Manasə, mbai gə́ Juda
2SgI 33.1-102SgI 18-201 Manasə ra ləbee dɔg-giree-joo ɓa yeḛ tel to mbai ndá yeḛ si Jerusalem o̰ ne ɓee as ləb rɔ-mi-giree-mi. Kea̰je ria lə Hepsiba. 2 Yeḛ ra né gə́ majel kəm Njesigənea̰’g gə goo néraje gə́ mina̰ lə ginkoji dəwje gə raŋg gə́ Njesigənea̰ tuba dee no̰ Israɛlje’g kédé lé . 3 Yeḛ tel uba dɔ looje gə́ ndəw gə́ bɔbeeje Ejekias tuji dee kédé lé ləm, yeḛ unda loo-nékinjanéməsje ar magə-Baal ləm, yeḛ ra magə-Astarté to gə́ Akab, mbai gə́ Israɛl ra ləma, yeḛ unda barmba no̰ boo-néje lai gə́ dara pole dee ne ləm tɔ. 4 Kédé lé Njesigənea̰ pa pana: Jerusalem ɓa to loo gə́ rim a ɓar keneŋ. Nɛ lé bèe kara Manasə ra loo-nékinjanéməsje mee kəi’g lə Njesigənea̰ ya . 5 Yeḛ unda loo-nékinjanéməsje ar boo-néje gə́ dara mee gadlooje joo gə́ to mee ndògo gə́ wɔji dɔ kəi lə Njesigənea̰ lé. 6 Yeḛ ila ŋgonee pər’d ləm, yeḛ tən kil-lə-ndije gə lije ɓa gə mba gər ne néje gə́ d’a gə teḛ ləma, yeḛ unda dəwje gə́ njéɓar ndil dəwje ar dee pata néje gə́ d’a gə ree ləm tɔ. Yeḛ ra né gə́ majel gə́ kédé-kédé kəm Njesigənea̰’g mba kar mée ea̰ ne ya. 7 Yeḛ unda magə-Astarté gə́ yeḛ ra lé mee kəi gə́ Njesigənea̰ ula Dabid gə ŋgonee Salomo̰ pana: To mee kəi gə́ nee gə mee Jerusalem gə́ ma mbəree mbuna ginkoji Israɛlje’g lai gə mba kunda rim dɔ’g saar gə no̰ lé . 8 Ɓó lé d’unda kəmkàr dɔ rɔ dee’g gə mba ra néje lai gə́ m’un ndum dɔ’g m’ar dee ləm, gə godnduje lai gə́ kura ləm Moyis ar dee ləm tɔ ndá m’a kar Israɛlje d’un gɔl dee d’aw yo-yo nee-nee gir ɓee gə́ m’ar bɔ deeje raga lé el ŋga. 9 Nɛ deḛ d’ila ŋgonkoji dɔ ta’g lé el ya saar, ndá Manasə ɓa ɔs dee ɓɔḭ-ɓɔḭ ar dee ndəm ləm, ra né gə́ majel unda ka̰ ginkoji dəwje gə raŋg gə́ Njesigənea̰ tuji dee no̰ Israɛlje’g kédé lé ləm tɔ.
10 Togə́bè ɓa Njesigənea̰ pa taje nee gə ndu kuraje ləa gə́ to njéteggintaje togə́bè pana: 11 Mbata Manasə, mbai gə́ Juda ra néje gə́ mina̰ gə́ nee ləm, mbata yeḛ ra néje gə́ majel aree ur dɔ ka̰ Amɔrje lai gə́ ra nea̰’g kédé ləma, mbata yeḛ ɔs Judaje ya kara ar dee ra kaiya gə goo magəje ləa ləm tɔ, 12 ndá aa ooje, ta gə́ Njesigənea̰, Ala lə Israɛlje pa lé ɓa nee: N’a gə kar nékəmndoo teḛ dɔ Jerusalem’g gə dɔ Judaje’g lai gə mba kar nana ɓa gə́ taree a koso mbia’g ndá mbia a kudu jigi karee si ndiŋ ya. 13 N’a kila kúla-kwɔji-né lə Samarije gə nékwɔji-né lə gel-bɔje lə Akab dɔ Jerusalem’g ndá n’a tuji Jerusalem kwa rəw-rəw to gə́ dəw togo ne mee ka-lar bɔr péd-péd dəb təa naŋg loo gə́ togo mba̰ bèe lé. 14 N’a kuba ges koso-dəwje gə́ to né ka̰ neḛje lé kya̰ dee ləm, n’a kya̰ dee ji njéba̰je’g lə dee ləm tɔ, ndá d’a tel to nébanrɔ gə nékwa lə njéba̰je lə deḛ lai ya. 15 Mbata deḛ ra né gə́ majel kəm neḛ’g ləm, d’ar oŋg ḭ sə neḛ un kudee mee ndəa gə́ bɔ deeje-je d’unda ne loo mee ɓee gə́ Ejiptə teḛ lé ya saar teḛ mee ndəa gən ləm tɔ.
16 Tɔɓəi Manasə ɔm məs dəwje bula gə́ ta wa dɔ dee el lé naŋg saar ar məs taa loo mee Jerusalem’g pəl-pəl, lal tura ne goo kaiyaje gə́ yeḛ ɔs Judaje ar dee ra ne né gə́ majel kəm Njesigənea̰’g lé tɔ.
17 Ges néraje lə Manasə ləm, gə néje lai gə́ yeḛ ra ləma, gə kaiyaje gə́ yeḛ ya̰ rəa yag keneŋ ləm tɔ lé yee neelé deḛ ndaŋg taree mee Maktub-sorta néraje’g lə mbaije gə́ Juda ya. 18 Manasə wəi ndá deḛ dubee mee gadloo ma̰a kagje gə́ to mbɔr kəi’g ləa gə́ to gadloo ma̰a kagje’g lə Uja. Ndá ŋgonee Amo̰ ɓa o̰ ɓee toree’g tɔ.
Amo̰ to mbai gə́ Juda
2SgI 33.21-2519 Ləb Amo̰ as rɔ-joo-giree-joo ɓa yeḛ tel to mbai ɓəi ndá yeḛ si Jerusalem o̰ ne ɓee as ləb joo. Kea̰je ria lə Mesulemet, ŋgolə Harus gə́ to dəw gə́ Jotba. 20 Yeḛ ra né gə́ majel kəm Njesigənea̰’g to gə́ bɔbeeje Manasə ra lé tɔ. 21 Yeḛ un dɔ gɔl bɔbeeje lad-lad dɔ néje gə́ yeḛ ra ləm, yeḛ pole magəje to gə́ bɔbeeje pole ləma, yeḛ ɔs kəjee naŋg no̰ dee’g ləm tɔ. 22 Yeḛ uba Njesigənea̰, Ala lə bɔbeeje-je lé yá̰ ləm, yeḛ njaa goo rəwje’g lə Njesigənea̰ el ləm tɔ.
23 Kuraje lə Amo̰ d’o̰ njuma̰ dəa’g ndá deḛ tɔlee mee kəi’g ləa ya. 24 Nɛ koso-dəwje gə́ mee ɓee’g tɔl deḛ lai gə́ d’o̰ njuma̰ mbai Amo̰ lé, ndá koso-dəwje gə́ mee ɓee’g lé tel d’unda ŋgonee Jojias ɓa gə́ mbai toree’g tɔ.
25 Ges sorta néraje lə Amo̰ gə néje gə́ yeḛ ra lé ndaŋg taree mee Maktub-sorta néraje’g lə mbaije gə́ Juda. 26 Deḛ dubee mee gadloo ma̰a kagje’g lə Uja. Ndá ŋgonee gə́ Jojias ɓa o̰ ɓee toree’g ya tɔ.
© Ngambai Bible © Alliance Biblique du Tchad 1989, 2015.
