Ya̰je loo arje Njekurai tur dɔ sí el
1 Togə́bè ɓa ma m’wɔji məəm’g njaŋg gə mba tel kaw ɓee lə sí kaw kula kəm sí ndòo el ŋga. 2 Ɓó lé m’ula kəm sí ndòo ndá see na̰ ɓa askəm kam rɔlel wa. See to yeḛ gə́ m’ula kəmee ndòo lé el wa. 3 Ma m’ndaŋg maktub m’ar sí togə́bè mba kar ndɔ gə́ m’a teḛ dɔ sí’g lé deḛ gə́ m’ŋgina rɔlel rɔ dee’g lé d’a kam rɔlel ya ɓó kəmndoo el. Mbata ma m’gər gao, rɔlel lə sí wɔji dɔ kama ya. 4 Tɔgərɔ ya, ma m’isi dan boo-némeeko̰’g ləm, kaarm to ne kəgəgə ləma, kəm təd ne mán-no̰ mbiriri ləm tɔ, yee ɓa ma m’ndaŋg ne maktub m’ar sí mba kar sí gərje gao ma m’ndigi sí gə məəm gə́ ɔr jol-jol ya ɓó gə mba ra sə sí nékəmndoo el.
5 Ɓó lé dəw kára mbuna sí’g ula kəm mareeje ndòo ndá yeḛ ula kəm-ma ya ndòo gə karm el, nɛ seḭje kara yeḛ ula kəm sí-seḭ ndòo ya tɔ. M’pa bèe m’wɔji ne dɔ njé gə́ na̰je ba, ɓó lé m’wɔji ne dɔ sí lai ndá a to kəsta. 6 Boo-ta gə́ seḭje bula ɔmje ne dəa’g lé yee ɓa as ŋga. 7 Bèe ndá ɓasinè lé maji kar sí arje meḛ sí oso lemsé dəa’g ləm, gɔlje mée ləm tɔ gə mba kar nékəmndoo lé turu dəa el. 8 Ma m’ra ndòo rɔ sí’g mba kar sí tel wáje gə́ rɔ sí’g ya. 9 Mbata ma m’ndaŋg maktub m’ar sí mba kuru ne meḛ sí koo see seḭ a toje ŋgankojije dɔ néje’g lai wa. 10 Bèe ɓa dəw gə́ rara ɓa gə́ seḭ arje meḛ sí oso lemsé dəa’g ndá ma kara m’ar məəm oso lemsé dəa’g ya tɔ. Tɔɓəi dəw gə́ m’ar məəm oso lemsé dəa’g lé ɓó lé m’ar məəm oso lemsé dəa’g kara ma m’ra mbata lə sí-seḭ ɓa no̰ Kristi’g, 11 mba kya̰ ne loo kar Njekurai tel ne dɔ sí wagəsa el mbata yeḛ lé jeḛ n’gər goso ləa gao ya.
12 Loo gə́ m’teḛ Troas mba kɔr gin Tagə́maji keneŋ lé Mbaidɔmbaije ar rəw to tag ya, nɛ m’oo loo kila rɔm po̰ keneŋ el mbata ma m’iŋga ŋgokɔm Titə keneŋ el . 13 Gelee gə́ nee ɓa m’ula dee gə lapia ɓa m’ya̰ dee mba kaw Masedoinə ɓəi.
14 Maji ra Ala oiyo mbata mbɔl dɔ Kristi lé ɓa yeḛ ar sí n’dum ne loo ta-ta ləm, yeḛ ar sí j’unda ne baḭ gər ndiaa gə loo-loo ləm tɔ. 15 Jeḛ lé j’isi mbuna njé gə́ d’aji’g ləm, gə mbuna deḛ gə́ d’a gə saḭ’g ləm tɔ, nɛ jeḛ j’ə̰də baḭ Kristi ɓa no̰ Ala’g lé. 16 Njé gə́ na̰je lé baḭ neelé to baḭ ka̰ yoo gə́ wɔji dɔ yoo dee ya nɛ njé gə́ raŋg lé to baḭ ka̰ kəmə gə́ a kar dee d’isi ne kəmba tɔ. See na̰ ɓa askəm ra kula gə́ togə́bè wa. 17 Mbata jeḛ lé jeḛ n’tel ta lə Ala j’ila gel asəna gə ka̰ dəwje gə́ raŋg gə́ ra togə́bè lé el. Nɛ jeḛ ndá ne meḛ sí kaḭ m’pa ne ta mbata lə Ala ləm, jeḛ j’ɔm na̰’d gə Kristi m’pa ne ta no̰ Ala’g ləm tɔ.
© Ngambai Bible © Alliance Biblique du Tchad 1989, 2015.
