Seba ɔs Dabid rəw
1 Lée neelé dəw gə́ njemeeyèr kára si keneŋ ria lə Seba, ŋgolə Bikri, dəw gə́ Bḛjami. Yeḛ lé im to̰to̰ ndá yeḛ pana:
Jeḛ lé né lə sí kára kara to rɔ Dabid’g el ləm,
Nédɔji lə sí to rɔ ŋgolə Isai’g el ləm tɔ!
Seḭ Israɛlje lé maji kar nana kara tel aw kəi-kubu’g ləa-ləa ya .
2 Yen ŋga koso-dəwje gə́ Israɛl lai d’ɔr rɔ dee rɔ Dabid’g ndá d’ɔm na̰ goo Seba, ŋgolə Bikri’g lé. Nɛ koso-dəwje gə́ Juda reḛ́ goo mbai’g lə dee’g rḛ́-rḛ́ ləm, deḛ d’ḭ səa baa gə́ Jurdɛ̰ danee saar teḛ səa Jerusalem ləm tɔ.
3 Dabid aw mee kəi’g ləa gə́ Jerusalem. Ndá mbai ɔr gamla-denéje gə́ dɔg gə́ yeḛ ya̰ dee mba kar dee ŋgəm kəi lé ndá yeḛ udu dee mee kəi-ŋgəm dee’g, yeḛ ar dee néje gə́ d’aw ndée ya nɛ yeḛ aw rɔ dee’g el ŋga. Togə́bè ɓa deḛ d’isi ne asəna gə njékəisiŋgaje bèe mee kəi-ŋgəm dee’g saar ndɔ kwəi’g lə dee tɔ .
Joab tɔl Amasa
4 Mbai lé ula Amasa pana: Maji kari ɓar njérɔje gə́ Juda ar dee mbo̰ dɔ na̰ rɔm’g mee ndɔ gə́ munda gə́ nee ya, tɔɓəi i ya kara a kaar keneŋ nee ya tɔ.
5 Amasa aw mba ɓar njérɔje gə́ Juda lé, nɛ yeḛ tila gə́ tila ar ndəa gə́ mbai wɔji aree lé dəs. 6 Bèe ɓa Dabid ula Abisai pana: Seba, ŋgolə Bikri lé ɓasinè a gə ra sə sí majel unda ka̰ Absalɔm ya ɓəi. Ndá i ya maji kari ɔr kuraje lə ɓéije ndá korə ne gée nà banelə a kaw mee ɓee-booje gə́ ndògo-bɔrɔ gugu dɔ dee’g mba kiya rəa keneŋ kəm sí’g.
7 Abisai aw ndá yeḛ ar njérɔje lə Joab ləm, gə Keretje ləm, gə Peletje ləma, gə bao-rɔje lai ləm tɔ lé d’aw səa na̰’d, deḛ d’unda loo mee ɓee-boo gə́ Jerusalem teḛ d’aw mba korə Seba, ŋgolə Bikri lé. 8 Loo gə́ deḛ ree mbɔr mbal’d gə́ boi gə́ to Gabao̰ ndá Amasa ree iŋga dee. Joab tɔ kiambas gel kubuje’g ləa gə́ yeḛ ula rəa’g lé, yeḛ tɔ kiambas gə́ mee sɔlee’g rḛgee’g nɛ loo gə́ Joab si aw ndá kiambas lé ɔr oso naŋg. 9 Joab dəji Amasa pana: Ŋgokɔm, see aw gə́ majee ya wa. Ndá yeḛ wa mbaita Amasa gə jikɔlee gə mba kil ɓɔlee.
10 Amasa unda kəmkàr dɔ rəa’d gə mbata kiambas gə́ to ji Joab’g lé el, ndá Joab ɔs ne mée mbudu ɔm ŋgan siḭyee naŋg lal kɔsee jia joo ndá Amasa wəi tɔ.
Joab, deḛ gə ŋgokea̰ Abisai d’aw korə Seba, ŋgolə Bikri lé. 11 Dəw kára mbuna njérɔje’g lə Joab gə́ nai mbɔr Amasa’g dəb lé pana: See na̰ ɓa ndigi Joab wa. See na̰ ɓa to ka̰ Dabid wa. Maji karee aw goo Joab’g!
12 Amasa lé rogo məsee’g dan rəw’g, tɔɓəi dəw neelé oo to gə́ njérɔje lai rəm d’aar naŋg keneŋ d’ée ndá yeḛ ɔs nin Amasa dan rəw’g ilá mee ndɔ’g ila kubu gə́ boi yul dəa’g mbata yeḛ oo to gə́ deḛ lai gə́ ree d’ée lé ndá d’aar naŋg-naŋg. 13 Loo gə́ ninee godo rəbə ndá njérɔje lai d’aw goo Joab’g gə mba korə Seba, ŋgolə Bikri lé.
14 Joab ta̰ dan ginkoji Israɛlje lai aw saar teḛ Abel-Bet-Maaka ndá bao-rɔje lai d’aw gée’g. 15 Deḛ d’aḭ dɔ Seba mee ɓee-boo gə́ Abel-Bet-Maaka sub gə rɔ ndá d’uba dɔndal d’aree ndəw asəna gə dɔ ndògo-bɔrɔ ɓa deḛ rɔ ne ɓee-boo neelé. Njérɔje lai gə́ d’aw gə Joab lé d’ɔs ndògo-bɔrɔ d’aree təd oso.
16 Yen ŋga dené kára gə́ njekəmkàr un kudu tur kii pénéné-pénéné mee ɓee-boo’g pana: Ooje boo, ooje boo! M’ra ndòo rɔ sí’g mba kar sí ulaje Joab pajena: Maji karee ree pər gə́ nee mbata ma m’ndigi kulá ta.
17 Joab ree pər gə́ rəa’g ndá dené lé dəjee pana: See i ya to Joab lé wa.
Yeḛ ilá keneŋ pana: To ma ya.
Ndá yeḛ ulá pana: Maji kari oo ta lə kura ləi gə́ dené ya kari!
Yeḛ tel ilá keneŋ pana: M’oo ya.
18 Ndá yeḛ pana: Kédé gə goo néjiɓee lé deḛ pana: Maji dəji njé gə́ Abel ta k’oo ɓa! Ndá yee ɓa ar ta godo ne ya tɔ. 19 Ɓee-boo lə sí lé dəwje d’isi lɔm keneŋ ləm, deḛ gə́ to majikojije mbuna Israɛlje’g d’isi keneŋ ləm tɔ. Nɛ i saŋg loo mba tuji ɓee-boo gə́ to ko̰ Israɛlje! See gelee ban ɓa i ndigi tuji né ka̰ lé Njesigənea̰ wa.
20 Joab tel ilá keneŋ pana: Wah, takə̰ji tuji ɓee-boo karee godo lé ma m’ə̰ji bèe el. 21 Taree to togə́bè el. Nɛ dəw kára gə́ dɔ mbal gə́ Eprayim ria lə Seba, ŋgolə Bikri un jia gə́ tar mba tuji ne mbai lé, oreeje yeḛ ya gə́ karee ba ameeje ndá m’a kɔr rɔm kya̰ ɓee-boo lə sí.
Dené lé ula Joab pana: D’a kila dəa dɔ ndògo-bɔrɔ’g kari.
22 Bèe ɓa dené lé aw rɔ koso-dəwje’g lai gə kəmkàr ləa ndá deḛ gaŋg dɔ Seba, ŋgolə Bikri lé d’ila d’ar Joab. Joab im to̰to̰ ndá njérɔje sanéna̰ d’ya̰ ɓee-boo lé ndá, nana kara aw mee kəi-kubu’g ləa-ləa. Joab kara tel aw Jerusalem rɔ mbai’g lé tɔ.
Njékulaje lə Dabid gə́ boo-boo lé
23 Joab to ɓé-njérɔje lə Israɛlje lai, Benaja, ŋgolə Jeojoda to ɓée Keretje gə Peletje, 24 Adoram to njekɔrno̰ njékula taa nékoga-dɔ-rɔje, Josapat, ŋgolə Ahilud to njeŋgəm maktub ka̰ ko̰ɓee, 25 Seja to njendaji-maktub, Sadɔk gə Abiatar to njékinjanéməsje, 26 Ira, dəw gə́ Jayir to njekinjanéməs lə Dabid tɔ.
© Ngambai Bible © Alliance Biblique du Tchad 1989, 2015.
