D’unda Dabid gə́ mbai gə́ Juda mee ɓee gə́ Ebro̰’g
1 Gée’g gogo, Dabid dəji Njesigənea̰ pana: See m’a kaw mee ɓee gə́ kára mbuna ɓee-booje gə́ Juda wa.
Njesigənea̰ ilá keneŋ pana: Aw!
Dabid tel dəjee pana: See ɓee gə́ ra ɓa m’a kaw keneŋ wa.
Ndá Njesigənea̰ tel ilá keneŋ pana: Aw Ebro̰.
2 Dabid ḭ aw keneŋ gə denéje ləa gə́ joo gə́ ri dee lə Ahinoam, dəw gə́ Jisreel ləm, gə Abigayil, dəw gə́ Karmel gə́ kédé to dené lə Nabal lé ləm tɔ. 3 Dabid ar njérɔje ləa gə́ d’isi səa lé d’aw səa tɔ, nana kara gə njémeekəije ləa-ləa ndá deḛ d’isi mee ɓee-boo gə́ Ebro̰ lé. 4 Koso-dəwje gə́ Juda ree d’wa dɔ Dabid gə ubu mba kundá gə́ mbai lə Judaje.
Deḛ d’ula Dabid pana: Dəwje gə́ Jabɛs gə́ Galaad ɓa d’ubu Sawul . 5 Ndá Dabid ula njékaḭkulaje rɔ koso-dəwje gə́ Jabɛs gə́ Galaad mba kar dee d’ula dee pana: Maji kar dɔkaisəgərə lə Njesigənea̰ nai sə sí mbata seḭ raje meemaji gə Sawul gə́ to mbai lə sí dubeeje ne. 6 Bèe ndá ɓasinè maji kar Njesigənea̰ ra sə sí meemaji gə goo meenda londoŋ ləa. Ma kara m’a ra sə sí maji to gə́ seḭ raje lé ya tɔ. 7 Maji kar ji sí ɓar mèr-mèr ləm, kar sí toje bao-rɔje ləm tɔ. Mbata mbai lə sí Sawul wəi ndá ma ɓa Judaje d’wa dɔm gə ubu mba k’undam gə́ mbai lə dee tɔ.
8 Lée togə́bè kara Abner, ŋgolə Ner gə́ to ɓé-njérɔje lə Sawul lé un Is-Boset, ŋgolə Sawul aree dəs aw Mahanayim. 9 Yeḛ undá gə́ mbai lə Galaadje ləm, gə Gesurje ləm, gə Jisreelje ləm, gə Eprayimje ləm, gə Bḛjamije ləma, gə dɔ Israɛlje’g lai ləm tɔ. 10 Is-Boset, ŋgolə Sawul lé ləbee aḭ rɔ-sɔ ɓa yeḛ tel to ne mbai gə́ Israɛl ndá yeḛ o̰ ɓee ləb joo. Judaje ya ɓa nai gə Dabid. 11 Ndɔje gə́ Dabid o̰ ne ɓee dɔ Judaje’g mee ɓee gə́ Ebro̰ lé to ləb siri gə naḭ misa̰.
12 Abner, ŋgolə Ner gə njérɔje lə Is-Boset, ŋgolə Sawul d’ḭ Mahanayim d’ɔr rɔ d’aw Gabao̰. 13 Joab, ŋgolə Seruja gə njérɔje lə Dabid kara d’ɔr rɔ d’aw tɔ. Deḛ d’iŋga na̰ godə-ma̰ gə́ Gabao̰, deḛ gə́ kudu kára d’aar kel godə-ma̰ gə́ nee ləm, njé gə́ raŋg d’aar kelee gə́ nu ləm tɔ. 14 Abner ula Joab pana: Maji kar basaje nee d’ḭ tar rɔ no̰ sí’g!
Joab ilá keneŋ pana: Maji kar dee d’ḭ tar ya!
15 Deḛ d’ḭ tar d’aw gə́ rɔ na̰’d ar bula lə dee as na̰-na̰, dɔg-gir-dee-joo mbata Bḛjamije gə́ wɔji dɔ Is-Boset, ŋgolə Sawul ləm, gə dɔg-gir-dee-joo gə́ to kuraje lə Dabid ləm tɔ. 16 Nana kara wa dɔ njeba̰ ləa ula kiambas ləa kaaree’g ndá deḛ d’oso d’wəi na̰’d. Bèe ɓa d’unda ne ri loo gə́ to mbɔr Gabao̰’g dəb lé lə Helkat-Hasurim (loo-kɔr-mbalje).
17 Rɔ lé nuŋga kəd-kəd mee ndəa’g neelé ar njé’g lə Dabid dum ne dɔ Abner gə Israɛlje. 18 Lée neelé ŋgalə Seruja gə́ munda, Joab, gə Abisai, gə Ajael d’aar keneŋ. Ajael lé gɔlee wɔilɔ pélé-pélé to gə́ ndooi gə́ mee wala’g bèe. 19 Yeḛ tuba Abner ndá ya̰ gée aree tel dɔkɔl əsé dɔgel el. 20 Abner kel gée ndá yeḛ pana: See to i Ajael wa.
Yeḛ ilá keneŋ pana: To ma ya.
21 Abner ulá pana: Aw gə́ dɔkɔl əsé dɔgel. Wa dəw kára mbuna basaje’g neelé taa néje ləa.
Nɛ Ajael ndigi tel kya̰ gée el. 22 Abner ulá tɔɓəi pana: Ya̰ goom. See ban ɓa i ra kam m’tɔli m’ilai kɔrɔ wa. See m’tɔli ndá m’a kɔr dɔm gə́ tar no̰ ŋgokɔḭ Joab’g ya wa.
23 Nɛ Ajael ndigi kya̰ gée el. Gelee gə́ nee ɓa Abner ɔs mée gə niŋga-ndəi ləa ndá ar niŋga-ndəi lé teḛ giree’g aree oso naŋg wəi gə́ léegəneeya. Deḛ lai gə́ ree loo gə́ Ajael oso keneŋ wəi lé d’aar naŋg keneŋ.
24 Joab gə Abisai kara tuba Abner tɔ ndá loo gə́ deḛ teḛ dɔdərloo gə́ Ama gə́ wɔji dɔ Giah rəw gə́ dɔdilaloo gə́ Gabao̰ lé ndá kàr andə tɔ. 25 Bḛjamije mbo̰ na̰ goo Abner’g asəna gə dəw gə́ kára bèe ndá d’aar naŋg dɔdərloo’g. 26 Abner ɓar Joab dəjee pana: See kiambas a tuji loo ya saar-saar wa. Loo gə́ rudee un ɗiao lé meekad ɓa a nai. See i gər el wa. See ndɔ gə́ ra ɓa i a kula njérɔje kar dee d’əw rɔ dee korə ŋgako̰ deeje wa.
27 Joab tel ilá keneŋ pana: Ala to Njesikəmba ya! Ɓó lé i pata el ndá njérɔje d’a kəw rɔ dee korə ŋgako̰ deeje el saar bèlè gə́ ndɔ.
28 Yen ŋga Joab im to̰to̰ ndá njérɔje lai d’əw rɔ dee korə Israɛlje ləm, d’unda ŋgaŋ rɔ lé ləm tɔ. 29 Abner gə njérɔje ləa lai d’ḭ loondul’g d’aw ndag-mbo’g. Deḛ gaŋg baa gə́ Jurdɛ̰ ndá d’unda Bitro̰ dana gaŋg tel ree Mahanayim. 30 Joab ḭ loo korə Abner’g tel ndá yeḛ mbo̰ njérɔje lai nɛ njérɔje lə Dabid godo dɔg-gir-dee-jinaikara ləm, Ajael godo ləm tɔ. 31 Nɛ njérɔje lə Dabid tɔl njérɔje tɔl-munda gə dɔ dee rɔ-misa̰ (3.600) mbuna Bḛjamije’g gə njé gə́ lə Abner tɔ. 32 Deḛ d’un nin Ajael d’aw dubee dɔɓar bɔbeeje’g mee ɓee gə́ Betlehem. Joab gə njérɔje ləa d’aw loondul’g saar loo àr dɔ dee’g ndá deḛ teḛ Ebro̰ tɔ.
© Ngambai Bible © Alliance Biblique du Tchad 1989, 2015.
