Jojias ra naḭ Pag
2Mb 23.21-231 Jojias ra naḭ Pag ula ne rɔnduba dɔ Njesigənea̰’g mee ɓee gə́ Jerusalem ndá deḛ tɔl badə Pag ndɔ dɔg-giree-sɔ lə naḭ gə́ dɔtar. 2 Yeḛ unda njékinjanéməsje ta-kulaje’g lə dee ndá yeḛ ula diŋgam meḛ dee’g gə mba kar dee ra kula gə́ wɔji dɔ kəi lə Njesigənea̰ lé. 3 Yeḛ ula Ləbije gə́ to njéndoo Israɛlje ta ləm, gə to dəwje gə́ to gə kəmee mbata lə Njesigənea̰ ləm tɔ pana: Undaje sa̰duk-manrɔ gə́ to gə kəmee mee kəi gə́ Salomo̰, ŋgolə Dabid, mbai gə́ Israɛl ra lé. Seḭ a kodéje dɔ tam sí’g el ŋga. Ɓasinè lé seḭ a raje né karje Njesigənea̰, Ala lə sí ləm, gə Israɛlje gə́ to dəwje ləa ləm tɔ. 4 Waje dɔ gɔl rɔ sí gə goo gel-bɔje lə sí ləm, gə goo kai gə́ kai sí gə kudu sí kudu sí ləm tɔ to gə́ Dabid, mbai gə́ Israɛl gə ŋgonee Salomo̰ d’ar dee ndaŋg ne taree mee maktubje’g lə dee lé . 5 Maji kar sí aarje loo-kaar sí’g mee kəi-si-Magə’g gə goo gel-bɔje lə ŋgako̰ síje gə́ to njénojije lə sí lé ɓəd-ɓəd ləm, gə goo kai gə́ deḛ kai gel-bɔje lə Ləbije ləm tɔ. 6 Maji kar sí tɔlje badə Pag ləm, undaje rɔ sí gə kəmee ləm tɔ ndá waje dɔ gɔlee mbata lə ŋgako̰ síje gə goo ta gə́ Njesigənea̰ pa gə ndu Moyis lé ya.
7 Jojias ɔr ŋgan badje gə ŋgan bya̰je as tɔl-dɔg-loo-rɔ-munda (3.000) mbata lə naḭ Pag ləm, gə bɔ maŋgje tɔl-dɔg-loo-munda (3.000) ləm tɔ mbuna nékulje’g ləa-yeḛ ar koso-dəwje lai gə́ d’aar keneŋ lé tɔ. 8 Ŋgan-mbaije ləa kara d’ḭ gə meḛ dee d’wa noji gə koso-dəwje gə njékinjanéməsje gə Ləbije tɔ. Hilkija, gə Jakari, gə Jehiel gə́ to njékaa dɔ kəi lə Njesigənea̰ lé d’ar njékinjanéməsje ŋgan badje tɔl-dɔg-loo-joo gə dɔ dee tɔl-misa̰ (2.600) ləm, gə bɔ maŋgje tɔl-munda (300) mbata lə naḭ Pag ləm tɔ. 9 Konania, gə Semaeja, gə Netaneel gə ŋgakea̰je Hasabia gə Jeyel gə Jojabad gə́ to njékɔrno̰ Ləbije lé d’ar Ləbije ŋgan badje tɔl-dɔg-loo-mi (5.000) gə bɔ maŋgje tɔl-mi (500) mbata lə naḭ Pag tɔ.
10 Rəw kulaje neelé deḛ d’wa dɔ gɔlee jəb-jəb ndá njékinjanéməsje gə Ləbije d’aar loo-kaar dee’g gə goo kudu dee kudu dee ləm, gə goo ndukun lə mbai ləm tɔ. 11 Deḛ tɔl badə Pag lé ndá njékinjanéməsje saga məs gə́ deḛ taa ji Ləbije’g ləm, Ləbije tó ndar nékulje lé ləm tɔ. 12 Deḛ d’unda nékinjanéməsje gə́ ka̰ roo lé gə kəmee mba kar gel-bɔje lə koso-dəwje mba kar dee d’inja dee d’ar Njesigənea̰ gə goo ta gə́ to mee maktub’g lə Moyis ləm, deḛ ra togə́bè gə bɔ maŋgje ləm tɔ. 13 Deḛ nuŋga badə Pag lé dɔ pər’d gə goo ndukun ləm, deḛ ndiri néje gə́ to gə kəmee mee ŋgoro’g ləm, gə mee bai ndiri né’g ləma, gə mee əb-pərje’g ləm tɔ. Tɔɓəi d’ɔs rɔ dee ɓad mba kai dəwje lai da neelé tɔ . 14 Gée gə́ gogo deḛ gɔl né gə́ wɔji dɔ dee-deḛ ləm, gə mbata lə njékinjanéməsje ləm tɔ mbata njékinjanéməsje gə́ to ŋgaka Aaro̰ lé ra kula saar kàrkemetag gə mba kinja nékinjanéməsje gə́ ka̰ roo ləm, gə ubeeje lé ləm tɔ. Gelee gə́ nee ɓa Ləbije ɓa to ne njégɔl néje mbata lə dee ləm, gə mbata lə ŋgaka Aaro̰ ləm tɔ. 15 Bao-paje gə́ to ŋgaka Asap lé d’aar loo-kaar dee’g gə goo ndukun lə Dabid, gə Asap, gə Heman, gə Jedutun gə́ to njekoo ta mee Ala’g lé mbata lə mbai lé, tɔɓəi njéŋgəm takəije d’aar tarəwkəije’g kára kára lai tɔ. Deḛ lé d’ya̰ goo kula lə dee el mbata ŋgako̰ deeje gə́ to Ləbije lé gɔl nésɔ gə́ wɔji dɔ dee tɔ . 16 Yee ɓa to rəw gə́ deḛ d’wɔji mee ndəa’g neelé mba ra ne kula lə Njesigənea̰ gə́ wɔji dɔ naḭ Pag ləm, mba kinja ne nékinjanéməsje gə́ ka̰ roo dɔ loo-nékinjaməs’g lə Njesigənea̰ ləm tɔ gə goo godndu mbai Jojias lé.
17 Israɛlje gə́ d’aar lée’g neelé ra naḭ Pag mee ndəa’g neelé ləm, deḛ ra naḭ gə́ wɔji dɔ muru gə́ əm-tiné godo keneŋ as ndɔ dee siri ləm tɔ . 18 Un kudee mee ndəa’g lə njetegginta Samel saar lé deḛ ra naḭ Pag gə́ boo togə́bè mee ɓee gə́ Israɛl el ya ɓəi. Mbai kára kara gə́ mbuna mbaije gə́ Israɛl ra gar naḭ Pag to gə́ Jojias gə njékinjanéməsje gə Ləbije gə Judaje gə Israɛlje gə́ d’isi lée’g neelé gə njé gə́ Jerusalem ra lé bèe el tɔ. 19 Deḛ ra naḭ Pag lé mee ləb ko̰ɓee’g lə Jojias gə́ njekɔm’g dɔg-giree-jinaijoo.
Rudu ko̰ɓee lə Jojias lé
2Mb 23.28-3020 Goo néje’g lai neelé loo gə́ Jojias gɔl kəi lə Njesigənea̰ mba̰ ndá Neko, mbai gə́ Ejiptə ɔr rɔ aw gə mba rɔ mee ɓee gə́ Karkəmis mbɔr baa gə́ Epratə. Jojias teḛ aw gə mba rɔ səa tɔ. 21 Nɛ Neko ula njékaḭkulaje rəa’g gə mba kar dee dəjee pana: See ta ɗi ɓa to mbuna síjeḛ səi-i mbai gə́ Juda lé wa. To i ɓa m’aw gə mba rɔ səi ɓogənè el nɛ njeba̰ gə́ raŋg gə́ jeḛ səa j’aw gə na̰ gə ta lé ɓa m’aw mba rɔ səa. Bèe ɓa Ala ulam pana: M’ɔs rɔm ɓad m’aw mba rɔ səa. Maji kari oma̰ gə Ala gə́ njenai səm lé el nà yeḛ a tujii. 22 Nɛ Jojias oo ta neelé gə́ né el ndá yeḛ tel rəa raŋg gə mba kaw rɔ səa lal koo ne ta lə Neko gə́ ḭ ta Ala’g lé. Yeḛ aw kəmee gə́ kédé gə mba kaw rɔ səa kəm wəl-loo gə́ Megido. 23 Njérɔ gə ɓandaŋgje tur mbai Jojias ndá yeḛ ula kuraje ləa pana: Rəmje səm gogo mbata m’iŋga doo gə́ to ɓəl.
24 Kuraje ləa d’unee gə pusu-rɔ d’aw d’ilá mee pusu gə́ njekɔm’g joo gə́ to kea̰-yeḛ ndá d’aw səa Jerusalem. Yeḛ wəi ndá deḛ dubee mee dɔɓar bɔbeeje’g. Dəwje gə́ Juda gə Jerusalem lai d’wa ndòo Jojias tɔ.
25 Jeremi ndaŋg pa no̰ ndòo gə́ wɔji dɔ Jojias ndá bao-paje gə́ diŋgam gə njé gə́ dené lai pata gə́ wɔji dɔ Jojias loo no̰ ndooje’g lə dee saar teḛ ne mee ndəa gən tɔ, yee ɓa d’aree tel to ne néjiɓee mee ɓee gə́ Israɛl ya. Paje neelé deḛ ndaŋg taree mee maktub pa no̰ ndooje’g.
26 Ges sorta néraje lə Jojias gə kula reaje gə́ yeḛ təd ne kag Ala to gə́ godndu Njesigənea̰ wɔji lé 27 néreaje gə́ kédé gə gogo lé ndaŋg taree mee maktub’g lə mbaije gə́ Israɛl gə Juda ya.
© Ngambai Bible © Alliance Biblique du Tchad 1989, 2015.
