Pool aar no̰ Pelis gə́ njeguburuɓee lé
1 Ndɔ mi gogo lé ŋgɔ-njekinjanéməs gə́ ria lə Ananias, deḛ gə ŋgatɔgje lə dee gə́ na̰je gə njetagərii kára ria lə Tertul lé deḛ teḛ Sesare. Deḛ səg Pool rɔ njeguburuɓee’g. 2 Deḛ d’ula-kula ɓar Pool d’aree ree mba̰ ndá Tertul un kudu kɔr ta gə mba kila dɔ Pool’g, yeḛ pana: 3 Pelis, i gə́ maji dum lé i nja ar loo kul dɔ sí’g yururu, ar sí jeḛ ndá ne meḛ sí kaḭ tɔ. I nja to gə́ njegɔl ɓeeko̰ lə dəwje neelé karee sa rəw mbata i aa dɔ dee kər-kər ya. Néraije lai gə́ i ra lé loo lai gə ndɔ dee ndɔ dee, deḛ d’ɔs ne rii ta dee’g gə pa tébé-tébé bèe. 4 Jeḛ ndigi bəi naŋg el, nɛ ta lə sí to keneŋ ɓa jeḛ ndigi kɔr bəl kari-i gə́ njemeemaji lé ndá maji kari ila məəi po̰ ɓó gə oo ne ta lə sí ya. 5 Jeḛ j’iŋga dəw neelé gə́ to asəna gə yoo-ndag gə́ oso ɓee’g ləm, yeḛ pələ meḛ Jibje ar dee tḭ ne na̰ gə loo lai-lai ləma, yeḛ to mbai dɔ kudu dəwje gə́ to NajareḛjeNajareḛje lé wɔji dɔ dəwje gə́ d’ḭ Najaret ləm tɔ. 6 Yeḛ naa loo saar gə mba kaw kula sul dɔ kəi-Ala’g lə sí, nɛ jeḛ j’ubá keneŋ j’wá. Jeḛ ndigi gaŋgta dəa’g gə goo godndu lə síjeḛ ya, 7 nɛ Lysias, ɓé-njérɔje lé ɓa teḛ dɔ sí’g wai, wá ji sí’g wɔgədɔ ɔree teḛ səa, 8 ɓa ula njésəgeeje pana: D’a ree gə taree nɔḭ’gTa neelé godo mee maktubje gə́ ləw gə́ na̰je’g.. I nja loo gə́ i a dəjee gə tai ndá a koo ta néje lai gə́ jeḛ n’səgee ne lé ya.
9 Jibje kara d’ɔm ta lə dee keneŋ bura pana: Yeḛ ra togə́bè ya.
Pool ɔr ta ləa no̰ Pelis’g mba taa ne dɔ rəa
10 Loo gə́ njeguburuɓee lé kəb jia ar Pool gə mba karee ɔr ta ləa ndá Pool ilá keneŋ pana:
Ma m’gər gao, as ləb bula i to gə́ njegaŋ-rəwta lə ginkoji dəwje neelé, yee ɓa m’aar ne nɔḭ’g gə meekai sam-sam gə mba kɔr ta taa ne dɔ rɔm ya. 11 To tamaḭ el, i a dəji gée koo gəd ya, as ndɔ dɔg-giree-joo gə́ kédé lé ɓa ma m’ḭ m’aw Jerusalem’g gə mba kwa Ala məəm’g ya. 12 Ma lé deḛ d’iŋgam mee kəi-Ala’g əsé mee kəi-kwa-dɔ-na̰je’g əsé gə mee ɓee-boo’g ɓa ma m’aar maḭta gə dəw kára kara keneŋ el ləm, ma mbo̰ boo-dəwje dɔ na̰’d m’sula dee ne el ləm tɔ. 13 D’a təd ta kiŋga ne rəw ta gə́ deḛ səgm ne ɓasinè lé nda̰ bèe el. 14 M’ɔr ta nee m’wɔji ne dɔm-ma ya, m’wa Ala lə bɔmje-je məəm’g gə goo rəw gə́ deḛ ɓa ɓaree rəw gə́ to lée’g el. M’ɔm məəm dɔ taje lai gə́ deḛ ndaŋg mee maktub godndu’g ləm, gə ka̰ njéteggintaje ləm tɔ. 15 M’unda məəm yel dɔ Ala’g lé to gə́ deḛ bèe ya m’oo to gə́ Ala lé a kar njémeekarabasurje ləm, gə njéra nékori-korije ləm tɔ lé d’a teḛ dɔkumbwa’g gə kəm dee kəm dee. 16 Gelee gə́ nee ɓa m’ɔs ne rɔm ɓad gə mba kaar no̰ Ala’g gə no̰ dəwje’g gə meenda kɔr jol-jol.
17 Ma lé m’godo ɓee ləm as ləb bula ɓa m’tel m’ree gə mba kun né kwa ne noji gə njéndooje gə́ mee ɓee’g ləm ləm, gə mba kun né kar Ala ləm tɔ. 18 Yee gə́ bèe ɓa Jibje gə́ na̰je gə́ Asi d’iŋgam ne mee kəi-Ala’g gə rɔm gə́ ɔr ɓə̰dərə-ɓə̰dərə ya, ɓó teḛ yao-yao əsé kaw dɔ na̰’d pum-pum lé to gə́ néram’g lé el . 19 Ɓó lé deḛ gə́ d’iŋgam keneŋ lé d’oo ta dɔm’g ndá to ta lə dee-deḛ ɓa mba kar dee ree səgm ne rɔi’g ya. 20 Esé ɓó lé loo gə́ m’aar no̰ njégaŋ-rəwtaje’g lə Jibje ɓa deḛ d’oo ta né gə́ majel gə́ wa dɔm’g ndá kara maji kar dee tegginee gə́ raga tɔ. 21 Né kára ba gə́ ma m’ra lé to boo-ndum gə́ m’ila naŋg ɓəgəgə dan dee’g m’pana: Ta gə́ wɔji dɔ teḛ dɔkumbwa’g lə dəwje gə́ d’wəi lé nja d’am m’aar ne no̰ sí’g loo-gaŋg-rəwtaje’g ɓogənè gə mbəa .
22 Takɔr gə́ Pool ɔr lé Pelis gər ginee gao ya nɛ yeḛ ar dee rəm d’aw pana: Loo gə́ Lisias, ɓé-njérɔje lé a ree ndá m’a kə̰d ginta lə sí koo ɓəi.
23 Yen ɓa yeḛ un ndia ar njekɔrno̰ njérɔje gə́ tɔl-tɔl lé gə mba karee ŋgəm Pool nɛ kəmee ɓa a kunda gée’g ɓó a kɔg njé’g ləa gə́ d’a gə ree gə mba ra né la ne səa lé el.
Pool aar no̰ Pelis deḛ gə Drusil’g
24 Ndɔ aḭ bula bəl gogo Pelis ree gə dené ləa gə́ ria lə Drusil gə́ to gə́ Jib. Yeḛ ula kula ɓar Pool ndá yeḛ oo ta gə́ Pool pa wɔji ne dɔ meekun gə́ un ar Kristi lé. 25 Nɛ loo gə́ Pool pata wɔji ne dɔ meekarabasur ləm, gə kunda kəmkàr dɔ rɔ’g ləma, gə rəwta-gaŋg gə́ a gə ree ləm tɔ ndá Pelis ɓəl ulá pana: Sa rɔi ɓasinè aw. Loo gə́ m’a kiŋga loo ɓa m’a kula-kula ɓari ɓəi.
26 Yeḛ unda mée yel dɔ Pool’g pana: A tɔs ta neḛ gə lar ɓəi. Togə́bè ɓa yeḛ ula ne kula ɓar ne Pool ta teg-teg gə mba kwɔji ne səa ta.
27 Loo gə́ ləb joo dəs ndá d’ar Porsius Pestus taa tor Pelis. Pelis ya̰ Pool daŋgai’g gə mba karee lel Jibje.
© Ngambai Bible © Alliance Biblique du Tchad 1989, 2015.