Ndukunje gə tandəji kɔrje
1 Loo gə́ néje lai nee d’a teḛ dɔ sí’g, ndutɔr gə ta ndɔl gə́ ma m’unda no̰ sí’g lé ɓó lé seḭ taa deeje gə meḛ sí mbuna ginkoji dəwje’g lai gə́ Ala lə sí gə́ Njesigənea̰ a gə tuba dee no̰ sí’g ləm, 2 ɓó lé seḭ telje reeje rɔ Njesigənea̰ Ala’g lə sí ləm, ɓó lé seḭ tədje kag torndia dɔɓəŋgərə sí’g gə kankəmrɔ sí bura, seḭ ləm gə ŋgan síje-je gə goo néje lai gə́ ma m’ndaŋg taree m’ar sí ɓogənè ləm tɔ ndá, 3 Ala lə sí gə́ Njesigənea̰ a tel gə njé’g lə sí gə́ d’wa dee gə́ ɓər ləm, a ra sə sí meemaji ləma, yeḛ a tel mbo̰ sí dɔ na̰’d kar sí ḭje mbuna koso-dəwje’g lai gə́ Ala lə sí gə́ Njesigənea̰ sané sí mbuna dee’g lé ləm tɔ. 4 Lé d’a kwa sí kaw sə sí kaw kila sí gwɔi dara’g kara Ala lə sí gə́ Njesigənea̰ a mbo̰ sí dɔ na̰’d kar sí ḭje lé gə́ neelé ləm, lé gə́ neelé ɓa yeḛ a kaw saŋg sí keneŋ ləm tɔ. 5 Ala lə sí gə́ Njesigənea̰ a tel ree sə sí mee ɓee gə́ bɔ síje-je taa gə́ ka̰ dee lé ndá seḭ a taaje gə́ né ka̰ sí, yeḛ a ra sə sí némeemaji ləm, a kar bula lə sí ḭ dɔ maree’g unda ka̰ bɔ síje-je ləm tɔ. 6 Ala lə sí gə́ Njesigənea̰ a kinja tamɔd sí gə́ wɔji dɔ dɔɓəŋgərə sí ləm, gə dɔɓəŋgərə ŋgan meḛ síje ləm tɔ, bèe ɓa seḭ a ndigije ne Ala lə sí gə́ Njesigənea̰ dɔɓəŋgərə sí’g ləm, gə rɔ sí bura ləm tɔ gə mba kar sí síje ne kəmba ya. 7 Ala lə sí gə́ Njesigənea̰ a kar ta ndɔlje lai neelé d’a koso dɔ njéba̰je’g lə sí, deḛ lai gə́ d’ə̰ji sí bəḭ-bəḭ d’ula ne kəm sí ndòo lé. 8 Nɛ seḭ lé a telje reeje rɔ Njesigənea̰’g ləm, seḭ a kilaje koji dɔ torndiaje’g gə godndiaje lai gə́ ma m’un m’ar sí ɓogənè mba kar sí raje née ləm tɔ. 9 Ala lə sí gə́ Njesigənea̰ a daa sí gə némajije gə mba kar sí teḛje ne kɔr dɔ kulaje lai gə́ seḭ raje ləm, gə dɔ ŋgan meḛ síje’g ləm, gə dɔ ŋgan koso-nékulje’g lə sí ləma, gə dɔ kandə néje gə́ mee ndɔje’g lə sí ləm tɔ, mbata rɔ Njesigənea̰ a tel lelee dɔ si maji’g lə sí to gə́ ka̰ bɔ síje-je bèe ləm tɔ, 10 loo gə́ seḭ a kilaje koji dɔ torndu Njesigənea̰ Ala’g lə sí gə mba kaaje ne dɔ godndiaje gə ndukunje lai gə́ ndaŋg mee maktub godndu’g neelé ləm, loo gə́ seḭ a telje reeje rɔ Njesigənea̰ Ala’g lə sí gə dɔɓəŋgərə sí bura gə rɔ sí bura ləm tɔ.
11 Godndu gə́ m’ndoo sí ɓogənè neelé tɔgərɔ ya, al dɔ siŋga sí el ləm, to ŋgərəŋ sə sí el ləm tɔ. 12 To né gə́ to dara ɓa gə mba kar sí paje ne pana: See na̰ ɓa a kḭ kaw dara kaw saŋg kar sí gə mba kar j’ooje gə mba kar síjeḛ n’raje née wa bèe el . 13 To né gə́ to kel tura-baa-boo-kad’g nu ɓa gə mba kar sí paje ne pana: See na̰ ɓa a kḭ gaŋg baa-boo-kad kaw tura mbata lə sí kaw saŋg kar sí j’ooje taree gə mba kar sí n’raje née wa bèe el tɔ. 14 Nɛ to ta gə́ to rɔ sí’g dəb ləm, to ta sí’g ləma, to meḛ sí’g ləm tɔ gə mba kar sí raje née ya.
15 Aa ooje, ɓogənè m’unda néje nee no̰ sí’g: kisi kəmba gə némajije ləm, gə yoo gə némajel ləm tɔ. 16 Mbata ɓogənè m’ula sí təsərə gə mba kar sí undaje Ala lə sí gə́ Njesigənea̰ dan kəm sí’g ləm, gə mba kar sí njaaje gə kila-rəwje ləa ləma, gə mba kar sí aaje dɔ godndiaje gə torndiaje gə ndukunje ləa kər-kər ləm tɔ ɓa gə mba kar sí síje ne kəmba, kar bula lə sí ḭ ne dɔ maree’d gə́ kédé-kédé ləm, kar Ala lə sí gə́ Njesigənea̰ tɔr ne ndia dɔ sí’g mee ɓee gə́ seḭ a gə kaw taaje gə́ né ka̰ sí lé ləm tɔ. 17 Nɛ ɓó lé seḭ arje meḛ sí tel gir ləm, ɓó lé seḭ ilaje ŋgonkoji el ləma, ɓó lé seḭ ya̰je loo ar deeje d’ər sí d’ar sí undaje barmba no̰ magəje’g mba pole dee ləm tɔ ndá, 18 ma m’ula sí təsərə ɓogənè to gə́ seḭ a kuduje bo̰ ləm, ɓee gə́ seḭ a gə kaw taaje gə́ ka̰ sí loo gə́ seḭ a gaŋgje ne baa gə́ Jurdɛ̰ lé kara kur sí a kəw keneŋ el ləm tɔ.
19 Ɓogənè ma m’ɓar dara gə naŋg nee gə mba kar dee d’ɔr ta d’ila dɔ sí’g: ma m’unda yoo gə kisi kəmba gə ndutɔr gə ta ndɔl no̰ sí’g. Maji kar sí ɔrje kəm kisi kəmba mba kar sí-seḭ gə ŋgaka síje sije ne kəmba ləm, 20 gə mba kar sí undaje ne Ala lə sí gə́ Njesigənea̰ dan kəm sí’g ləm, gə mba kar sí tədje ne kag torndia ləma, gə mba kar sí naije ne səa ləm tɔ, mbata yee ɓa to gin kisi kəmba lə sí ləm, to gin kar ndɔje lə sí d’a koso ne dɔ maree’g ləm tɔ, togə́bè ɓa seḭ a kisije ne mee ɓee gə́ Njesigənea̰ man ne rəa gə mba kar bɔ síje-je, Abrakam gə Isaak gə Jakob tɔ .
© Ngambai Bible © Alliance Biblique du Tchad 1989, 2015.
