1 Bèe ɓa kulaje lai gə́ Salomo̰ ra mbata kəi lə Njesigənea̰ lé tɔlee bém. Yen ɓa yeḛ odo larnda, gə larlɔr, gə nékulaje gə́ bɔbeeje gə́ Dabid unda dee gə kəmee lé ndá yeḛ ɔm dee mee kəi-nébaoje’g lə Ala tɔ .
D’unda sa̰duk-manrɔ mee kəi’d gə́ to gə kəmee lé
1Mb 8.1-132 Togə́bè ɓa mbai Salomo̰ mbo̰ ŋgatɔgje gə́ Israɛl ləm, gə mbai dɔ ginkojije lai ləma, gə mbai dɔ gel-bɔje lə Israɛlje lai ləm tɔ dɔ na̰’g mee ɓee gə́ Jerusalem gə mba kar dee ree gə sa̰duk-manrɔ lə Njesigənea̰ gə́ to mee ɓee-boo’g lə Dabid gə́ to Sio̰ lé . 3 Diŋgamje lai gə́ Israɛl mbo̰ dɔ na̰ rɔ mbai Salomo̰’g gə mba ra naḭ mee naḭ gə́ njekɔm’g siri lé. 4 Loo gə́ ŋgatɔgje gə́ Israɛl lai ree mba̰ ndá Ləbije d’un sa̰duk-manrɔ lé. 5 Deḛ d’aw gə sa̰duk-manrɔ lé ləm, gə kəi-kubu-kiŋga-na̰ lé ləma, gə nékulaje lai gə́ to gə kəmee gə́ to mee kəi kubu’g lé ləm tɔ: njékinjanéməsje gə Ləbije ɓa gə́ njékodo néje neelé ya. 6 Mbai Salomo̰ gə dəwje gə́ Israɛl lai gə́ mbo̰ dɔ na̰ lé ree d’aar no̰ sa̰duk-manrɔ’g. Deḛ d’inja nékinjanéməsje gə́ to badje, gə maŋgje gə́ d’askəm tura dee əsé koo bula lə dee el mbata bula lə dee gə́ digi-digi lé.
7 Njékinjanéməsje d’un sa̰duk-manrɔ lə Njesigənea̰ lé d’aw d’unda mee loo gə́ wɔji dəa gə́ to mee kəi’d gə́ to gə kəmee doi, gel bag néndaji Nékundaje gə́ dara’g lé. 8 Mbata néndaji Nékundaje gə́ dara lé naji bag dee dɔ loo’d gə́ sa̰duk-manrɔ to keneŋ, d’o̰ ne dɔ sa̰duk-manrɔ lé gə dɔ kunda kagje’g tɔ. 9 Kunda-kagje neelé ŋgal yaa̰ ar dəw askəm koo ta deḛ gə́ dəs loo gə́ to gə kəmee doi lé ya, nɛ a koo raga el. Sa̰duk neelé to keneŋ saar teḛ mee ndɔ gə́ ɓogənè tɔ. 10 Né gə́ raŋg to mee sa̰duk-manrɔ’g lé el, nɛ bəgərə mbalje joo gə́ Moyis taa dɔ mbal gə́ Oreb’g, loo gə́ Njesigənea̰ man ne rəa keneŋ ar Israɛlje ndəa gə́ d’unda ne loo mee ɓee gə́ Ejiptə teḛ lé ɓa to keneŋ ya .
11 Loo gə́ njékinjanéməsje d’unda loo mee loo gə́ to gə kəmee doi’g teḛ lé (mbata njékinjanéməsje lai gə́ d’aar keneŋ lé d’ɔr won rɔ dee lal ra gə kudu dee kudu dee lé) 12 ndá Ləbije lai gə́ to njékɔspaje gə́ ri dee lə Asap, gə Heman, gə Jedutun, gə ŋgan deeje gə ŋgako̰ deeje gə́ d’ula kubu gə́ ra gə kúla palégal rɔ dee’g ləm, gə d’aar gə́ kel bər lə loo-nékinjaməs gə nékimje gə́ to ma̰dje gə́ sa səgə-səgə ləm, gə kṵdu-ko̰déje ləma, gə kṵdu-kagje ləm tɔ tɔɓəi njékinjanéməsje tɔl-dɔ-dee-rɔ-joo (120) d’aar mbɔr dee’g d’aar d’im to̰to̰je ləm tɔ. 13 Yen ŋga loo gə́ deḛ gə́ njékim to̰to̰je gə njékɔspaje lé d’ɔm na̰’d yəg d’unda ndu dee na̰’d gə mba pidi Njesigənea̰ ndá deḛ d’ar to̰to̰je ləm, gə ma̰dje gə́ sa səgə-səgə ləma, gə nékimje gə́ raŋg ləm tɔ ɓar ŋgaw d’ula ne rɔnduba dɔ Njesigənea̰’g gə taje nee pana: Mbata yeḛ lé maji dum ləm, meekɔrjol ləa to saar-saar gə no̰ ləm tɔ. Mee kàree gə́ neelé mum taa mee kəi gə́ to kəi lə Njesigənea̰ lé pəl-pəl tɔ . 14 Njékinjanéməsje d’askəm kisi keneŋ mba ra kula lə dee el gə mbata mum lé, mbata rɔnduba lə Njesigənea̰ taa mee kəi lə Ala pəl-pəl tɔ.
© Ngambai Bible © Alliance Biblique du Tchad 1989, 2015.
