Né gə́ Ala ra mbata lə Israɛlje lé
1 Moyis ɓar Israɛlje lai ula dee pana: Loo gə́ seḭ síje mee ɓee gə́ Ejiptə lé, seḭ ooje néje lai gə́ Njesigənea̰ ra kəm sí’g gə Parao̰ gə kuraje ləa lai gə ɓee ləa lai ləm, 2 seḭ ooje nénaaje gə́ boo gə némɔrije gə nédumkooje gə́ boo ləm tɔ. 3 Nɛ saar ɓogənè ya kara Njesigənea̰ ar sí takə̰ji gə mba gər ne ginee el ya ɓəi ləm, ar kəm sí inja dɔ’g el ya ɓəi ləma, ar mbi sí askəm koo ta lé gəd el ya ɓəi ləm tɔ. 4 Ma lé m’ɔr no̰ sí dɔdilaloo’g as ləb rɔ-sɔ, kubuje lə sí ŋgisi rɔ sí’g el ləm, négɔlje lə sí kara ŋgisi gɔl sí’g el ləm tɔ, 5 seḭ o̰je muru el ləm, gə seḭ aije mán-nduú gə́ mḭ əsé nékai gə́ mḭ el ləm tɔ, gə mba kar sí gərje ne to gə́ ma nja m’to Ala lə sí gə́ Njesigənea̰ ya. 6 Seḭ reeje loo gə́ nee’g ndá, Sihon, mbai gə́ Esbon, gə Og, mbai gə́ Basan, teḛ d’iŋga sí gə mba rɔ sə sí ndá jeḛ n’dumje dɔ dee ya . 7 Jeḛ n’taaje ɓeeje lə dee ndá j’arje ginkoji Rubḛje, gə ginkoji Gadje, gə ges ginkoji Manasə gə́ né ka̰ dee-deḛ tɔ . 8 Maji kar sí aaje dɔ ta manrɔje neelé kər-kər ləm, raje née ləm tɔ ɓa gə mba kar sí teḛje ne kɔr dɔ néje’g lai gə́ seḭ a gə raje lé.
9 Ɓogənè seḭ reeje aarje no̰ Njesigənea̰ Ala’g lə sí, seḭ lai ləm, gə mbai dɔ ginkojije lə sí ləm, gə ŋgatɔgje lə sí ləm, gə dəwje gə́ boo lə sí ləm, gə dəwje gə́ Israɛl lai ləm, 10 gə ŋgan síje ləm, gə denéje lə sí ləma, gə dəw-dɔ-ɓeeje gə́ d’isi mbuna sí’g loo-si sí’g un kudee dɔ yeḛ gə́ njetuga-kagje’g lə sí saar teḛ ne dɔ yeḛ gə́ njeto-mán’g lə sí lé ləm tɔ, 11 gə mba kɔm na̰’d gə manrɔ gə manrɔ lə Njesigənea̰, Ala lə sí, to manrɔ gə́ Ala lə sí gə́ Njesigənea̰ man ne rəa ar sí ɓogənè gə rɔkubu lé 12 gə mba kunda sí ne gə́ koso-dəwje ləa-yeḛ ya ɓogənè ləm, gə mba karee-yeḛ nja to ne Ala lə sí ləm tɔ, to gə́ yeḛ ula sí ne ləm, to gə́ yeḛ man ne rəa gə rɔkubu ar bɔ síje-je Abrakam gə Isaak gə Jakob ləm tɔ. 13 Manrɔ neelé gə́ to manrɔ gə rɔkubu lé m’aree wɔji dɔ sí-seḭ nja gə kar sí ba el. 14 Nɛ m’aree wɔji dɔ deḛ gə́ d’aar mbuna sí’g ɓogənè no̰ Njesigənea̰ Ala’g lə sí ləm, gə dɔ deḛ gə́ godo mbuna sí’g mee ndɔ gə́ ɓogənè ɓəi ləm tɔ.
15 Seḭ gərje loo-si gə́ j’isije ne mee ɓee gə́ Ejiptə lé gao ləm, gə loo gaŋg gə́ jeḛ n’gaŋgje mbuna ginkoji dəwje gə raŋg gə́ seḭ dəs deeje lé gao ləm tɔ. 16 Seḭ ooje néje lə dee gə́ mina̰ lé ləm, gə magəje lə dee gə́ to kag, gə mbal, gə larnda, gə larlɔr, gə́ to mee ɓeeje’g lə dee ləm tɔ. 17 Maji kar dəw kára kara mbuna sí’g, gə́ to diŋgam əsé dené əsé njémeekəije gə́ kára, əsé ginkoji gə́ kára kara ar mée ɔsee ŋgwɔḭ gə Ala lə sí gə́ Njesigənea̰ ɓogənè gə mba kaw pole magəje lə ginkoji dəwje neelé el. Maji kar dəw kára kara mbuna sí’g to asəna gə ŋgira kag gə́ ar kuma̰-yoo gə né gə́ adə to mbuna sí’g el tɔ . 18 Ta manrɔ gə́ pa gə rɔkubu neelé maji kar dəw kára kara oo taree ɓa ti ne rəa mée’g pana: Lé ma m’ndolè goo né gə́ məəm ndigi ləm, ma m’ai ne kido m’aree tɔl kunda ləm tɔ kara m’a si ne lɔm ya lé, maji karee pa bèe el. 19 Njesigənea̰ a ndigi səa mba kar mée oso lemsé dəa’g el. Nɛ oŋg gə kəmkəḭ lə Njesigənea̰ a kḭ səa pu dɔ diŋgam’g neelé kar ndɔlje lai gə́ ndaŋg taree mee maktub’g neelé a nai dəa’g ləm, Njesigənea̰ a tuji ria gin dara’g ləm tɔ. 20 Njesigənea̰ a kɔr kəmee kundá ɓəd mbuna ginkoji Israɛlje’g lai kar némeeko̰ teḛ dəa’g gə goo ta ndɔlje lai gə́ ka̰ manrɔ gə́ ndaŋg taree mee maktub godndu’g lé ya.
21 Ginka dəwje gə́ d’a gə ree gə́ to ŋgan síje gə́ d’a gə koji dee goo sí’g ləm, gə dəw-dɔ-ɓeeje gə́ d’a kḭ dɔ naŋg gə́ əw’g ləm tɔ lé loo gə́ d’a koo dooje gə rɔko̰je ɓəd-ɓəd gə́ Njesigənea̰ a kila dɔ ɓee’g neelé ləm, d’a koo kṵji pər gə́ kas gə kad 22 gə́ a kun dɔ naŋg nee lad kar né gə́ ka̰ dubu əsé kandə kó əsé mu kara uba keneŋ el ləma, kar ɓee neelé to asəna gə Sɔdɔm gə Gɔmɔr, gə Adma gə Seboyim, ɓeeje gə́ Njesigənea̰ tuji dee gə oŋg-boo gə́ o̰ to gə́ pər bèe lé ləm tɔ ndá , 23 ginkoji dəwje gə raŋg lai d’a pana: See gelee ban ɓa Njesigənea̰ ra ne né gə́ togə́bè gə ɓee nee wa. See gelee ban ɓa boo-oŋg gə́ taa pər togə́bè nee teḛ ne wa. 24 Ndá d’a kila dee keneŋ pana: To mbata kuba gə́ d’uba ndu manrɔ lə Njesigənea̰ Ala lə bɔ deeje-je gə́ ar dee d’unda loo mee ɓee gə́ Ejiptə teḛ lé d’ya̰ lé. 25 To mbata deḛ d’aw pole magəje ləm, d’unda barmba no̰ dee’g ləm tɔ, to magəje gə́ deḛ gər dee el ləm, Njesigənea̰ ar dee gə́ néka̰ dee el ləm tɔ. 26 Gelee gə́ nee ɓa boo-oŋg lə Njesigənea̰ gə́ o̰ to gə́ pər bèe lé teḛ ne dɔ ɓee’g neelé ləm, yeḛ ar ndɔlje lai gə́ ndaŋg taree mee maktub’g neelé teḛ ne dəa’g ləm tɔ. 27 Njesigənea̰ ɔr dee mee ɓee’g lə dee gə oŋg gə meekḭ jugugu ləm, gə boo-oŋg lé ləm tɔ ndá yeḛ ɔm dee mee ɓee gə́ raŋg’d to gə́ deḛ d’oo ne ɓogənè bèe lé ya tɔ.
28 Néje gə́ to loo-kiya’g lé to ka̰ Ala lə sí gə́ Njesigənea̰, néje gə́ riba dɔ dee lé to ka̰ síjeḛ gə ka̰ ŋgan síje saar-saar gə no̰ gə mba kar sí n’raje ne néje lai gə́ godndu pa lé ya.
© Ngambai Bible © Alliance Biblique du Tchad 1989, 2015.
