munda’g ndá deḛ tɔlee bém mee naḭ gə́ njekɔm’g siri tɔ. 8 Ejekias gə ŋgan-mbaije ree d’oo kudu néje neelé ndá deḛ pidi ne Njesigənea̰ ləm, deḛ tɔr ne ndu dee dɔ koso-dəwje’g ləa gə́ Israɛl ləm tɔ.
9 Ejekias dəji njékinjanéməsje gə Ləbije ta dɔ néje’g neelé gə́ d’wa dee kugu lé. 10 Yen ŋga Ajaria, ŋgɔ-njekinjanéməs gə́ to gə́ gel bɔ’g lə Sadɔk lé ilá keneŋ pana: Ləw ba gə́ d’un kudu ree gə nékarje mee kəi’g lə Njesigənea̰ lé jeḛ j’usɔje j’aree as sí nag ndá jeḛ j’ya̰je gesee gə́ nai lé mbata Njesigənea̰ tɔr ndia dɔ koso-dəwje’g ləa, bèe ɓa aa oo, gesee gə́ nee lé nai ne yaa̰ gə mbəa.
11 Ejekias un ndia gə mba kar dee gɔl ŋgan kəije mee kəi’g lə Njesigənea̰ ndá deḛ gɔl dee ya tɔ. 12 Deḛ ree gə nékarje gə ta néje gə́ dɔg ɓa kun təa kára-kára kar, gə néje gə́ to gə kəmee lé. Konania gə́ to Ləbi lé to njekaa dɔ néje neelé ar ŋgokea̰ Simei to njekɔm’g joo ləa. 13 Jehiel, gə Ajajia, gə Mahat, gə Ajael, gə Jerimot, gə Jojabad, gə Eliel, gə Ismakia, gə Mahat, gə Benaja, deḛ to njékulaje gel Konania’g gə ŋgokea̰ gə́ Simei’g gə goo ndukun lə mbai Ejekias ləm, gə Ajaria, njekaa dɔ kəi-Ala ləm tɔ. 14 Koré, ŋgolə Jimna gə́ to Ləbi ɓa to njeŋgəm takəi gə́ par gə́ bər lé ləm, yeḛ to njekoo goo nékarje gə́ d’ḭ gə meḛ dee d’un d’ar Ala ləma, gə mba kai néje gə́ d’un tɔji Njesigənea̰ gə néje gə́ to gə kəmee doi ləm tɔ. 15 Mee ɓee-booje gə́ to ka̰ njékinjanéməsje lé deḛ d’unda Edḛ, gə Mḭjamḭ, gə Juje, gə Semaeja, gə Amaria, gə Sekania gelee’g gə mba kar dee ra kula kai néje kar ŋgako̰ deeje gə́ tɔg-tɔg əsé njé gə́ lam-lam gə ŋgonkoji gə goo kudu dee kudu dee ləm, 16 gə ŋganje gə́ diŋgam gə́ ləb dee munda gə́ tar gə́ ndaŋg ri dee ləm, gə deḛ lai gə́ d’aw mee kəi’g lə Njesigənea̰ gə ndɔ dee ndɔ dee gə mba ra kula gə́ wɔji dɔ dee gə goo kai gə́ kai dee lé ləm, 17 gə njékinjanéməsje gə́ ndaŋg ri dee gə goo gel-bɔje lə dee ləm, gə Ləbije un kudee dɔ deḛ gə́ ra ləb rɔ-joo gə́ tar gə goo kula lə dee gə kudu dee kudu dee ləm, 18 gə deḛ lai gə́ mbo̰ dɔ na̰ gə d’unda ri dee gə ri ŋgan deeje gə́ gɔ-gɔ ləm, gə denéje lə dee ləma, gə ŋgan deeje gə́ diŋgam gə njé gə́ dené ləm tɔ mbata deḛ d’unda rɔ dee gə kəmee doi gə mba ra kula lə dee gə ŋgonkoji mee kəi gə́ to gə kəmee’g lé tɔ. 19 Ŋgaka Aaro̰ gə́ to njékinjanéməsje gə́ d’isi wala mee looje gə́ gugu dɔ ɓee-booje lé d’ɔr diŋgamje gə goo ri dee mbata lə dee gə mba kar dee kai diŋgamje gə́ njékinjanéməsje gə Ləbije gə́ ndaŋg ri dee ta néje’d gə́ wɔji dɔ dee dɔ dee lé.
20 Yee ɓa gə́ né gə́ Ejekias ra mee ɓee’d gə́ Juda lai, yeḛ ra né gə́ maji gə né gə́ danasur gə né gə́ tɔgərɔ no̰ Njesigənea̰, Ala’g lé ləa ya. 21 Yeḛ ra néje lai gə ŋgaw mée bura ləm, yeḛ teḛkɔr dɔ néje lai’d gə́ yeḛ ra ya ləm tɔ ndolè ne goo Ala mbata kulaje gə́ mee kəi Ala’g lé ləm, mbata lə godnduje gə tornduje ləm tɔ.
© Ngambai Bible © Alliance Biblique du Tchad 1989, 2015.
