Baana gə Rekab tɔl Is-Boset
1 Loo gə́ ŋgolə Sawul oo to gə́ Abner wəi Ebro̰ ndá jia unda ndolè ləm, Israɛlje lai kara ɓəl unda dee badə gaŋg dee ləm tɔ.
2 Mbai dɔ kudu-njérɔje lə ŋgolə Sawul lé deḛ joo, yeḛ gə́ kára ria la Baana ləm, yeḛ gə́ raŋg ria lə Rekab ləm tɔ. Deḛ to ŋgalə Rimo̰, dəw gə́ Beerot, deḛ to gə́ ginkoji’g lə Bḛjamije. Mbata Beerot lé kara d’ée gə́ ɓee gə́ to ka̰ Bḛjamije 3 ar njé gə́ Beerot d’aḭ d’aw Gitayim d’aw d’isi keneŋ saar teḛ mee ndəaje gən ya. 4 Jonatan, ŋgolə Sawul lé ŋgonee gə́ diŋgam si keneŋ nɛ gɔleeje unda ndolè. Yeḛ lé ləbee as mi ba loo gə́ d’ḭ Jisreel ree gə sorta kwəi lə Sawul gə Jonatan, ndá njeŋgəmee lé unee aḭ səa tɔɓəi loo gə́ aḭ səa gə tɔgee ndá yeḛ tel oso ar ŋgon lé gɔleeje mbɔi. Ŋgon neelé ria lə Mepiboset .
5 Bèe ɓa ndɔ kára bèe loo gə́ kàr nuŋga kəd-kəd ndá ŋgalə Rimo̰ gə́ Beerot gə́ ri dee lə Rekab gə Baana lé ree kəi lə Is-Boset loo gə́ yeḛ wa rəa keneŋ mbata kàr aar daŋdɔ. 6 Deḛ d’andə d’aw saar mee kəi’g to gə́ lə né gə́ d’aw gə mba taa kandə kó bèe ndá deḛ d’ɔsee mée’g ɓa tɔlee, Ndá Rekab gə ŋgokea̰ Baana d’aḭ d’aw. 7 Loo gə́ deḛ d’andə mee kəi’g lé yeḛ to dɔ tira’g ləa to wa rəa kəi-tée’g bèe ya ndá deḛ kundá tɔlee tɔɓəi deḛ gaŋg dəa. Deḛ d’un dəa lé dəs ne gə rəw gə́ ndag-loo’g d’aw ne loondul’g saar loo àr dee tar. 8 Deḛ d’aw gə dɔ Is-Boset lé Ebro̰ rɔ Dabid’g ndá d’ula mbai lé pana: Aa oo, dɔ Is-Boset, ŋgolə Sawul gə́ to njeba̰ ləi gə́ ndigi kari udu lé ɓa nee. Ɓogənè Njesigənea̰ dal ba̰ lə mbai ləm dɔ Sawul’g gə dɔ ŋgakeaje’g tɔ.
9 Dabid tel ila Rekab gə ŋgokea̰ Baana, deḛ gə́ to ŋgalə Rimo̰ gə́ Beerot lé keneŋ pana: Njesigənea̰ gə́ to njekɔrm dan néyooje’g lai lé to Njesikəmba ya! 10 Yeḛ gə́ ree rɔm’g kédé pana: Aa oo, Sawul wəi lé yeḛ ə̰ji ta mée’g pana: Neḛ n’ree gə ta gə́ maji mba kulam nɛ m’ar dee d’wá tɔlee ɓee gə́ Siklag mba kar né neelé to nékoga-dɔ-ji ta gə́ teḛ təa’g . 11 Bèe ndá loo gə́ njémeeyèrje tɔl njemeekarabasur dan mee kəi’g ləa dɔ tira-tée’g lé ŋga ɓəd ɓəi ɓa see m’a tel dəji məsee ji sí’g gə mba tuji sí ne dɔ naŋg nee el wa.
12 Togə́bè ɓa Dabid un ndia ar njé’g ləa mba kar dee tɔl dee. Deḛ goré ji dee gə gɔl dee ndá na dee mbɔr kəm-rəw-mán gə́ Ebro̰. Gée gə́ gogo d’un dɔ Is-Boset d’aw ne d’aw dubu dɔɓar Abner’g mee ɓee gə́ Ebro̰ tɔ.
© Ngambai Bible © Alliance Biblique du Tchad 1989, 2015.
