Némḭdije gə́ Amɔs oo lé
1 Némḭdi gə́ Mbaidɔmbaije gə́ Njesigənea̰ tɔjim am m’oo ɓa nee: Aa ooje, yeḛ ra beedéje gə́ bula dèm-dèm loo gə́ barkəmko uba gogo sigi lé, to da-kó gə́ uba goo kó gə́ d’inja d’ar mbai kédé lé. 2 Loo gə́ deḛ d’o̰ muje gə́ dɔ naŋg’d nee lai-lai lé ma m’pa pana: Mbaidɔmbaije gə́ Njesigənea̰, m’ra ndòo rɔi’g, ar məəi oso lemsé ɓòo ŋgaka Jakobje d’a si kəmba to gə́ ban wa. Mbata siŋga dee as el. 3 Njesigənea̰ tel gə ndia pana: Né neelé a teḛ el ŋga.
4 Némḭdi gə́ raŋg gə́ Mbaidɔmbaije gə́ Njesigənea̰ tɔjim am m’oo ɓa nee. Aa ooje, Mbaidɔmbaije gə́ Njesigənea̰ ila mber ta lə pər gə́ a kar bo̰ néra dee ɔs ta dee’g lé. Pər neelé roo bwa-wəl mán ləm, gə dɔ naŋg ləm tɔ. 5 Ma m’pa pana: Mbaidɔmbaije gə́ Njesigənea̰ m’ra ndòo rɔi’g, əw rɔi kɔgərɔ ya. See ŋgaka Jakobje d’a si kəmba to gə́ ban wa. Mbata siŋga dee as el. 6 Njesigənea̰ tel gə ndia dɔ néra gə́ togə́bè’g lé. Ndá Njesigənea̰ pana: Né neelé kara a teḛ el ŋga tɔ.
7 Némḭdi gə́ raŋg gə́ yeḛ tɔjim am m’oo ɓa nee: Aa ooje, Mbaidɔmbaije aar tar dɔ ndògo-bɔrɔ’d gə́ d’wɔjee gə kúla ndá né-kwɔji-né to jia’g.Kúla-kwɔji-né 8 Njesigənea̰ dəjim pana: Amɔs, see ɗi ɓa i oo wa. Ma m’ilá’g m’pana: To kúla-kwɔji-né. Mbaidɔmbaije pana: N’a kila kúla-kwɔji-né dan dəwje’g lə neḛ gə́ Israɛl ndá n’a kar mee neḛ oso lemsé dɔ dee’g el ŋga.
9 Dɔ looje lə ŋgaka Isaakje gə́ ndəw lé
D’a tɔs tila ləm,
Kəi gə́ to gə kəmee lə Israɛlje lé kara
D’a tuji pugudu-pugudu ləm tɔ
Ndá n’a kḭ kur dɔ ɓeeko̰’g lə Jeroboam gə kiambas tɔ.
Tuba Amɔs Betel
10 Yen ŋga Amasia, njekinjanéməs gə́ Betel lé ar dee d’ula Jeroboam, mbai gə́ Israɛl lé pana: Amɔs lé ula njuma̰ meḛ gel-bɔje’g lə Israɛl gə goo ŋgəḭ gə mba kɔsi ne rəw. Ɓee neelé askəm taa taje lai neelé el.
11 Mbata aa ooje, ta gə́ Amɔs pa ɓa nee:
Jeroboam lé a kwəi yoo-kiambas ləm,
D’a kwa Israɛlje dɔ naŋg’d lə dee kaw sə dee gə́ ɓər
Dɔ ɓee gə́ raŋg gə́ əw ya ləm tɔ.
12 Tɔɓəi Amasia ula Amɔs pana: I njekoo né gə́ mḭdi lé uba naŋg ḭ aḭ aw ɓee lə Juda. Lée neelé ɓa i a sɔ né keneŋ ləm, i a tegginta keneŋ ya ləm tɔ. 13 Nɛ maji kari tegginta Betel el ŋga mbata to kəi gə́ to gə kəmee lə mbai ləm, to kəi-mbai lə mbai ləm tɔ.
14 Amɔs lé ila Amasia’g pana: Ma lé m’to njetegginta el ləm, m’to ŋgolə njetegginta el ləm tɔ. Nɛ ma m’to njekulbadje ləm, ma m’to njekḭja kandə ɓɔlje ləm tɔ. 15 Njesigənea̰ ɓa unm loo gə́ m’aar goo badə-kosoje’g ndá yeḛ ulam pana: M’aw m’tegginta m’ar koso-dəwje lə neḛ gə́ to Israɛlje lé ya. 16 Ɓasinè, maji kari oo ta lə Njesigənea̰, i Amasia gə́ pa pana: M’tegginta m’ila dɔ Israɛlje’g el ləm, m’pata m’ila dɔ gel-bɔje’g lə Isaak el ləm tɔ lé.
17 Gelee gə́ nee ɓa, aa oo, ta gə́ Njesigənea̰ pa ɓa nee:
Dené ləi a tel to gə́ kaiya-dené mee ɓee’g ləm,
Ŋganije gə́ diŋgam gə njé gə́ dené lé
D’a kwəi yoo-kiambas ləma,
D’a kai ndɔ ləi gə kúla-kwɔji-né
Kar njé gə́ raŋg ləm tɔ.
I ya kara a kwəi dɔ naŋg gə́ mina̰’g
Ndá d’a kwa Israɛlje dɔ naŋg’d lə dee
Kaw sə dee gə́ ɓər
Dɔ ɓee gə́ raŋg’d gə́ əw ya tɔ.
© Ngambai Bible © Alliance Biblique du Tchad 1989, 2015.
