1 Pool aa kəm njégaŋ-rəwtaje lə Jibje lé njal ɔr ndá yeḛ ula dee pana: Ŋgakɔmje gə́ dəwje, saar ɓogənè m’aw no̰ Ala’g gə meekwəitar el ya ɓəi.
2 Ananias, ŋgɔ-njekinjanéməs lé un ndia ar deḛ gə́ d’isi mbɔree’g dəb lé gə mba kar dee d’unda təa. 3 Yen ŋga Pool ulá pana: Ala a kundai-i, i gə́ to ndògo gə́ ndá lé. I si keneŋ gə mba ra ta ləm gə goo godndu, nɛ i orè ta godndu lé naŋg més ɓa un ndui ar dee gə mba kar dee d’undam .
4 Deḛ gə́ d’isi mbɔr Pool’g dəb lé d’ilá keneŋ pana: Yeḛ gə́ to gə́ ŋgɔ-njekinjanéməs lə Ala ya, see i ila ndɔl dəa’g wa.
5 Pool tel pana: Ŋgakɔmje, ma m’gəree gə́ ŋgɔ-njekinjanéməs el mbata deḛ ndaŋg mee maktub’g pana: Seḭ a paje ta gə́ majel dɔ mbai lə koso-dəwje’g lə sí el .
6 Pool gər gao to gə́ deḛ gə́ mbo̰ dɔ na̰ lé njé gə́ na̰je to gə́ Saduseḛje ləm, njé gə́ na̰je to gə́ Parisiḛje ləm tɔ ndá yeḛ ila boo-ndia naŋg no̰ njégaŋ-rəwtaje’g lə Jibje pana: Ŋgakɔmje gə́ dəwje, ma m’to gə́ Parisiḛ, ŋgolə Parisiḛje ya. Ta teḛ dɔkumbwa’g lə njé gə́ d’wəi’g gə́ m’unda məəm yel gə́ dɔ’g lé yee ɓa d’am m’aar ne loo-gaŋg-rəwta’g ɓasinè gə mbəa ya .
7 Loo gə́ yeḛ pata neelé mba̰ ndá Saduseḛje gə Parisiḛje d’un kudu maḭ na̰ ta d’ɔr ne kəm na̰. 8 Mbata Saduseḛje pana: Dəwje d’a teḛ dɔkumbwa’g pai godo ləm, kuraje gə́ dara əsé ndilje kara godo ləm tɔ. Nɛ Parisiḛje d’ɔm meḛ dee dɔ taje’g neelé joo bɔr . 9 Yen ŋga d’unda bula yi-yi d’ar njéndaji-maktubje gə́ na̰je gə́ d’ḭ ɓee lə Parisiḛje d’uba naŋg d’ḭ d’ɔs gin tamaḭ gə́ kédé-kédé pana: Dəw neelé jeḛ j’oo ta gə́ majel kára kara dəa’g bèe el. Banelə ndil əsé kura gə́ dara ɓa ulá ta ya.
10 To gə́ tamaḭ lə dee oso mbo-boo bèe ŋga ɓé-njérɔje lé ɓəl pana: Dəwje neelé d’a kḭ kwa Pool tiee mbidi-mbidi ndá yeḛ un ndia ar njérɔje ree d’ɔree dan dee’g gə mba kaw səa gadloo’g lə dee.
11 Mee tilee gə́ njekorè gée lé Mbaidɔmbaije teḛ dɔ Pool’g təsərə ulá pana: Wa rɔi kɔgərɔ! Mbata goo ta ləm gə́ i ɔr Jerusalem neelé lé riri kara i a kɔr Rɔm togə́bè ya tɔ.
D’wɔji-kwɔji tɔl Pool
12 Loo gə́ loo àr ndá Jibje tɔs dɔ na̰ dér-dér manrɔ dee bər-bər pana: N’a sɔje né el ləm, n’a kaije né el ləm tɔ saar n’a tɔlje Pool ya ɓa. 13 Deḛ gə́ tɔs dɔ na̰ dér-dér lé bula dum rɔ-sɔ. 14 Ndá deḛ d’aw rɔ mbai dɔ njékinjanéməsje’g gə ŋgatɔgje’g d’ula dee pana: Jeḛ manrɔ sí bər-bər gə mba sɔ né el saar j’a tɔl Pool ya ɓa. 15 Seḭje lé ɓasinè maji kar sí aw iŋgaje njégaŋ-rəwtaje lə Jibje awje sə dee rɔ ɓé-njérɔje’g gə mba karee ree gə Pool no̰ sí’g ɓó gə́ kar sí raje to gə́ lə né gə́ seḭ ndigije kəndje gel ta gə mba koo gəd bèe səm. Jeḛ lé loo gə́ sí ree ndá j’a sí pèrèrè gə mba kḭ tɔlee gə́ tɔl ya.
16 Nɛ ŋgonan Pool oo ta kum gə́ d’a gə kumee rəw lé ndá yeḛ ɔd aw gadloo’g lə njérɔje aw ula Pool taree. 17 Yen ŋga Pool ɓar njekɔrno̰ njérɔje gə́ tɔl-tɔl lé kára ulá pana: Aw gə basa neelé rɔ ɓé-njérɔje’g mbata yeḛ aw gə ta gə mba kulá.
18 Njékɔrno̰ njérɔje gə́ tɔl-tɔl neelé ɔd gə basa neelé ɔr nea̰ aw səa rɔ ɓé-njérɔje’g ulá pana: Pool gə́ daŋgai lé ɓarm ra ndòo rɔm’g gə mba karm m’ree gə basa neelé rɔi’g mbata yeḛ aw gə ta gə mba kulai.
19 Ɓé-njérɔje lé wa ji basa neelé njɔl sa səa rəa aw dəjee pana: See né ɗi ɓa a gə kulam taree wa.
20 Yeḛ ilá keneŋ pana: Jibje d’ɔm kudu na̰’d gə mba ra ndòo rɔi’g ɓó gə kar bèlè ndá i a ree gə Pool no̰ njégaŋ-rəwtaje’g lə Jibje to gə́ lə né gə́ i a gə dəjee gin ta ləa gəd koo bèe səm. 21 Maji kari taa ta lə dee el mbata deḛ bula dum rɔ-sɔ tɔs dɔ na̰ der-der gə mba kumee rəw, deḛ manrɔ dee bər-bər pana: N’a sɔje né el ləm, n’a kaije né el ləm tɔ saar n’a tɔlje darɔ Pool ya ndəd ɓa. Ɓasinè ya deḛ d’isi pèrèrè ŋgina kari ndigi sə dee ya.
22 Ɓad ɓa kar ɓé-njérɔje ar basa lé ɔd aw ɓəi ndá yeḛ ndəjee bər-bər mba karee ula dəw kára kara ta neelé el.
D’ula Pool rɔ Pelis gə́ njeguburuɓee lé
23 Gée gə́ gogo yeḛ ɓar njékɔrno̰ njérɔje gə́ tɔl-tɔl joo lé ula dee pana: Waje dɔ gɔl rɔ sí mbata loo gə́ loondul gə́ d’a gə kɔm ɓi yəm ndá a kawje gə njérɔje tɔl-joo ləm, gə njékundaje rɔ-siri ləma, gə njéɓandaŋje tɔl-joo ləm tɔ, mba kaw sə dee Sejare. 24 Maji kar dee d’ar Pool kundaje kea̰-yeḛ tɔ ɓó gə mba kar dee d’aw ne səa gə loo-kulee yururu teḛ ne səa rɔ Pelis gə́ njeguburuɓee’g lé.
25 Yeḛ ndaŋg maktub togə́bè ar Pelis pana:
26 Ma Klodə Lisias m’ndaŋg maktub nee m’ari-i Pelis, njeguburuɓee gə́ maji dum, m’rai lapia ɓoo. 27 Dəw neelé Jibje d’wá gə dɔ dee nja d’a gə tɔlee gə dɔrɔ dee ɓa m’teḛ dɔ dee’g wai gə njérɔje ndá m’wá wɔgədɔ m’ɔree ji dee’g, nɛ ma m’oo to gə́ yeḛ to gə́ njeɓee gə́ Rɔm. 28 Ma m’ndigi gər gin né gə́ deḛ səgee ne ɓa m’aw səa no̰ njégaŋ-rəwtaje’g lə Jibje lə dee. 29 Ma m’oo to gə́ tamaḭ gə́ wɔji dɔ godndu lə dee-deḛ ɓa deḛ səgee ne nɛ m’oo to gə́ yeḛ ra gə́ as yée əsé kwa daŋgai el. 30 Ma m’oo to gə́ Jibje d’wɔji mba kumee rəw, yee ɓa m’ulá ne rɔi’g ləm, m’ula njésəgeeje gə mba kar dee d’aw nɔḭ’g mba kar dee-deḛ nja d’ɔr taree d’ari oo ləm tɔ. Lapia.
31 Togə́bè njérɔje d’aw gə Pool lé loondul’g gə goo torndu ɓée deeje d’aw səa saar teḛ səa Antipatris. 32 Bèlè lookàree d’ar njékundaje ɓa dan gée d’aw səa ŋga ɓa deḛ d’ɔs tel ree gadloo’g lə dee gogo. 33 Loo gə́ deḛ teḛ Sejare mba̰ ndá njékundaje lé d’ula maktub ji njeguburuɓee’g tɔɓəi d’unda Pool nea̰’g tɔ. 34 Loo gə́ mbai gə́ njeguburuɓee lé tura maktub lé mba̰ ndá yeḛ dəji dee pana: See Pool lé to dəw gə́ dɔ naŋg gə́ ra wa. 35 Loo gə́ yeḛ gər to gə́ yeḛ to gə́ dəb ɓeeko̰ gə́ Silisi ndá yeḛ ulá pana: M’a ŋgina njésəgije njen ree ɓa m’a koo ta ləi ɓəi.
Yeḛ un ndia ar dee gə mba kar dee ŋgəmee kəi-gad’g lə Herɔdə.
© Ngambai Bible © Alliance Biblique du Tchad 1989, 2015.
